ការប្រកួតកីឡាវាយកូនឃ្លីលើតុជើងឯកជាតិឆ្នាំ២០១៨ ដែលចាប់ផ្ដើមពីថ្ងៃទី២៧មកនោះ បានបញ្ចប់កាលពីល្ងាចថ្ងៃទី ៣០ ធ្នូ។
លោកព្រំ ប៊ុណ្ណយី ទីប្រឹក្សាក្រសួងអប់រំយុវជន និង កីឡា បានអញ្ជើញចូលរួមបំពាក់មេដាយដល់ជ័យលាភីនៅក្នុងពិធីបិទការប្រកួតនេះ។
បន្ទាប់ពីឆ្លងកាត់ការប្រកួតដ៏តឹងតែងមកនោះ សមាគម-ក្លិបចំនួន៣ បានបង្ហាញនូវភាពខ្លាំងរបស់ខ្លួនគឺក្រសួងមហាផ្ទៃក្នុងចំណោម៤វិញ្ញាសាដណ្ដើមបានមេដាយមាសចំនួន៤គ្រឿង មេដាយប្រាក់ ១ គ្រឿង និង មេដាយសំរិទ្ធ១ គ្រឿង។
ក្លិបAll Star ដែលឈរនៅលំដាប់ថ្នាក់លេខ២នោះ ដណ្ដើមបានមេដាយប្រាក់៣គ្រឿង និងមេដាយសំរិទ្ធ ១គ្រឿង ។ ក្លិបមគ្គុទ្ទេសក៍ចិន ដែលស្ថិតក្នុងចំណាត់ថ្នាក់លេខ៣ ដណ្ដើមបានមេដាយសំរិទ្ធចំនួន២ គ្រឿង។
សូមបញ្ជាក់ថា នៅក្នុងការប្រកួតនេះ មានសមាគម-ក្លិបចូលរួមចំនួន១៤ ដែលក្នុងនោះមានប្រតិភូ កីឡាករ-កីឡាការិនីចូលរួមចំនួន៧២រូប។ វិញ្ញាសាដែលដាក់ឲ្យប្រកួតមានចំនួន៤គឺវិញ្ញាសាប្រកួតជាក្រុមបុរស វិញ្ញាសាឯកត្តជនបុរស វិញ្ញាសាឯកត្តជននារី និងវិញ្ញាសាវាយគូបុរស៕
Source: Kampuchea Thmey Daily
0 Comments