ភ្នំពេញ ៖ ជនសង្ស័យម្នាក់ ក្នុងចំណោមបក្ខពួក២នាក់ បន្ទាប់ពីធ្វើសកម្មភាពឡើងទៅគាស់បន្ទប់ជួលរបស់កម្មករ រោងចក្រ ឆ្កឹះសោបន្ទប់បម្រុងចូលលួចយករបស់របរ តែត្រូវអ្នកមើលការខុសត្រូវ បន្ទប់ជួលឃើញទាន់ បានដេញចាប់ប្រផាប់ប្រផីង រត់ឆ្លងភូមិមួយទៅភូមិមួយ ដោយរត់គេចខ្លួនបាត់ម្នាក់ និងចាប់បានម្នាក់ទៀត រត់ចូលពួនសម្ងំក្នុងកំប្លោកទឹកស្អុយ ត្រូវបានប្រជាពលរដ្ឋចុះទៅអូស កយកមកស្វាគមន៍ម្នាក់១ដៃឡើងទ្រមខ្លួន បើកុំតែបានសមត្ថកិច្ចឃាត់ទាន់ កុំអីអាចស្លាប់ក៏ថាបាន ដែលហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី២៧ ខែធ្នូ ឆ្នាំ ២០១៨ នៅចំណុចបន្ទប់ជួល៣ជាន់ ស្ថិតក្នុងភូមិព្រៃព្រីងត្បូង២ សង្កាត់ចោមចៅទី៣ តែជនសង្ស័យបានរត់ទៅចាប់បាន នៅក្នុងកំប្លោក ទឹកស្អុយ ស្ថិតក្នុងភូមិព្រៃព្រីងត្បូង១ សង្កាត់ចោមចៅទី២ ខណ្ឌពោធិ៍សែនជ័យ។
ជនសង្ស័យដែលឃាត់ខ្លួនបានមាន ឈ្មោះ រិទ្ធ សំណាង ភេទប្រុស អាយុ២២ឆ្នាំ មុខរបរមិនពិតស្នាក់នៅផ្ទះជួល ភូមិព្រៃព្រីងត្បូង១ សង្កាត់ចោមចៅទី២ ខណ្ឌពោធិ៍សែនជ័យ។ ម៉ូតូដែលជិះមកធ្វើសកម្មភាពម៉ាកស៊ីរ៉ូស ពណ៌ស ពាក់ស្លាកលេខភ្នំពេញ1CA-2727។
បើតាមសម្ដីពីអ្នកមើលការខុសត្រូវបន្ទប់ជួលបានឲ្យដឹងថា មុនពេលកើតហេតុ គេឃើញជនសង្ស័យមានចំនួន២នាក់ ជិះម៉ូតូម៉ាក ស៊ីរ៉ូស ជិះទៅជិះមកពីរបីត្រឡប់ តែមិនចាំអារម្មណ៍ គាត់ក៏ដើរមើលបន្ទប់ជាធម្មតា លុះគាត់ដើរមកដល់ជាន់ទី១ ក៏ស្រាប់តែឃើញជនសង្ស័យទាំង២នាក់ កំពុងឆ្កឹះសោបាន បម្រុងចូលក្នុងបន្ទប់ទៅហើយ តែត្រូវគាត់ស្រែកថា ចោរៗផ្អើលដល់គេ ឯង ដេញចាប់ ទើបជនសង្ស័យរត់ចុះមកក្រោមទាំង២នាក់ ចែកផ្លូវគ្នាភ្លេចយកម៉ូតូដែលជិះមកធ្វើសកម្មភាពនោះ។
ប្រភពដដែលបានបន្តថា ខណៈនោះជនសង្ស័យម្នាក់បានគេចបាត់ពីភ្នែក តែម្នាក់នេះ ខំប្រឹងរត់ចូលសម្ងំក្នុងកំប្លោកទឹកស្អុយ បាត់មួយសន្ទុះ ទើបមានប្រជាពលរដ្ឋចុះទៅរក ក៏ឃើញកំពុងសម្ងំអើត ក ក្នុងកំប្លោក ក៏ក្របួចយកមកប្រគល់ឲ្យ កម្លាំងសមត្ថកិច្ចនគរបាលប៉ុស្តិ៍ចោមចៅទី២ ដែលកំពុងឡោមព័ទ្ធជាមួយកម្មករសំណង់ជាច្រើននាក់ដែលកំពុងរង់ចាំស្វាគមន៍ជនសង្ស័យបណ្ដាលឲ្យបែកក្បាលផងដែរ តែទោះជាយ៉ាងណា សមត្ថកិច្ចបាននាំខ្លួនជនសង្ស័យចេញពីកន្លែងនោះ ភ្លាមៗ ព្រោះខ្លាចទប់នឹងកំហឹងប្រជាពលរដ្ឋមិនឈ្នះ។
ក្រោយពីឃាត់បានហើយ ខណៈដឹកជនសង្ស័យ តាមរថយន្តមកកាន់ប៉ុស្តិ៍ដើម្បីសួរនាំ ពេលដែលជនសង្ស័យសារភាព និងប្រាប់ ពីកន្លែងកើតហេតុ ទើបដឹងថាជាទឹកដីប៉ុស្តិ៍ចោមចៅទី៣ ទើបដឹកជនសង្ស័យទៅប្រគល់ឲ្យប៉ុស្តិ៍នគរបាលចោមចៅទី៣វិញ ដើម្បីសួរនាំ និងកសាង សំណុំរឿងបញ្ជូនទៅផ្នែកជំនាញខណ្ឌព្រហ្មទណ្ឌដើម្បីចាត់ការបន្ដតាមនីតិវិធី៕
Source: Kampuchea Thmey Daily
0 Comments