រដ្ឋមន្ដ្រីក្រសួងយុត្តិធម៌បាននិយាយថា ប្រទេសជប៉ុនបានព្យួរ.កបុរសពីរនាក់ដែលត្រូវបានផ្តន្ទាទោសពីបទមនុស្សឃាតកាលពីថ្ងៃព្រហស្បតិ៍ដែលជាហេតុនាំឲ្យចំនួននៃការប្រហារជីវិតនៅឆ្នាំនេះកើនដល់១៥នាក់ស្មើនឹងចំនួនខ្ពស់បំផុតក្នុងកំណត់ត្រា។
ជាមួយនឹងអ្នកទោសជាង១០០នាក់ដែលមានទោសប្រហារជីវិត, ជប៉ុនគឺជាប្រទេសមួយក្នុងចំណោមប្រទេសអភិវឌ្ឍន៍មួយចំនួនតូចដែលនៅតែរក្សាទោសប្រហារជីវិតហើយការគាំទ្រជាសាធារណៈសម្រាប់ការអនុវត្តនេះនៅតែមានខ្ពស់បើទោះបីជាមានការរិះគន់ពីអន្តរជាតិរួមបញ្ចូលទាំងពីក្រុមសិទ្ធិមនុស្សក៏ដោយ។
រដ្ឋមន្ត្រីបានបញ្ចេញឈ្មោះបុរសដែលត្រូវបានប្រហារជីវិតទាំងពីរនាក់ថាមានឈ្មោះ Keizo Kawamura អាយុ៦០ឆ្នាំនិង Hiroya Suemori អាយុ៦៧ឆ្នាំដែលត្រូវបានផ្តន្ទាទោសពីបទសម្លាប់ប្រធានក្រុមហ៊ុនវិនិយោគម្នាក់និងបុគ្គលិកម្នាក់កាលពីឆ្នាំ១៩៨៨។
បន្ទាប់ពីលួចប្រាក់១០០លានយ៉េន (ស្មើនឹង៩០០,០០០ដុល្លារអាមេរិកនាពេលសព្វថ្ងៃ), ពួកគេបានកប់សាកសពទាំងពីរក្នុងបេតុងនៅលើភ្នំ។ ការផ្តន្ទាទោសប្រហារជីវិតត្រូវបានសម្រេចនៅឆ្នាំ២០០៤។
រដ្ឋមន្ត្រីក្រសួងយុត្តិធម៌លោក Takashi Yamashita បានប្រាប់សន្និសីទសារព័ត៌មានមួយថា “នេះគឺជាឧក្រិដ្ឋកម្មដ៏សាហាវដែលធ្វើឲ្យសង្គមមានការភ្ញាក់ផ្អើល”។
លោករដ្ឋមន្ត្រីដែលជាអតីតព្រះរាជអាជ្ញាបាននិយាយថា លោកបានបញ្ជាឲ្យមានការប្រហារជីវិតនេះបន្ទាប់ពីការពិចារណាយ៉ាងយកចិត្តទុកដាក់ហើយបានបញ្ជាក់យ៉ាងច្បាស់ថា ប្រទេសជប៉ុននឹងមិនបញ្ឈប់ការផ្តន្ទាទោសប្រហារជីវិតនាពេលឆាប់ៗនេះទេ។
គិតមកត្រឹមពេលនេះ ប្រទេសជប៉ុនបានព្យួរ.កអ្នកទោសចំនួន១៥នាក់នៅឆ្នាំនេះដែលស្មើនឹងកំណត់ត្រាឆ្នាំ២០០៨ចាប់តាំងពីប្រទេសនេះបានចាប់ផ្តើមប្រកាសជាសាធារណៈអំពីការប្រហារជីវិតក្នុងឆ្នាំ១៩៩៨។
ការព្យួរ.កកាលពីថ្ងៃព្រហស្បតិ៍បានកើតឡើង៥ខែបន្ទាប់ពីប្រទេសនេះបានអនុវត្តការប្រហារជីវិតលើសមាជិកសាសនាដែលត្រូវបានកាត់ទោសប្រហារជីវិតដោយសារតួនាទីរបស់ពួកគេនៅក្នុងការវាយប្រហារដោយឧស្ម័នសារីនឆ្នាំ១៩៩៥នៅស្ថានីយរថភ្លើងក្រុងតូក្យូនិងឧក្រិដ្ឋកម្មផ្សេងៗទៀត៕ AFP
Source: Kampuchea Thmey Daily
0 Comments