ភ្នំពេញ ៖ សម្តេចក្រឡាហោម សខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្ស បានមានប្រសាសន៍ថា ការរៀបចំប្រារព្ធទិវាជាតិប្រយុទ្ធប្រឆាំងអំពើជួញដូរមនុស្ស គឺជាយុទ្ធនាការដ៏ទូលំទូលាយសម្រាប់ការផ្សព្វផ្សាយឲ្យយល់ដឹងអំពើជួញដូរមនុស្ស ផលបះពាល់និងអំពីកិច្ចខិតខំប្រឹងប្រែងនិងប្តេជ្ញាចិត្តរបស់រដ្ឋាភិបាល ក្នុងការប្រយុទ្ធប្រឆាំងការជួញដូរមនុស្សប្រចាំឆ្នាំ ក៏ដូចជាវេទិកាអំពាវនាវដល់ជនរួមជាតិ និងសហគមន៍អន្តរជាតិ ឲ្យចូលរួមសហការគ្នា ដើម្បីការពារសន្តិសុខ និងសុវត្ថិភាពមនុស្សជាតិ ពីអំពើជួញដូរមនុស្សការកេងប្រវ័ញ្ច និងការរំលោភបំពានគ្រប់រូបភាពទៅលើទាំងក្មេងចាស់ប្រុសស្រី និងកុមារ។
សម្តេចក្រឡាហោម បានមានប្រសាសន៍យ៉ាងដូច្នេះនៅរសៀលថ្ងៃទី១២ ខែធ្នូ ឆ្នាំ២០១៨ នាសាលមហោស្របកោះពេជ្រ ខណៈសម្ដេចក្រឡាហោម ស ខេង តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីក្នុងពិធីទិវាជាតិប្រយុទ្ធប្រឆាំងអំពើជួញដូរមនុស្សឆ្នាំទី១២។
សម្តេចសខេងបន្តថា ដោយឡែកថ្មីៗនេះ ក្នុងប្រទេសកម្ពុជា មានកើតឡើងនូវអំពើជួញដូរមនុស្ស ដែលបាននឹងកំពុង បង្កប់នៅក្នុងរូបភាព ជួលពរពោះជំនួស ដើម្បីជួញដូររារកនិងនាំចេញទៅក្រៅប្រទេស ដែលសកម្មភាពបែបនេះ មិនត្រឹមតែសកម្មភាពខុសច្បាប់ប៉ុណ្ណោះទេ តែក៏បានជះឥទ្ធិពលអាក្រក់ដល់វប្បធម៌ប្រពៃណីជាតិ សីលធម៌រស់នៅ ក៏ដូចជាប៉ះពាល់ដល់សុខភាព និងអាយុជីវិតស្ត្រី ដែលជាមាតា និងទារកថែទាំផង។ ក្នុងនាមគណៈកម្មការជាតិប្រយុទ្ធប្រឆាំងអំពើជួញដូរមនុស្ស សូមដាស់តឿនដល់ប្រជាពលរដ្ឋទាំងឡាយ សូមកុំប្រកាន់យកអំពើពរពោះជំនួសជាមធ្យោបាយក្នុងការដោះស្រាយជីវភាព ព្រោះជាអំពើអមនុស្សធម៌ ជាអំពើបាប និងជាបទល្មើស។
គ្រួសារនិងស្ត្រីក្រីក្រជាច្រើនបានព្យាយាមប្រឹងប្រែងរកគ្រប់មធ្យោបាយដើម្បីដោះស្រាយជីវភាពខ្លួននិងចិញ្ចឹមកូន ទោះជាលំបាកយ៉ាងណាក៏ដោយ តែមិនបានប្រកាន់យកជំរើសលក់ ឬបោះបង់កូនដែលខ្លួនបានពរពោះ ដើម្បីដោះស្រាយការលំបាករបស់ខ្លួនឡើយ។
