ឈើ​កែច្នៃ​ទ្វារ​បង្អួច ​ដឹក​ចេញពី​បាត​អាង​ ត្រូវបាន​សមត្ថកិច្ច​ចម្រុះ​បង្ក្រាប

ស្ទឹងត្រែង ​៖ ​សមត្ថកិច្ច​ចម្រុះ​ក្រោម​ការ​បញ្ជា​ផ្ទាល់​ពី​លោក​អន​ចាន់​សុជាតិ​ នាយ​ខណ្ឌ​រដ្ឋបាល​ព្រៃឈើ​ខេត្ត​ ដឹកនាំ​ដោយ​លោក​ហ៊ុន​សំអឿន​ នាយរង​សង្កាត់​អូរ​ពងមាន់​ បាន​ចុះ​បង្ក្រាប​ឈើ​កែច្នៃ​ខុសច្បាប់​ទ្វារ​បង្អួត​ ដែល​ដឹក​ចេញពី​ទំនប់​វារីអគ្គិសនី​សេ​សាន​ក្រោម 2(​បាត​អាង​) ​រួច​រឹបអូស​យក​ទៅ​រក្សាទុក​នៅ​សង្កាត់​អូរ​ពងមាន់។

​ករណី​បង្ក្រាប​បទល្មើស​ឈើ​ខុសច្បាប់​ខាងលើនេះ ​បានធ្វើ​ឡើង​កាលពី​វេលា​ម៉ោង 7 និង 30 នាទី​យប់​ថ្ងៃទី29 ខែធ្នូ ​ឆ្នាំ 2018 ត្រង់ចំណុច​ចំការចេក​ខាង​ចម្ងាយ​ពី​ផ្លូវជាតិ​លេខ 78​ប្រហែល 200 ម៉ែត្រ​ជិត​ទល់មុខ​ផ្លូវ​ចូល​ទំនប់​វា​រី​អគ្គិសនី​សេ​សាន​ក្រោម 2 ស្ថិតក្នុង​ភូមិ​អូរ​លាង​គ្រួស ឃុំ​ក្បាល​រមាស ស្រុក​សេសា​ន ខេត្តស្ទឹងត្រែង​។​

​ប្រភពព័ត៌មាន​បាន​ឲ្យ​ដឹង​ទៀតថា ​ឈើ​ដែល​សមត្ថកិច្ច​បង្ក្រាប​នេះ ត្រូវបាន​គេ​ដឹក​ចេញពី​ភូមិ​ស្រែគរ​ថ្មី​ឆ្លងកាត់​ប៉ុស្តិ៍​ត្រួតពិនិត្យ​ជាច្រើន​កន្លែង​ និង​កាត់​ទំនប់​វា​រី​អគ្គិសនី​សេសា​ន​ក្រោម 2 ជា​រៀងរាល់​យប់​តាម​រថយន្ត​សាំ​យ៉ុង​បើក​គូទ​ក្នុង​មួយ​យប់​មួយ​យប់​ប្រមាណ 7​គ្រឿង​ដល់ 10 គ្រឿង​ដែលមាន​មេ​ឈ្មួញ​ឈ្មោះ​ចែ​ពុ​យ​និង​ចែ​ពៅ​ដែល​មានផ្ទះ​នៅ​ទល់មុខ​ផ្លូវ​ចូល​ទំនប់​វា​រី​អគ្គិសនី​សេ​សាន​ក្រោម 2 ដែលជា​អ្នក​ប៉ាវ​រត់​ការដឹក​ចេញពី​ទីតាំង​ខាងលើ​យកទៅដាក់​ក្នុងព្រៃ​ចំការចេក​ចំណុច​ខាងលើ​សាង​ដាក់​រថយន្ត​កែច្នៃ​ដឹក​បន្ត​កាត់​តាម​ចម្ការ​ក្រុមហ៊ុន​ជាច្រើន​ទៅ​ដា​ក់នៅ​ចំណុច​អូរ​មួយ​ជាប់​នឹង​ក្រុមហ៊ុនចំការកៅស៊ូ ដុ​ណាយ​ដុង​ហ្វូ ខេត្តក្រចេះ​។​

