•លន បញ្ញា ជួប ពុទ្ធ សំបូរ
ប្រដាល់ ៖ អ្នកប្រដាល់ជើងខ្លាំង និងជាម្ចាស់មេដាយស៊ីហ្គេមឆ្នាំ២០១៧របស់កម្ពុជា គឺ ពេជ្រ ម្ទេសខ្មាំង ក្លិបអារុណរះកីឡា ត្រូវគេផ្គូឲ្យជួបប្រកួតជាមួយអ្នកប្រដាល់ជើងខ្លាំងមកពីប្រទេសថៃ ក្នុងកម្មវិធីប្រដាល់មិត្តភាពអន្តរជាតិBoostrong On Fire Fighter នៅលើសង្វៀនSEATV នាព្រឹកថ្ងៃអាទិត្យទី១៦ ខែធ្នូ ឆ្នាំ២០១៨នេះ។
ពេជ្រ ម្ទេសខ្មាំង គេត្រូវជួបប្រកួតជាមួយ ភេត លឺឆា (Phat Leuchha) ដែលជាម្ចាស់ខ្សែក្រវាត់ ទម្ងន់៥៧គីឡូក្រាម នៅស្រុកថៃ។ អ្នកប្រដាល់ថៃរូបនេះ ជាលើកទី១ សម្រាប់គេ ដែលមកប្រកួតនៅសង្វៀនស្រុកខ្មែរនេះ។
រវាង ពេជ្រ ម្ទេសខ្មាំង និង ភេត លឺឆា នេះ មិនដឹងថា ម្ទេសខ្មាំងឈ្នះ ឬ ភេត លឺឆា ឈ្នះនោះទេ ? ព្រោះ អ្នកប្រដាល់ថៃរូបនេះ គេមានស្នៀតប្រដាល់ល្អ ពិសេសស្នៀតទាត់របស់គេ ហើយគេរឹងមាំវាយមិនចេះហត់ថែមទៀត។ នេះបើតាមការឲ្យដឹងពីលោកញាណ សុធី អ្នកផ្គូផ្គងប្រចាំសង្វៀនអាស៊ីអាគ្នេយ៍។
ទោះជាយ៉ាងណា មិនអាចនិយាយមុនថា អ្នកណាឈ្នះអ្នកណាចាញ់រវាង ពេជ្រ ម្ទេសខ្មាំង និង ភេត លឺឆា នេះ។ ពេជ្រ ម្ទេសខ្មាំង គេក៏ខ្លាំងដែរ គេធ្លាប់ផ្ដួលថៃច្រើននាក់ហើយកន្លងមក។ ពេជ្រ ម្ទេសខ្មាំង ប្រកួតជាមួយថៃលើកចុងក្រោយនេះ គេបានយកឈ្នះ មឿង ភេច (Moeung Phich)ដោយ ពិន្ទុ កាលពីចុងខែកញ្ញាកន្លងទៅ នៅលើសង្វៀន SEATVនេះ។
ពេជ្រ ម្ទេសខ្មាំង មានកំណត់ត្រាប្រកួតចំនួន៩៥លើក ក្នុងនោះវាយឈ្នះ៨៣លើក ចាញ់១១លើក និងស្មើ០១លើក។ ចំណែក ភេត លឺឆា គេមានកំណត់ត្រាប្រកួតប្រមាណ៦៧លើក ឈ្នះ៥៨លើក និង ចាញ់០៩លើក មិនដែលស្មើ។
យ៉ាងណា សម្រាប់ការជួបជាមួយម្ទេសខ្មាំងជើងខ្លាំងរបស់កម្ពុជាម្នាក់នេះ ភេត លឺឆា មិនជាស្រួលខ្លួនប៉ុន្មានទេ ព្រោះម្ទេសខ្មាំងគេវាយខ្លាំង និងមានបច្ចេកទេសក្នុងការប្រកួតល្អ ហើយមួយទៀត គេវាយរហ័ស ដករហ័ស ចេញចូលលឿន។ ចាំមើល ពេជ្រ ម្ទេសខ្មាំង អាចយកឈ្នះ ភេត លឺឆា បានដែរឬអត់?។
ចំពោះការប្រកួតរវាងអ្នកប្រដាល់រួមជាតិវិញ លន បញ្ញា អ្នកប្រដាល់សមាគមកីឡាប្រដាល់ក្រសួងការពារជាតិ នឹងជួបប្រកួតជាមួយ ពុទ្ធ សំបូរ អ្នកប្រដាល់ក្លិបពុទ្ធសេរីវង្សកីឡា ដោយជួបគ្នា ក្នុងទម្ងន់៦០គីឡូក្រាម។
រវាងអ្នកប្រដាល់ពីរនាក់នេះ គេពិបាកនឹងសន្និដ្ឋានមុនថា អ្នកណាឈ្នះ អ្នកណាចាញ់នោះទេ ត្បិតថា ពួកគេទាំងពីរនាក់នេះ សុទ្ធតែល្អ និងខ្លាំងប្រហាក់ប្រហែលគ្នា។
លន បញ្ញា ជាអ្នកប្រដាល់ជើងខ្លាំងស្រករក្រោយ ឯ ពុទ្ធ សំបូរ ជាជើងខ្លាំងស្រករមុន តែពេលនេះជួបគ្នា ពុំដឹងថានរណាឈ្នះ នរណាចាញ់ឡើយ?។ ប៉ុន្តែបើតាមក្រុមអ្នកវិភាគប្រដាល់ក្នុងស្រុកថា លន បញ្ញា ទំនងជាមិនឈ្នះពុទ្ធ សំបូរនោះទេ។
ចំណែក អ្នកប្រដាល់ រឿន សុខលី ក្លិបការិយាល័យទី៥ កងទ័ពជើងគោក ត្រូវគេផ្គូឲ្យជួបប្រកួតជាមួយ រិទ្ធ ប្រាក់ប៊ិន អ្នកប្រដាល់ក្លិបកងពលតូចលេខ៧០។ ពីរនាក់នេះ ប្រកួតគ្នាក្នុងប្រភេទ ទម្ងន់៥៤ គីឡូក្រាម។ រីឯ ស សូ អ្នកប្រដាល់ក្លិបឃ្លាំងមឿងកីឡាខេត្តពោធិ៍សាត់ ត្រូវប៉ះជាមួយ សាត ស៊ីណង អ្នកប្រដាល់ក្លិបកងពលតូចទ័ពឆ័ត្រយោង៩១១ ក្នុងទម្ងន់៦០គីឡូក្រាម ហើយ ពុទ្ធ ប៊ុនម៉ៅ អ្នកប្រដាល់ក្លិបពុទ្ធសេរីវង្សកីឡា ជួបជាមួយ ចិត្រ សុភី អ្នកប្រដាល់ក្លិបរស្មីភូមិគាបខេត្តបន្ទាយមានជ័យ ដោយប្រកួតក្នុងទម្ងន់៦០គីឡូក្រាមដែរ៕
Source: Kampuchea Thmey Daily
0 Comments