ក្រុមដំបូងបង្អស់នៃជនអន្តោប្រវេសន៍អាមេរិកកណ្តាលដែលធ្វើដំណើរឆ្លងកាត់ប្រទេសម៉ិកស៊ិកទៅកាន់សហរដ្ឋអាមេរិកក្នុងក្តីសង្ឃឹមថា នឹងស្វែងរកសិទ្ធិជ្រកកោនគឺបានទៅដល់ទីក្រុង Mexico City ហើយកាលពីថ្ងៃអាទិត្យដោយជ្រកកោនបណ្តោះអាសន្ននៅពហុកីឡាដ្ឋានមួយ។
ជនជាតិអាមេរិកកណ្តាលជាង១,០០០នាក់ដែលមួយចំនួនបានរត់គេចពីអំពើហឹង្សានិងការលំបាកផ្នែកហិរញ្ញវត្ថុនៅក្នុងប្រទេសកំណើតរបស់ពួកគេគឺបានដេកក្នុងឯពហុកីឡាដ្ឋានមួយដែលនៅទីនោះ រដ្ឋាភិបាលទីក្រុងបានបង្កើតជំនួយវេជ្ជសាស្ត្រនិងទីតាំងផ្តល់ម្ហូបអាហារ។
មុនការបោះឆ្នោតសភាអាមេរិកនៅថ្ងៃអង្គារនេះ លោកប្រធានាធិបតី Donald Trump បានព្រមានម្តងហើយម្តងទៀតអំពីការលុកលុយរបស់ក្រុមនេះហើយបានបញ្ជាឲ្យដាក់ពង្រាយកងទ័ពរាប់ពាន់នាក់ទៅព្រំដែនប្រទេសម៉ិកស៊ិក។
ជនអន្តោប្រវេសន៍បានមកដល់រដ្ឋធានីនេះក្នុងរយៈពេលបួនសប្តាហ៍បន្ទាប់ពីចាកចេញពីទីក្រុង San Pedro Sula របស់ប្រទេសហុងឌូរ៉ាស។ រដ្ឋធានីរបស់ប្រទេសម៉ិកស៊ិកគឺមានចម្ងាយជិត៨០៥គីឡូម៉ែត្រពីច្រកព្រំដែនជិតបំផុតនៅក្នុងរដ្ឋតិចសាស់។
ប្រព័ន្ធផ្សព្វផ្សាយក្នុងស្រុកបានរាយការណ៍ថា ជនជាតិអាមេរិកកណ្តាលរាប់ពាន់នាក់បន្ថែមទៀតកំពុងធ្វើដំណើរជាក្រុមនៅក្នុងរដ្ឋ Veracruz, រដ្ឋ Puebla និងរដ្ឋ Chiapas ភាគខាងត្បូង។
នៅទីសក្ការបូជា Virgin of Guadalupe ដ៏ល្បីល្បាញរបស់រដ្ឋធានី, ក្រុមអ្នកស្ម័គ្រចិត្តម៉ិកស៊ិកបាននាំគ្នាស្រែកហើយផ្តល់ឡានក្រុងដល់ជនអន្តោប្រវេសន៍ដើម្បីជិះទៅកាន់ពហុកីឡាដ្ឋាន។
រដ្ឋាភិបាលអាមេរិកបានដាក់សម្ពាធប្រទេសម៉ិកស៊ិកឲ្យផ្អាកការលុកលុយរបស់ជនចំណាកស្រុកហើយលោកប្រធានាធិបតី Enrique Pena Nieto បានផ្តល់ឯកសារអត្តសញ្ញាណបណ្តោះអាសន្ននិងការងារប្រសិនបើពួកគេចុះឈ្មោះសុំសិទ្ធិជ្រកកោននៅរដ្ឋ Chiapas និង Oaxaca ។
រដ្ឋាភិបាលម៉ិកស៊ិកបាននិយាយកាលពីថ្ងៃសៅរ៍ថា ខ្លួនកំពុងពិនិត្យសំណើសុំសិទ្ធិជ្រកកោនជិត២,៨០០នាក់ហើយថា ប្រជាជនអាមេរិកកណ្ដាលប្រហែល១,១០០នាក់ត្រូវបាននិរទេស៕ REUTERS
Source: Kampuchea Thmey Daily
0 Comments