សៀមរាប ៖ សមត្ថកិច្ចមូលដ្ឋានបានឲ្យដឹងថា ស្ត្រីម្នាក់ ត្រូវរថយន្តបុកដាច់ក្បាលខ្ទាតចេញពីស្មា ប្រមាណជា៣០ម៉ែត្រស្លាប់ភ្លាមៗនៅនឹងកន្លែងយ៉ាងអាណោចអាធ័ម ខណៈកំពុងជិះម៉ូតូ។
ហេតុការណ៍គ្រោះថ្នាក់ចរាចរណ៍នេះ កើតឡើងនៅវេលាម៉ោង១០និង៣០នាទី ថ្ងៃទី៣០ ខែធ្នូ ឆ្នាំ២០១៨ ត្រង់ចំណុចភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាប។
មន្ត្រីនគរបាលស្រុកសូទ្រនិគមបានឲ្យដឹងថា គ្រោះថ្នាក់នេះ បង្កឡើងដោយរថយន្តម៉ាក TOYOTA TACOMA ពណ៌ឈាមជ្រូក ពាក់ស្លាកលេខភ្នំពេញ 2-U2718 បើកបរដោយឈ្មោះ ពេទ្យ សូឡូ ភេទប្រុស អាយុ២៩ឆ្នាំ មានទីលំនៅភូមិសូភី ឃុំកន្ទ្រាំង ស្រុកប្រាសាទបាគង បើកបរក្នុងទិសដៅពីជើងទៅត្បូង បានបុកជាមួយម៉ូតូ ម៉ាកហុងដាឌ្រីម ពណ៌ខ្មៅ ឆ្នាំផលិត២០១៧ ពាក់ស្លាកលេខសៀមរាប 1Y 1353 បើកបរដោយ ឈ្មោះ សយ ស៊ាន់ អាយុ៣៣ឆ្នាំ ភេទស្រី នៅភូមិត្រពាំងប្រីយ៍ ឃុំពពេល ស្រុកសូទ្រនិគម បើកបរក្នុងទិសដៅ ពីត្បូងទៅជើង(ដាច់កស្លាប់)។
សមត្ថកិច្ចបន្តថា ក្នុងគ្រោះថ្នាក់នេះ រថយន្តបុកម៉ូតូ ហើយមនុស្សបុកនឹងជ្រុងដែកនៃទ្រុងរថយន្តផ្នែកខាងមុខនិងចំហៀងទ្រុងដែក បណ្ដាលអោយដាច់ក្បាលត្រឹមកខ្ទាតចេញពីដងខ្លួនចម្ងាយ៣០ម៉ែត្រ ស្លាប់ភ្លាមៗមួយរំពេច។
សមត្ថកិច្ចបញ្ជាក់ថា ក្រោយទទួលព័ត៌មានគឺកម្លាំងបានចុះទៅធ្វើការឃាត់ខ្លួន អ្នកបើកបររថយន្តផងដែរ។ ក្រោយពិនិត្យវាស់វែង និងប្រគល់សាកសពទៅក្រុមសាច់ញាតិ មធ្យោបាយរងគ្រោះនិងបង្ក រួមទាំងវត្ថុតាងពាក់ព័ន្ធ ត្រូវមន្ត្រីជំនាញផ្នែកចរាចរណ៍ប្រមូលមករក្សាទុកនៅអធិការ រង់ចាំដោះស្រាយតាមផ្លូវច្បាប់៕
Source: Kampuchea Thmey Daily
0 Comments