ប្ដីបាញ់សម្លាប់ប្រពន្ធ រួចបាញ់សម្លាប់ខ្លួនឯង ដោយសារភ្លើងប្រចណ្ឌ

កំពង់ធំ ៖ដោយសារភ្លើងប្រចណ្ឌ ប្ដីដាច់ចិត្តយកកាំភ្លើងបាញ់សម្លាប់ប្រពន្ធ ហើយបាញ់ខ្លួនឯងស្លាប់ជាក្រោយ។ ករណីនេះ កើតឡើង ស្របពេលជនរងគ្រោះជាភរិយា ត្រឡប់មកពីញ៉ាំការ ក៏ផ្ទុះរឿងជជែក ប្រកែកគ្នាមួយសន្ទុះ រហូតផ្ទុះអាវុធចំនួន៥គ្រាប់បណ្ដាលឲ្យពីរនាក់ប្តីប្រពន្ធនេះ ស្លាប់យ៉ាងអាណោចអាធ័ម នៅក្នុងថ្លុកឈាម បង្កឲ្យមានការភ្ញាក់ផ្អើលដល់អ្នកភូមិតែម្ដង។

ហេតុការណ៍ដ៏រន្ធត់នេះ បានកើតឡើងនៅវេលាម៉ោង៧និង៣០នាទី យប់ថ្ងៃទី១៣ ខែធ្នូ ឆ្នាំ២០១៨ ស្ថិតនៅភូមិបាល័ង្ល សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ ដោយជនដៃដល់ជាប្តីឈ្មោះ ហេង សុវណ្ណរា ហៅ ខ្លឹង អាយុ៤៧ឆ្នាំ បានបាញ់សម្លាប់ប្រពន្ធឈ្មោះ ស៊ុន ពៅ អាយុ ៣៧ឆ្នាំ បាញ់ចំខាងលើដោះធ្លាយឆ្អឹងខ្នងបណ្តាលឲ្យស្លាប់ បន្ទាប់ពីប្រពន្ធបានស្លាប់ ក៏បានបាញ់សៀតផ្កាខ្លួនឯង បណ្តាលឲ្យស្លាប់ទាំងពីរនាក់។ អ្នកទាំងពីរជាប្តីប្រពន្ធនឹងគ្នា មានកូន២នាក់ ប្រុសមួយស្រីមួយ មានមុខរបរលក់បាយ និងលាងឡាន។

ក្រោយពីកើតហេតុ លោកអ៊ិត សុធា ព្រះរាជអាជ្ញាអមសាលាដំបូង ខេត្តកំពង់ធំ បានបញ្ជាឲ្យលោក ឧត្ដមសេនីយ៍ត្រី ទិត សំណាង ស្នងការរង ទទួលព្រហ្មទណ្ឌកម្រិតធ្ងន់ នៃស្នងការនគរបាល ខេត្តកំពង់ធំ ដឹកនាំ កម្លាំងជំនាញចុះទៅកន្លែងកើតហេតុ ដោយមានកម្លាំងផ្នែកសឹករងក្រុងស្ទឹងសែន កងរាជអាវុធហត្ថខេត្ត និងប៉ុស្តិ៍រដ្ឋបាលបាល័ង្ល រួមទាំងក្រុមគ្រូពេទ្យ ដើម្បីពិនិត្យកោសល្យវិច័យ។ ក្រោយពីពិនិត្យរួចរាល់ បានបញ្ជាក់ថា ជនរងគ្រោះទាំងពីរនាក់ ប្តីប្រពន្ធ ពិតជាមានជម្លោះរឿងស្នេហា ដោយខាងប្រុសប្រចណ្ឌខាងស្រី ទើបឈាន ដល់ការបាញ់សម្លាប់គ្នា ដោយអាវុធខ្លី ម៉ាកវុលរ៉ូវែ ចំនួន៥ គ្រាប់ ដោយអាវុធនេះ ជនដៃដល់បានលួចលាក់ទុក កាលពីសម័យធ្វើជាកងកម្លាំង។

តាមការឲ្យដឹងពី សាច់ញាតិរបស់សាកសព ដែលត្រូវជាបងស្រីបង្កើតបានឲ្យដឹងថា ប្តីប្រពន្ធនេះ ធ្លាប់ឈ្មោះ គ្នាជាច្រើនលើកច្រើនសា ដោយមួយរយៈកន្លងមកនេះ ប្តីរបស់ ស៊ុន ពៅ ធ្លាប់បានច្របាច់ក ប្រពន្ធស្ទើរ ស្លាប់ម្តងរួចមកហើយ តែកាលនោះមានបងប្អូនចូលទៅជួយទាន់ ហើយគាត់បានប្រាប់ប្អូនស្រីគាត់ថា ឲ្យតមមាត់តមសំដី ខ្លាចក្រែងមានរឿងធំទៀត លុះមកដល់ពេលនេះមានហេតុការណ៍ស្លាប់ដោយសាររឿងប្រចណ្ឌ ទាល់តែបាន។ ក្រោយពេលសមត្ថកិច្ចពិនិត្យសាកសព រួចក៏បានប្រគល់ជូនសាច់ញាតិទទួលយកធ្វើបុណ្យតាមប្រពៃណី៕