សម្តេច ក្រឡាហោមសខេង បានបញ្ជាក់ទៀតថា ក្នុងនាមរាជរដ្ឋាភិបាលកម្ពុជា ខ្ញុំក៏សូមអំពាវនាវដល់បណ្តាប្រទេសដែលពាក់ព័ន្ធទាំងអស់ ដែលបានចុះហត្ថលេខារួមគ្នាលើអនុសារណៈលើកិច្ចព្រមព្រៀង ពហុភាគីដើម្បីរួមគ្នាប្រយុទ្ធ ប្រឆាំងអំពើជួញដូរមនុស្សគប្បីជំរុញអនុវត្តឲ្យមានប្រសិទ្ធភាពខ្ពស់ និងរួមគ្នាពិនិត្យលើចំណុចខ្វះខាតនៃការអនុវត្តន៍ ហើយរួមគ្នាកែលម្អបានទាន់ពេលវេលា។ ជាពិសេស ប្រទេសដែលទទួលពលករកម្ពុជា និងសូមមេត្តាជួយថែទាំ កម្លាំងទាំងនោះឲ្យដូចពលរដ្ឋរបស់ខ្លួន ព្រមទាំងជួយការពារពីការរំលោភបំពានកេងប្រវ័ញ្ចដែលអាចកើតមាន ជាយថាហេតុ។ ក្នុងករណីដែលពលករកម្ពុជាបានប្រព្រឹត្តខុសឆ្គង សូមមេត្តាអប់រំ ឬបញ្ជូនមកកម្ពុជាវិញតាមផ្លូវច្បាប់។
សម្តេចក្រឡាហោម ក៏បានដាស់តឿនចំពោះមន្ត្រីរាជការទាំងឡាយ ដែលបាននឹងកំពុងតែសាងបញ្ហាឃុបឃិត និង សហការជាមួយជនល្មើសជួញដូរមនុស្សនិងអំពើពាក់ព័ន្ធទាំងឡាយ ទោះបីដោយចេតនាក្តីអចេតនាក្តី ត្រូវឆាប់កែខ្លួនឲ្យបានល្អ ព្រោះរាជរដ្ឋាភិបាលត្រូវធ្វើការកែទម្រង់គ្រប់វិស័យ រាប់ទាំងឥរិយាបថការងាររបស់មន្ត្រីរាជការផងដែរ។
សម្តេចក្រឡាហោមបានសង្កត់ធ្ងន់ថា ក្នុងនាមសម្តេចអគ្គមហាសេនាបតីតេជោហ៊ុនសែននិងក្នុងនាមគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សនៃព្រះរាជាណាចក្រកម្ពុជា ខ្ញុំសូមប្រកាសជាឱឡារិក ក្នុងទិវាជាតិលើកទី១២ នៃការប្រយុទ្ធប្រឆាំងកអំពើជួញមនុស្សឆ្នាំ២០១៨នេះចំពោះមុខសហគមន៍ជាតិនិងអន្តរជាតិ នូវការប្តេជ្ញាចិត្តរបស់រដ្ឋាភិបាលកម្ពុជា ក្នុងការប្រយុទ្ធប្រឆាំងអំពើជួញដូរមនុស្សដោយបន្តខិតខំប្រឹងប្រែង ដើម្បីឱ្យប្រជាជនកម្ពុជា និងមនុស្សជាតិទទួលបានការគោរពសិទ្ធិសេចក្តីថ្លៃថ្នូរ ផលប្រយោជន៍ស្របច្បាប់ និងភាពសុខដុមរម្យនាដោយរួមសហការជាមួយ បណ្តាដៃគូពាក់ព័ន្ធនានាក្នុងតំបន់និងលើពិភពលោក ដើម្បីរួមគ្នាបង្ក្រាបអំពើជួញដូរមនុស្ស គ្រប់រូបភាព ផ្តន្ទាទោសជនល្មើសឲ្យបានម៉ឺងម៉ាត់ ដើម្បីកាត់បន្ថយឈានទៅលុបបំបាត់បទល្មើសទាំងឡាយ ដើម្បីកម្ពុជាទទួលបានភាពសុខសាន្តគ្មានអំពើរំលោភបំពាន និងអំពើជួញដូរមនុស្ស៕
Source: Kampuchea Thmey Daily
0 Comments