ក្រុមហ៊ុនច្បាប់មួយរបស់អាមេរិកបានប្រកាសកាលពីថ្ងៃពុធថា ពាក្យបណ្តឹងមួយដែលដាក់នៅក្នុងទីក្រុងឈីកាហ្គោបានស្តីបន្ទោសក្រុមហ៊ុន Boeing សម្រាប់ការធ្លាក់យន្តហោះរបស់ក្រុមហ៊ុនអាកាសចរណ៍ Lion Airនៅជិតឆ្នេរសមុទ្រឥណ្ឌូនេស៊ីដោយបានសម្លាប់មនុស្សទាំងអស់នៅលើយន្តហោះ។ ពាក្យបណ្តឹងនេះអះអាងថា យន្ដហោះរបស់ក្រុមហ៊ុននេះគឺមានគ្រោះថ្នាក់។
ពាក្យបណ្តឹងដែលដាក់កាលពីថ្ងៃចន្ទនៅក្នុងទីក្រុងនេះដែលជាមូលដ្ឋានរបស់ក្រុមហ៊ុន Boeing បានចោទប្រកាន់ថា ប្រព័ន្ធសុវត្ថិភាពរបស់យន្តហោះដែលមានអាយុកាលពីរខែនេះគឺមិនមានភាពត្រឹមត្រូវហើយអ្នកបើកយន្តហោះមិនត្រូវបានណែនាំដោយក្រុមហ៊ុនអំពីរបៀបឆ្លើយតប។
ជើងហោះហើរ Flight 610 របស់ក្រុមហ៊ុន Lion Air បានបាត់ពីរ៉ាដាក្នុងរយៈពេល១៣នាទីក្រោយពេលហោះចេញពីទីក្រុងហ្សាការតានៅថ្ងៃទី២៩ខែតុលាដោយបានធ្លាក់ចូលទៅក្នុងដែនទឹកជិតឆ្នេរសមុទ្រភាគខាងជើងកោះជ្វារបស់ប្រទេសឥណ្ឌូនេស៊ីនិងបានសម្លាប់មនុស្សទាំងអស់១៨៩នាក់ដែលជិះក្នុងនោះ។
សាច់ញាតិប្រហែល៣០នាក់របស់ជនរងគ្រោះនៃគ្រោះថ្នាក់នេះបានដាក់ពាក្យបណ្តឹងប្រឆាំងនឹងក្រុមហ៊ុន Boeing ដោយចោទប្រកាន់ថា កំហុសរបស់យន្តហោះម៉ូដែលថ្មី 737 MAX បាននាំឲ្យមានការស្លាប់។
ពាក្យបណ្តឹងនៅទីក្រុងឈីកាហ្គោត្រូវបានដាក់ជំនួសមុខឲ្យក្រុមគ្រួសារនៃអ្នកដំណើរឈ្មោះ Sudibyo Onggo Wardoyo អាយុ៤០ឆ្នាំក្នុងទីក្រុងហ្សាការតា។
មេធាវីរបស់គ្រួសារឈ្មោះ Thomas Demetrio បាននិយាយនៅក្នុងសេចក្តីថ្លែងការណ៍មួយថា “យន្តហោះ Boeing មិនត្រឹមតែដាក់ឧបករណ៍ចាប់សញ្ញាដែលផ្តល់ទិន្នន័យមិនត្រឹមត្រូវប៉ុណ្ណោះទេប៉ុន្តែវាក៏មិនបានផ្តល់ឲ្យអ្នកបើកបរយន្តហោះនូវការណែនាំគ្រប់គ្រាន់ផងដែរ”។
របាយការណ៍បឋមពីទីភ្នាក់ងារសុវត្ថិភាពដឹកជញ្ជូនរបស់ប្រទេសឥណ្ឌូនេស៊ីបានបង្ហាញថា អាកាសយានិកបានព្យាយាមគ្រប់គ្រងប្រព័ន្ធប្រឆាំងការគាំងម៉ាស៊ីនរបស់យន្តហោះភ្លាមៗមុនពេលធ្លាក់។
ទោះបីជាយ៉ាងណាក៏ដោយ អ្នកនាំពាក្យក្រុមហ៊ុន Boeing នឹងមិនធ្វើអត្ថាធិប្បាយអំពីការកំណត់ជាក់លាក់នៃពាក្យបណ្តឹងនេះទេ៕ AFP
Source: Kampuchea Thmey Daily
0 Comments