ភ្នំពេញ ៖ រថយន្តម៉ាកព្រូស ពណ៌ស្ករ ស៊េរីឆ្នាំ២០០៤ ពាក់ស្លាកលេខភ្នំពេញ 2AC ២៣៧៦មួយគ្រឿង បានទទួលរងការខូចខាតដោយរួញអស់មួយកំណាត់មុខ ខណៈដែលម្ចាស់របស់វា បើកទៅបុកទ្រូងចែកផ្លូវរបើកអស់ចំនួន១ផ្ទាំងនោះ តែក្នុងហេតុការណ៍នេះមិនបានបណ្ដាលឲ្យគ្រោះថ្នាក់ដល់មនុស្សនោះទេ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីយប់ថ្ងៃទី១៤ ខែធ្នូ ឆ្នាំ២០១៨វេលាម៉ោងប្រហែល១និង០០នាទីរំលងអធ្រាត្រ តាមបណ្ដោយផ្លូវ១២៨ កែងផ្លូវ២៥៣ ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
រថយន្តបង្កត្រូវបានប៉ូលិសបញ្ជាក់ថា ជារថយន្តធុនតូច ម៉ាកព្រូស ពណ៌ស្ករ ស៊េរីឆ្នាំ២០០៤ ពាក់ស្លាកលេខភ្នំពេញ2AC ២៣៧៦ ដោយបានបើកបរក្នុងល្បឿនលឿន តាមបណ្ដោយផ្លូវ១២៨ ក្នុងទិសដៅពីទិសខាងកើតមកលិច លុះមកដល់កែងផ្លូវ២៥៣ ក៏បុកទ្រូងចែកផ្លូវបណ្ដាលឲ្យរបើករបាំងថ្មពុះចែកទ្រូងផ្លូវអស់ចំនួន១ផ្ទាំង និងរថយន្តខូចខាតខាងមុខ តែមិនបណ្ដាលឲ្យគ្រោះថ្នាក់ដល់មនុស្សទេ។
ក្រោយពេលកើតហេតុ រថយន្តខាងលើ ត្រូវបានប៉ូលិសមូលដ្ឋានប្រគល់ឲ្យផ្នែកជំនាញចរាចរណ៍ជើងគោករាជធានីភ្នំពេញ ធ្វើការវាស់វែង និងចាត់ការទៅតាមនីតិវិធីផ្លូវច្បាប់៕
Source: Kampuchea Thmey Daily
0 Comments