ភ្នំពេញ ៖ ថ្លែងក្នុងជំនួបសំដែងការគួរសម និងពិភាក្សាការងារជាមួយលោក ហ្វាង ស៊ុនជៀន មេបញ្ជាការកងទ័ពជើងគោកព្រំដែនវៀតណាម នារសៀលថ្ងៃទី១៣ ខែធ្នូ ឆ្នាំ២០១៨ នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ បានថ្លែងថា ទស្សនកិច្ចរបស់ លោក ហ្វាង ស៊ុនជៀន មកកាន់ព្រះរាជាណាចក្រកម្ពុជា គឺជាសកម្មភាពមួយស្តែងឲ្យឃើញនូវការបន្ត និងអនុវត្តតាមស្មារតីរបស់ថ្នាក់ដឹកនាំកំពូល នៃប្រទេសទាំងពីរ និងការបន្តរឹតចំណងសាមគ្គីភាព មិត្តភាព និងកិច្ចសហប្រតិបត្តិការនាពេលកន្លងមក ដែល លោក ហ្វាង ស៊ុនជៀន ជាមួយនឹងក្រសួងមហាផ្ទៃ ជាពិសេសជាមួយនឹងអគ្គនាយកដ្ឋានអន្តោប្រវេសន៍ ដែលជាដៃគូសមភាគីធ្វើការជាមួយគ្នា ហើយសម្ដេចក៏គាំទ្រភាគីទាំងពីរ បន្តធ្វើកិច្ចការជាមួយគ្នាឲ្យកាន់តែផុលផុសថែមទៀត។
លោកឧត្ដមសេនីយ៍ទោ ហ្វាង ស៊ុនជៀន មេបញ្ជាការកងទ័ពការពារព្រំដែនវៀតណាម ក៏បានអបអរចំពោះការបោះឆ្នោតនៅកម្ពុជាដែលប្រព្រឹត្តទៅក្រោមបរិយាកាសសន្តិសុខ និងសន្តិភាព ដែលនេះស្ដែងឲ្យឃើញនូវការបន្តធានាដល់និរន្តរភាព នៃសន្តិសុខ និងសន្តិភាព ក៏ដូចជាការអភិវឌ្ឍន៍នៅកម្ពុជាផងដែរ។
លោកក៏បានអបអរចំពោះដំណើរទស្សនកិច្ចនាពេលថ្មីៗនេះ របស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ទៅកាន់ប្រទេសវៀតណាម ដែលជាការរួមចំណែករឹតចំណងសាមគ្គីភាព និងមិត្តភាព រវាងប្រទេសទាំងពីរឲ្យកាន់តែរីកចម្រើនធំធាត់ថែមទៀត។
មេបញ្ជាការកងទ័ពការពារព្រំដែនវៀតណាមបានជម្រាបជូនសម្ដេចក្រឡាហោម ស ខេង ថា លោកក៏ត្រូវជួបធ្វើការជាមួយខាងកងទ័ពរបស់កម្ពុជាផងដែរ ក្នុងស្មារតីសហការកសាងខ្សែបន្ទាត់ព្រំដែនរវាងប្រទេសទាំងពីរ ប្រកបដោយសន្តិភាព និងការអភិវឌ្ឍន៍នៅតាមខ្សែបណ្តោយព្រំដែន។
លោកក៏បាន អរគុណសម្ដេចក្រឡាហោម ស ខេង ក៏ដូចជាខាងកងទ័ព និងសម្ដេចតេជោ ហ៊ុន សែន ជានិច្ចកាលតែងតែផ្តល់កិច្ចសហការ និង គាំទ្រដល់កិច្ចសហប្រតិបត្តិការដ៏ល្អរវាងប្រទេសទាំងពីរ ក្នុងការកសាងសន្តិសុខ និងសន្តិភាព នៅតាមខ្សែបន្ទាត់ព្រំដែន ហើយលោកនឹងបន្តជជែកពិភាក្សាជាមួយភាគីពាក់ព័ន្ធដូចជា អគ្គនាយកដ្ឋានអន្តោប្រវេសន៍ ប្រកបដោយស្មារតីមិត្តភាព និងពង្រីកចំណងមិត្តភាពជាមួយគ្នាឲ្យកាន់តែល្អប្រសើរថែមទៀត៕
Source: Kampuchea Thmey Daily
0 Comments