ឧត្តរមានជ័យ ៖ កម្លាំងជំនាញការិយាល័យប្រឆាំងគ្រឿងញៀន ដោយការដឹកនាំបញ្ជាផ្ទាល់ ពីលោក វរសេនីយ៍ឯក ថោង សាមិ នាយការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត និងមានការចូលរួមពីកម្លាំងអធិការដ្ឋាននគរបាល ស្រុកត្រពាំងប្រាសាទ កាលពីវេលាម៉ោង១៥និង១០នាទីល្ងាច ថ្ងៃទី២៧ ខែធ្នូ ឆ្នាំ២០១៨ បានចុះបង្ក្រាបករណីជួញដូរ រក្សាទុក ចែកចាយ និងប្រើប្រាស់គ្រឿងញៀន០១ករណី នៅចំណុចផ្ទះជនសង្ស័យ ស្ថិតនៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ក្នុងនោះសមត្ថកិច្ចយើង បានធ្វើការឃាត់ខ្លួនជនសង្ស័យចំនួន០២នាក់។
ជនសង្ស័យទី១-ឈ្មោះ វ៉ាន ដា ភេទប្រុស អាយុ២៧ឆ្នាំ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។ ទី២-ឈ្មោះ សម ពិសីភេទប្រុស អាយុ២៥ឆ្នាំ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។ ក្នុងការចុះបង្ក្រាបជនសង្ស័យខាងលើ សមត្ថកិច្ចដកហូតសម្ភារវត្ថុតាងរួមមាន ៖ ថ្នាំញៀនប្រភេទមេតំហ្វេតាមីន(ICE) ទឹកកក ចំនួន០៦កញ្ចប់ ធំ០១កញ្ចប់ ស្មើ៨១.៩៤ក្រាម ថ្លឹងទាំងសំបកថង់ ជញ្ជីងថ្លឹងថ្នាំញៀន០១គ្រឿង កូនសោឡាន០១ ម៉ូតូ០១គ្រឿង ខ្សែក០១ខ្សែ ចិញ្ចៀន០១វង់ កន្ត្រៃ០១ ស្លាបព្រា០១ នាឡិកាដៃ០១គ្រឿង ឧបករណ៍ឆក់០១ដើម ដែកកេះ០១ដើម ដបសម្រាប់ជក់ថ្នាំញៀន០២ដប និងសម្ភារៈសម្រាប់វេចខ្ចប់មួយចំនួនទៀត៕
Source: Kampuchea Thmey Daily
0 Comments