​ប្រភព​បាន​បន្តទៀតថា ​បន្ទាប់ពី​ដល់​ចំណុច អូរ​មួយ​ជាប់​និង​ព្រំប្រទល់​ខេត្តក្រចេះ​ស្ទឹងត្រែង​មាន​គោយន្ត​ឆេវ​យក​ទៅដាក់​រថយន្ត​សាំ​យុង​ជាច្រើន​គ្រឿង​ដែល​រង់ចាំ​ដឹក​បន្ត​ឆ្លងកាត់​តាម​ក្រុមហ៊ុន​ដុង​ណាយ​ដុង​ហ្វូ​ចេញ​តាម​ច្រក​ភ្នំ​ខៀវ​ដែលមាន​សន្តិសុខ​ក្រុមហ៊ុន​ជា​អ្នក​អនុញ្ញាត​ឲ្យ​ធ្វើ​ចរាចរណ៍​កាត់​តាម​នោះ​ចេញទៅ​ផ្លូវជាតិ​លេខ 7 បន្ត​ទៅកាន់​ខេត្តក្រចេះ​និង​ទៅដល់​ទីផ្សារ​គោលដៅ​។​

​ប្រភព​បន្តថា ​ទីតាំង​សិប្បកម្ម​កែច្នៃ​ខាងលើ​ធ្លាប់បាន​បង្ក្រាប​ម្តង​រួចមកហើយ ​តែ​នៅពេល​បច្ចុប្បន្ន​សិប្បកម្ម​កែច្នៃ​ខុសច្បាប់​នៅ​ទីតាំង​នោះ បាន​កើន​លើស​ដើម​ដែល​គេ​ដឹងថា​ មាន​ប្រមាណ​ទៅ​រហូត​ទៅដល់ 10 កន្លែង​ឯ​ណោះ ដែល​មួយថ្ងៃ​មួយថ្ងៃ​គេ​បាន​កែច្នៃ​ឈើ​ទ្វារ​បង្អួច​រាប់រយ​វង់​ដឹក​ចេញ​តាម​រថយន្ត​សាំ​យ៉ុង​មួយ​យប់​មួយ​យប់​មិន​ក្រោម​ពី 10 គ្រឿង​នោះឡើយ​។​
​
នៅក្នុង​ការបង្ក្រាប​នេះដែរ ស្ត្រី​ជា​មេ​ឈ្មួញ​ឈ្មោះ​ពុ​យ ក៏បាន​ចេញមុខ​មក​សម្រួល​ជាមួយ​សមត្ថកិច្ច​ក្នុង​ទឹកប្រាក់​ចំនួន 8 រៀន​លាន​រៀល​ជា​ថ្នូរ មិន​បង្ក្រាប ​តែ​សមត្ថកិច្ច​បាន​អនុវត្ត​ទៅតាម​ច្បាប់​ស្តីពី​ព្រៃឈើ​មិនត្រូវ​បានធ្វើការ​សម្រុះសម្រួល​នោះឡើយ។ ឈើ​ទាំងនោះ​ត្រូវបាន​សមត្ថកិច្ច​ចម្រុះ​យក​រថយន្តស្ទូច​ដឹកជញ្ជូន​យកទៅ​កាន់​សង្កាត់រដ្ឋបាល​ព្រៃឈើ​អូរ​ពងមាន់​រក្សាទុក​ចាត់​ការ​ទៅតាម​នីតិវិធី​។​

​សូមបញ្ជាក់ថា ការដែល​រថយន្ត​កែច្នៃ​ដឹក​កាត់​តាម​ចម្ការ​ជាច្រើន​ទៅកាន់​ចំណុច ខាងលើ​នោះ​ដោយសារតែ តាមផ្លូវ​ជាតិ​មាន​ប៉ុស្តិ៍​ត្រួតពិនិត្យ​ទប់ស្កាត់​បទល្មើស​ព្រៃឈើ​ទើប​មិន​ហ៊ាន​រត់​កាត់​តាម​ផ្លូវជាតិ​។​
​
ក្នុងការ​បង្ក្រាប​នេះ​ផងដែរ ទោះជា​មាន​មេ​ឈ្មួញ​ដែល​គេ​ដឹងថា​ ជា​ស្ត្រី​ជើង​ខ្លាំង​ចេញមុខ​រត់ការ​មកសុំ​សម្រួល​យ៉ាងណាក្តី​ក៏​មិន​ត្រូវបាន​សមត្ថកិច្ច​ឃាត់ខ្លួន​នោះទេ បានត្រឹមតែ​ប្រមូល​វត្ថុតាង​បទល្មើស​តែប៉ុណ្ណោះ​៕


​

Source: Kampuchea Thmey Daily