ព្រះសីហនុ ៖ លោកឧត្ដមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការ ជាតិសន្តិសុខលម្ហ សមុទ្រ បានឲ្យដឹងថា ទូកនេសាទមួយ គ្រឿងប្រើឧបករណ៍បទល្មើសឆក់ត្រីជាទ្រង់ទ្រាយធំ ត្រូវបានចាប់ឃាត់ទុក ជាមួយនឹងឧបករណ៍ល្មើសច្បាប់មួយចំនួនធំ ក្នុងនោះក៏បានធ្វើការឃាត់ខ្លួន មនុស្ស១០ ដែលជាកម្មករ នៅលើទូកផងដែរ គឺចាប់ក្នុងខណៈពេលទូកនេសាទនោះ កំពុងធ្វើសកម្មភាពប្រើប្រាស់ឧបករណ៍ឆក់ជាក់ស្ដែង នៅក្នុង លំហសមុទ្រ តំបន់ ទ្បាំដាំ កាលពីយប់ រំលងអធ្រាត្រ ថ្ងៃទី២៧ ខែធ្នូ ឆ្នាំ២០១៨។
លោក ឧត្តមនាវីឯក ទៀ សុខា បានបញ្ជាក់ថា ក្រុមមន្ត្រី សន្តិសុខលម្ហ សមុទ្រ ជារៀងរាល់ថ្ងៃតែងតែ ចេញល្បាតនៅគ្រប់គោលដៅ ក្នុងលំហសមុទ្រ ដើម្បីត្រួតពិនិត្យ គ្រប់សកម្មភាពនៃបទល្មើស ហើយសម្រាប់ទូកនេសាទ ប្រើប្រាស់ ឧបករណ៍ឆក់ខាងលើនេះ ត្រូវបានចាប់ឃាត់ទុកភ្លាមៗជាមួយមនុស្សចំនួន១០នាក់ ក្រោយពិនិត្យឃើញថា បានប្រើប្រាស់ ឧបករណ៍ឆក់ ខុសច្បាប់ក្នុងការនេសាទ។
បច្ចុប្បន្ន មនុស្សចំនួន១០នាក់ រួមនឹងវត្ថុតាងឧបករណ៍ខុសច្បាប់ ត្រូវបានបញ្ជូនបន្តទៅឲ្យជំនាញជលផល ខេត្តព្រះសីហនុ ចាត់តាមនីតិវិធីច្បាប់ កសាងសំណុំរឿង បញ្ជូនទៅសាលាដំបូងខេត្ត ព្រះសីហនុ។
ជាមួយនឹងករណីទូកនេសាទប្រើប្រាស់ ឧបករណ៍ឆក់ខាងលើនេះ មន្ត្រីជលផល ខេត្តព្រះសីហនុ បានបញ្ជាក់ថា នេះជាប្រភេទឧបករណ៍ល្មើសថ្មី ដែលក្រុមជនល្មើសបានលួច នាំចូល ពីប្រទេស វៀតណាម យកមកធ្វើសកម្មភាពនេសាទលើដែនសមុទ្រខ្មែរយើង ហើយឧបករណ៍ប្រភេទនេះ បង្កផលប៉ះពាល់ធ្ងន់ធ្ងរណាស់ លើជីវចម្រុះ ដែលមានជីវិត ក្នុងបាត សមុទ្រ ពីព្រោះឧបករណ៍ប្រភេទនេះ អាចនេសាទបានគ្រប់ស្ថានភាព បើទោះជាតំបន់មានថ្ម ក៏ដោយ គឺឆក់បានទាំងអស់ មិនថា ត្រីតូច ឬធំនោះឡើយ។
គួរបញ្ជាក់ផងដែរថា បទល្មើសនេសាទ នៅលើលំហសមុទ្រ មានច្រើនប្រភេទណាស់ដូចជា ឧបករណ៍ មងហោះ ប្រើប្រាស់អួនក្រឡាញឹក.ឧបករណ៍បាញ់ថ្នាំបំពុលត្រី នៅតាមក្រហែង ថ្មក្នុងបាតសមុទ្រ .ឧបករណ៍បំផ្ទុះគ្រាប់បែក .ឧបករណ៍បាញ់ភ្លើងហ្វា បំបែក ភ្នែកត្រី រួមនឹងទូក ប្រភេទធំអូសគួរជាដើម៕
Source: Kampuchea Thmey Daily
0 Comments