ភ្នំពេញ ៖ យុវជនម្នាក់ក្នុងចំណោមបក្ខពួក២នាក់ ត្រូវបានប្រជាពលរដ្ឋជាអ្នកដំណើររួមគ្នាស្ទាក់ចាប់បាន ហើយបានប្រគល់ជូនប៉ូលិសខណ្ឌទួលគោក ដើម្បីចាត់ការទៅតាមច្បាប់ ខណៈដែលយុវជនម្នាក់នេះ និងបក្ខពួកធ្វើសកម្មភាពឆក់កាបូបពីស្ត្រីអ្នកលក់ស្រាបៀរ មិនបានសម្រេច ហើយបានបណ្តាលអោយដួលម៉ូតូ ទើបប្រជាពលរដ្ឋចាប់បានម្នាក់ប្រគល់អោយប៉ូលិស។ ចំណែកជនសង្ស័យម្នាក់ទៀតគេចខ្លួនបាត់។
ជនសង្ស័យ ត្រូវបានឃាត់ខ្លួនវេលាម៉ោង២២និង៣០នាទីយប់ថ្ងៃទី២៩ ខែធ្នូ ឆ្នាំ២០១៨នៅចំណុចមុខផ្ទះលេខ៣៨៨ ផ្លូវម៉ៅសេទុងក្រុម៣០ ភូមិ១១ សង្កាត់បឹងសាឡាង ខណ្ឌទួលគោករាជធានីភ្នំពេញ។
ជនរងគ្រោះ ឈ្មោះដួង.ករណា ភេទស្រី អាយុ៣១ឆ្នាំ មុខរបរបុគ្គលិកស្រាបៀរកម្ពុជា មានទីលំនៅផ្ទះលេខ៥៤២ ភូមិទ្រា២. សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ជនសង្ស័យចំនួន០២នាក់ ១-ឈ្មោះ ឡា ភេទប្រុស អាយុប្រហែល២០ឆ្នាំ ពុំស្គាល់អាសយដ្ឋាន ជាអ្នកបើកម៉ូតូ បានរត់គេចខ្លួនបាត់ (ស្គាល់នៅកោះពេជ្រ)។ ២-ឈ្មោះផេន.សៀវលី ភេទប្រុសអាយុ១៧ឆ្នាំ ជនជាតិខ្មែរមុខរបរមិនពិតប្រាកដ ស្នាក់នៅម្តុំផ្សារស៊ីតនីផ្លូវឌឿងហែម សង្កាត់មិត្តភាពខណ្ឌ៧មករា រាជធានីភ្នំពេញ។
សម្ភារៈដកហូតរួមមាន ម៉ូតូ០១គ្រឿងម៉ាកC១២៥ ពណ៌ខ្មៅស៊េរី២០១៨ពាក់ស្លាកលេខ
1DH3636ភ្នំពេញ ដែលមានលេខតួ និងម៉ាស៊ីន ៥៣១៤៣០៩(ម៉ូតូជិះធ្វើសកម្មភាព)។ កាបូបស្ពាយពណ៌ក្រហម ចំនួន០១ (ជារបស់ជនរងគ្រោះ)
មន្ត្រីប៉ូលិសផ្នែកព្រហ្មទណ្ឌខណ្ឌទួលគោកបានអោយដឹងថា នៅវេលាម៉ោងប្រហែល២២និង២០នាទី ជនរងគ្រោះ បានជិះម៉ូតូចេញពីលក់ស្រាបៀរនៅហាងហ្គោថេស សង្កាត់ទឹកល្អក់១ ដោយមានអ្នកធ្វើការជាមួយគ្នាម្នាក់ទៀតឈ្មោះខុម ជាអ្នកឌុប គោលបំណងទៅផ្ទះ។ ជនរងគ្រោះអង្គុយខាងក្រោយស្ពាយកាបូប នៅពេលជិះមកដល់ចំណុចមុខផ្ទះលេខ៣៨៨ផ្លូវ២៤៥ ក្រុម៣០ភូមិ១១ សង្កាត់បឹងសាឡាង ខណ្ឌទួលគោក ស្រាប់តែមានម៉ូតូ០១គ្រឿងម៉ាកហុងដា១២៥ខ្មៅ ជិះពីរនាក់មកអែបខាងឆ្វេងដៃម៉ូតូជនរងគ្រោះ ហើយធ្វើសកម្មភាពឆក់កាបូបស្ពាយពីជនរងគ្រោះ។ ពេលនោះជនរងគ្រោះក៏ចាប់ទាញមកវិញ បណ្តាលអោយដួលម៉ូតូ។ នៅពេលជនសង្ស័យព្យាយាមរត់គេចជនរងគ្រោះក៏បានស្រែកអោយអ្នករួមដំណើរជួយឃាត់បានជនសង្ស័យម្នាក់ រួមទាំងវត្ថុតាងបញ្ជូនមកប្រគល់អោយនគរបាលប៉ុស្ដិ៍បឹងសាឡាង។ ចំណែកម្នាក់ទៀតគេចខ្លួនបាត់ស្រមោល។
បច្ចុប្បន្នជនសង្ស័យខាងលើត្រូវបានឃាត់ខ្លួននៅអធិការដ្ឋាន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមផ្លូវច្បាប់៕
Source: Kampuchea Thmey Daily
0 Comments