ព្រះសីហនុ ៖ ជនសង្ស័យចំនួន០៧នាក់ពាក់ព័ន្ធអំពើចោរកម្មលើទឹកដី ក្រុងព្រះសីហនុ ដែលបានឃាត់ខ្លួនក្នុងបទ ល្មើសចំនួន០២ផ្សេងគ្នា នារសៀលថ្ងៃទី១៣ ខែធ្នូ ឆ្នាំ២០១៨នេះ ត្រូវបានសមត្ថកិច្ចប៉ូលិសស្នងការដ្ឋាននគរបាលខេត្តព្រះសីហនុសម្រេចកសាងសំណុំរឿងបញ្ជូនទៅកាន់សាលាដំបូងដើម្បីផ្ដន្ទាទោសតាមផ្លូវច្បាប់ ក្រោយបញ្ចប់នីតិវិធីសាកសួរ។
លោក វរសេនីយ៍ទោ លី សុខហ៊ី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះសីហនុបានអោយដឹងថា ក្រុមចោរកម្មវ័យក្មេង ចំនួន២ក្រុម មាន ចំនួន០៧នាក់ដែលធ្វើសកម្មភាព កាច់កម៉ូតូ និង ឆក់សម្ភារៈតាម ទី សាធារណៈ ក្នុង ក្រុងព្រះសីហនុ ខាងលើ .(ករណីទី១) មានឈ្មោះទី១. ឈិត ប៊ុនយូ ភេទប្រុស អាយុ ១៧ឆ្នាំ មុខរបរ ជាងធ្វើឡានមានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ( ជនដៃដល់កាច់ បំបែក សោលួចយកម៉ូតូ ) ទី២-ឈ្មោះ ទេព ដា ភេទប្រុស អាយុ ១៩ឆ្នាំ មុខរបរ មិនពិតប្រាកដ មានទីលំនៅ មិនពិតប្រាកដ។ ( សហចារី ) ទី៣-ឈ្មោះ សំ ចិត្រា ភេទប្រុស អាយុ ១៩ឆ្នាំ មុខរបរ មិនពិតប្រាកដ ស្នាក់នៅ ភូមិ៦ សង្កាត់៤ ក្រុង-ខេត្តព្រះសីហនុ ( សហចារី ) និងទី៤-ឈ្មោះ ទិត វាចា ភេទប្រុស អាយុ ២០ឆ្នាំ មុខរបរ មិនពិតប្រាកដស្នាក់នៅក្រុម១៧ ភូមិ៥ សង្កាត់៤ក្រុងខេត្តព្រះសីហនុ។ ជនជាប់សង្ស័យទាំង០៤នាក់នេះ ត្រូវបានចាប់ខ្លួននៅថ្ងៃទី០៧ ខែធ្នូ ឆ្នាំ២០១៨ វេលាម៉ោង ២៣ និង ៥០នាទី នៅត្រង់ ចំណុច ចំណោតរ៉ា ស្ថិតក្នុងភូមិ៣ សង្កាត់៣ ក្រុង-ខេត្តព្រះសីហនុ ពាក់ព័ន្ធធ្វើសកម្មភាព លួចកាច់បំបែក សោកម៉ូតូ។
ក្រោយពេលចាប់ខ្លួនសមត្ថកិច្ចដកហូតវត្ថុតាងបានរួមមាន៖សោច្នៃសម្រាប់កាច់បំបែកសោម៉ូតូ ០១ -ទួរណឺវិសចំនួន ០៤ ( ធំ ០១ , តូច ០៣ ) -សោលេខ១០ ចំនួន ០២ -ផ្លែទួរណឺវិស ០១ -កន្ត្រៃ ០១ -កូនកាំបិចចុច ០១ -វិទ្យុទាក់ទង ០១ -ម៉ូតូ ០១គ្រឿង ម៉ាកអ៊ែរប្លែត ស៊េរី ឆ្នាំ២០១៦ ពណ៌ខ្មៅ គ្មានស្លាកលេខ ( ផលនៃអំពើទុច្ចរិត) -ម៉ូតូ ០១គ្រឿង ម៉ាកអ៊ែរប្លែត ស៊េរី ឆ្នាំ២០១៥ ពណ៌មាស គ្មានស្លាកលេខ ( ផលនៃអំពើទុច្ចរិត ) -ម៉ូតូ ០១គ្រឿង ម៉ាកអ៊ែរប្លែត ស៊េរីឆ្នាំ ២០១៤ ពណ៌ស គ្មានស្លាកលេខ ( ផលនៃអំពើទុច្ចរិត )។
ករណីទី២ មានឈ្មោះ ទី១-ឈ្មោះ អៀង ប៊ុនធីប ភេទប្រុស អាយុ ១៦ឆ្នាំ មុខរបរ មិនពិតប្រាកដ ស្នាក់នៅផ្ទះជួលម្តុំផ្សារកំពង់ស្ពឺ ខេត្តកំពង់ស្ពឺ ( អ្នកបើកម៉ូតូ ) ២-ឈ្មោះ ខាន់ សំណាង ភេទប្រុស អាយុ ១៦ឆ្នាំ មុខរបរ មិនពិតប្រាកដ មានទីលំនៅ ភូមិ៥ សង្កាត់៤ ក្រុង-ខេត្តព្រះសីហនុ ( ជិះពីក្រោយឆក់ ) ៣-ឈ្មោះ យ៉ុន សុវណ្ណយុទ្ធ ភេទប្រុស អាយុ ១៦ឆ្នាំ មុខរបរ មិនពិតប្រាកដ ស្នាក់នៅផ្ទះជួលម្តុំផ្សារកំពង់ស្ពឺ ខេត្តកំពង់ស្ពឺ ( សហចារី )។ ជន ជាប់សង្ស័យត្រូវបានចាប់ខ្លួន នៅថ្ងៃទី១១ ខែធ្នូ ឆ្នាំ២០១៨ ស្ថិតនៅ ភូមិ១ សង្កាត់៣ ក្រុង-ខេត្ត ព្រះ សីហនុ ក្រោយពេលពួកគេធ្វើសកម្មភាព អំពើលួចមានស្ថានទម្ងន់ទោស (ឆក់ទូរស័ព្ទ ដៃជនជាតិចិន)។ វត្ថុតាង សមត្ថកិច្ចដកហូតបាន រួមមាន ម៉ូតូ ០១គ្រឿង ម៉ាក សង់ប៉ិច ស៊េរីឆ្នាំ២០១២ ពណ៌ខ្មៅ ស្លាកលេខៈ ភ្នំពេញ ១BG-០៣១១ ( មធ្យោបាយជិះធ្វើសកម្មភាព ) ចំពោះទូរស័ព្ទដៃ ០១គ្រឿង ម៉ាក IPHONE X ពណ៌ខ្មៅ ដែលពួកគេ ឆក់បាន៕
Source: Kampuchea Thmey Daily
0 Comments