សៀមរាប ៖ រថយន្តដឹកសំរាមរបស់ក្រុមហ៊ុនGaea បានបើកបោះពួយក្នុងល្បឿនយ៉ាងលឿនជ្រុលទៅបុកនឹងម៉ូតូចំពីក្រោយពេញទំហឹង បណ្តាលឲ្យប្រពន្ធស្លាប់នៅនឹងកន្លែង ឯឪពុក និងកូន រងរបួសធ្ងន់។ ចំណែកអ្នកបើករថយន្តបង្កចុះរត់គេចខ្លួនបាត់។
ហេតុការណ៍នេះកើតឡើងនៅថ្ងៃទី១២ ខែធ្នូ ឆ្នាំ២០១៨ លើកំណាត់ផ្លូវជាតិលេខ៦ នៅចំណុច ភូមិលលៃ ឃុំបាគង ស្រុកប្រាសាទបាគង ខេត្តសៀមរាប។
អធិការនគរបាលស្រុកប្រាសាទបាគង គឺលោកវរសេនីយ៍ឯក មិន ចន្ថា បានឲ្យដឹងនៅថ្ងៃទី១៣ ខែធ្នូ ឆ្នាំ២០១៨នេះថា មានករណីគ្រោះថ្នាក់ចរាចរណ៍ រវាងរថយន្តដឹកសំរាមរបស់ក្រុមហ៊ុនGaea បានបើកបុកនឹងម៉ូតូចំពីក្រោយ បណ្តាលឲ្យប្រពន្ធស្លាប់នៅនឹងកន្លែង ឯឪពុក និងកូន រងរបួសធ្ងន់ យ៉ាង។ រីឯអ្នកបើករថយន្តបង្កចុះរត់គេចខ្លួនបាត់។
លោកបន្តថា ជនរងគ្រោះមាន ឈ្មោះ ញៀវ សុភា ភេទប្រុស អាយុ៣៥ឆ្នាំ សញ្ជាតិខ្មែរ (បានរបួសធ្ងន់) បើកបរឌុបប្រពន្ធ និងកូនពីក្រោយ។ ប្រពន្ធឈ្មោះ ឈឿន សុសាន្ដ អាយុ២៦ឆ្នាំ (ស្លាប់) និងឈ្មោះ នឿន សុវណ្ណរ័ត្ន ភេទស្រី អាយុ៣ខែ(របួសធ្ងន់)។
អ្នកទាំង៣ មានទីលំនៅភូមិ តាប្រាក់ឃុំ មានជ័យ ស្រុកប្រាសាទបាគង ខេត្តសៀមរាប។ បច្ចុប្បន្នវត្ថុតាង ត្រូវបានកម្លាំងនគរបាលជំនាញអូសយកមករក្សាទុកនៅអធិការដ្ឋាននគរបាលស្រុក ដើម្បីរង់ចាំដោះស្រាយគ្នាតាមផ្លូវច្បាប់។ ឯសពជនរងគ្រោះ សមត្ថកិច្ចបានប្រគល់ជូនគ្រួសារសព យកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments