ក្រសួងបង្រួបបង្រួមកូរ៉េខាងត្បូងបាននិយាយកាលពីថ្ងៃសុក្រថា ព័ត៌មានផ្ទាល់ខ្លួនរបស់ជនជាតិកូរ៉េខាងជើងជិត១,០០០នាក់ ដែលរត់ចូលទៅក្នុងប្រទេសកូរ៉េខាងត្បូង ត្រូវបានទម្លាយបន្ទាប់ពី Hacker មិនស្គាល់អត្តសញ្ញាណបានចូលឆែកឆេរទិន្នន័យរបស់ទីភ្នាក់ងារតាំងទីលំនៅមួយ។
ក្រសួងនេះបាននិយាយថា ខ្លួនបានរកឃើញកាលពីសប្ដាហ៍មុនថា ឈ្មោះថ្ងៃខែឆ្នាំកំណើតនិងអាស័យដ្ឋានរបស់អ្នករត់ចោលស្រុកចំនួន៩៩៧នាក់ត្រូវបានគេលួចយកតាមកុំព្យូទ័រមួយគ្រឿងដែលឆ្លងមេរោគ software នៅឯទីភ្នាក់ងារមួយដែលគេហៅថាមជ្ឈមណ្ឌល Hana នៅក្នុងទីក្រុង Gumi ភាគខាងត្បូង។
មន្ត្រីក្រសួងម្នាក់បានប្រាប់ក្រុមអ្នកយកព័ត៌មានក្នុងលក្ខខណ្ឌអនាមិកដោយសារតែភាពរសើបនៃបញ្ហានេះថា “មេរោគត្រូវបានគេដាក់តាមរយៈអ៊ីម៉ែលដែលផ្ញើដោយអាសយដ្ឋានផ្ទៃក្នុង”។
មជ្ឈមណ្ឌល Hana គឺស្ថិតក្នុងចំណោមវិទ្យាស្ថានចំនួន២៥ដែលក្រសួងនេះគ្រប់គ្រងនៅទូទាំងប្រទេសដើម្បីជួយដល់អ្នករត់ចោលស្រុកចំនួន៣២,០០០នាក់ដើម្បីសម្រួលដល់ជីវិតថ្មីរបស់ពួកគេខណៈប្រទេសកូរ៉េខាងត្បូងបានផ្តល់ការងារ ការគាំទ្រផ្នែកវេជ្ជសាស្ត្រនិងច្បាប់។
អ្នករត់ចោលស្រុកដែលភាគច្រើនបានប្រថុយជីវិតដើម្បីគេចចេញពីភាពក្រីក្រនិងការគៀបសង្កត់ផ្នែកនយោបាយគឺជាប្រភពនៃការអាម៉ាស់សម្រាប់ប្រទេសកូរ៉េខាងជើង។ បណ្តាញសារព័ត៌មានរបស់រដ្ឋបានរិះគន់ពួកគេថាជា “មនុស្សថោកទាប” និងចោទប្រកាន់អ្នកស៊ើបការណ៍របស់កូរ៉េខាងត្បូងថាបានចាប់ជំរិតពួកគេមួយចំនួន។
ទោះបីជាយ៉ាងណាក៏ដោយ មន្ត្រីក្រសួងបានបដិសេធនិយាយថាតើកូរ៉េខាងជើងត្រូវបានគេជឿថាជាអ្នកនៅពីក្រោយការ Hack នេះដែរឬអត់ឬថាមានហេតុផលអ្វី។ មន្ត្រីនិយាយថា ការស៊ើបអង្កេតរបស់ប៉ូលិសកំពុងដំណើរការដើម្បីកំណត់ថាតើនរណាបានធ្វើវា។
ការរំលោភបំពានទិន្នន័យចុងក្រោយបំផុតនេះបានកើតឡើងនៅពេលវេលាដ៏លំបាកមួយសម្រាប់កូរ៉េទាំងពីរដែលបានធ្វើឲ្យប្រសើរឡើងនូវទំនាក់ទំនងរបស់ពួកគេយ៉ាងឆាប់រហ័សបន្ទាប់ពីការប្រឈមមុខដាក់គ្នាអស់រយៈពេលជាច្រើនឆ្នាំ៕
Source: Kampuchea Thmey Daily
0 Comments