បាត់ដំបង ៖ យុវជនរងគ្រោះម្នាក់ បានរងរបួសរហូតដាច់ជើងទាំងសងខាងគួរអោយសង្វេគជាទីបំផុត បន្ទាប់ពីយុវជនរូបនេះ ដើររុករានព្រៃតាមបណ្តោយខ្សែបន្ទាត់ព្រំដែន កម្ពុជា ថៃ ហើយក៏បានជាន់ទៅលើគ្រាប់មីនដែលគេសង្ស័យថាអាចសល់ពីសម័យសង្គ្រាម បណ្តាលអោយផ្ទុះឡើងដាច់ជើងដល់ក្បាលជង្គង់តែម្តង។
លោកអនុសេនីយ៍ឯក ម៉ី ណាន់ នាយប៉ុស្តិ៍តំបន់ ៤០០ បានបញ្ជាក់ថា កាលពីថ្ងៃទី ១៣ ខែធ្នូ ឆ្នាំ ២០១៨ វេលាម៉ោង ៨ និង ១៥ នាទី យប់ មានសំឡេងផ្ទុះគ្រាប់មីន ចំនួន ១ គ្រាប់ ត្រង់ចំណុចខាងជើងផ្ទះខៀវ ក្នុងភូមិសាស្ត្រដែលគ្រប់គ្រងដោយប៉ុស្តិ៍ តំបន់ ៤០០ ដែលមានចម្ងាយពីក្រោយប៉ុស្តិ៍ ប្រមាណ ៦ គីឡូម៉ែត្រ ក្នុងទឹកដីស្រុកសំឡូត ខេត្តបាត់ដំបង បង្កអោយមានការភ្ញាក់ផ្អើលយ៉ាងខ្លាំងផងដែរ។
ក្រោយពេលកម្លាំងសមត្ថកិច្ចចុះទៅដល់ គឺបានប្រទះឃើញយុវជនម្នាក់ឈ្មោះឡាយ ហៀង អាយុ ២៩ ឆ្នាំ រស់នៅភូមិ ឆករកា ឃុំសំឡូត ស្រុកសំឡូត កំពុងដួលដេកក្នុងថ្លុកឈាម ដោយជើងរបស់គេទាំង ២ ត្រឹមក្បាលជង្គង់សល់តែឆ្អឹងប៉ុណ្ណោះ ដោយសារតែគេបានដើរជាន់ទៅលើគ្រាប់មីន។
បើតាមការអោយដឹងពីក្រុមគ្រួសារ សាច់ញាតិបានបញ្ជាក់ថា ជនរងគ្រោះ បានធ្វើដំណើរតាមខ្សែបន្ទាត់ព្រំដែន ក្នុងគោលបំណងដើរឆ្លុះសត្វ ហើយក៏បានជាន់ទៅលើគ្រាប់មីននេះតែម្តង បណ្តាលអោយផ្ទុះឡើង និងធ្វើអោយជើងរបស់គេទាំង២ ដាច់គ្មានសល់។
ប៉ុន្តែបើតាមប្រភពផ្សេងទៀតបាននិយាយថា ការរងគ្រោះនេះ ដោយសារតែពលរដ្ឋខាងលើចេះតែចូលទៅកាប់ឆ្ការ និងរានយកដីដើម្បីធ្វើចម្ការ នៅលើដី ដែលបន្សល់ដោយគ្រាប់មីន និងយុទ្ធភណ្ឌមិនទាន់ផ្ទុះ ដូច្នេះហើយបានជាធ្វើអោយគេជាន់ទៅលើគ្រាប់មីនតែម្តង។
បច្ចុប្បន្នជនរងគ្រោះ ត្រូវបានកម្លាំងសមត្ថកិច្ច និងក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យបង្អែក ខេត្តបាត់ដំបង ហើយ ដោយមិនទាន់ដឹងថា រហូតមកទល់នឹងពេលនេះ គេមានអាការៈធូរស្បើយហើយ ឬក៏យ៉ាងណានោះទេ៕
Source: Kampuchea Thmey Daily
0 Comments