ភ្នំពេញ ៖ កូរ៉េ ផ្ដល់ឥណទានទឹកប្រាក់ជាង៦៣លានដុល្លារអាមេរិក ឲ្យកម្ពុជា ដើម្បីលើកកម្ពស់ទឹកស្អាតនៅកម្ពុជាកាន់តែមានប្រសិទ្ធភាព។
កាលពីថ្ងៃពុធ ទី២៦ ខែធ្នូ ឆ្នាំ២០១៨ នៅទីស្ដីការក្រសួងសាធារណការ និងដឹកជញ្ជូន នៃប្រទេសកម្ពុជា រាជធានីភ្នំពេញ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាសេវាទីប្រឹក្សា នៃគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ រវាង ក្រសួងសាធារណការ និងដឹកជញ្ជូន និងក្រុមហ៊ុនទីប្រឹក្សាបច្ចេកទេស Dohwa Engineering Co., Ltd ដោយមានការចូលរួមពីថ្នាក់ដឹកនាំក្រសួងសាធារណការ និងដឹកជញ្ជូន និងតំណាង Dohwa Engineering Co., Ltd។
ក្រសួងសាធារណការបានបញ្ជាក់ជូនថា រាជរដ្ឋាភិបាលកម្ពុជាបានទទួលឥណទានពីធនាគារនីហរ័ណ អាហរ័ណកូរ៉េ សម្រាប់ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ដែលមានចំនួនទឹកប្រាក់ប្រមាណជាង៦៣លានដុល្លារសហរដ្ឋអាមេរិក ដើម្បីសាងសង់ស្ថានីយប្រព្រឹត្តកម្មទឹកកខ្វក់ដែលមានសមត្ថភាពចម្រោះទឹកបាន៧៦០០ម៉ែត្រគីប ក្នុងមួយថ្ងៃ និងសាងសង់ស្ថានីយបូមទឹកចំនួន១០ទីតាំង ដែលមានសមត្ថភាពអាចបូមបាន២៩៩៥២ម៉ែត្រគីប ក្នុងមួយថ្ងៃ សាងសង់បណ្ដាញលូ ស្តារស្ទឹងប្រវែង១៦,៣គីឡូម៉ែត្រ និងស្តារ ស្ថានីយបូមទឹកដែលមានស្រាប់ផងដែរ។
ឯកឧត្ដមទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ការចុះអនុស្សរណៈ នៃការយោគយល់នេះធ្វើឡើងក្នុងគោលបំណងធ្វើឲ្យប្រសើរឡើងនូវស្ថានភាពសុខុមាលភាព និងអនាម័យប្រជាពលរដ្ឋ តាមរយៈការសាងសង់ស្ថានីយប្រព្រឹត្តកម្មដែលមានសមត្ថភាពគ្រប់គ្រាន់ក្នុងការច្រោះទឹកកខ្វក់ពីតាមផ្ទះប្រជាពលរដ្ឋ លើកកម្ពស់បរិស្ថានដោយការបង្កើតប្រព័ន្ធបណ្តាញលូ និងការតភ្ជាប់បណ្តាញលូពីផ្ទះប្រជាពលរដ្ឋមកកាន់ ស្ថានីយប្រព្រឹត្តកម្ម ព្រមទាំងអាចការពារទឹកជំនន់ផងដែរ៕
Source: Kampuchea Thmey Daily
0 Comments