លេច​លឺ​ថា ​ក្រុម Muangthong United របស់​ថៃ នឹង​មក​ប្រកួត​មិត្តភាព​អន្តរជាតិ​ជាមួយ Cambodia All Stars ម្តងទៀត​នៅ​ដើមឆ្នាំ​ក្រោយ

ក្រុមបាល់ទាត់​Muangthong United សមាជិក​ក្នុង​ពានរង្វាន់​លី​គ​កំពូល​ប្រទេស​ថៃ ត្រៀម​នឹងធ្វើ​ដំណើរ​មក​ប្រទេស​កម្ពុជា​ម្តង​ទៀត នៅ​ដើម​ឆ្នាំក្រោយ​ដើម្បី​ប្រកួត​មិត្តភាព​អន្តរជាតិ​ជាមួយ​ក្រុម​ម្ចាស់ផ្ទះ Cambodia All Stars នៅ​ដើមឆ្នាំ​២០១៩ ខាងមុខ ខណៈ​ក្រុម​ទាំង​២​ធ្លាប់​បាន​ជួបគ្នា​ម្តង​ហើយ​កាលពី​ឆ្នាំ​២០១៧ កន្លងទៅ​។



យោង​តាម​ប្រភព​ដែល​គួរ​ឲ្យ​ទុកចិត្ត​មួយ​បញ្ជាក់ថា​ ក្រុម Muangthong United របស់​ថៃ​នឹង​ប្រកួត​ជាមួយ​ក្រុម Cambodia All Stars នឹង​ប្រកួត​គ្នា​នៅ​ពាក់កណ្ដាល​ខែកុម្ភៈ ខាងមុខ ខណៈ​កាលពី​ប៉ះគ្នា​លើក​ទី​២​ក្រុម Muangthong United បាន​យកឈ្នះ​លើ​ក្រុម Cambodia All Stars ដោយ​លទ្ធផល ៤​ទល់​០ ក្នុង​ថ្ងៃអាទិត្យ ទី​១៦ ខែកក្កដា ឆ្នាំ​២០១៧ លើ​ទីលាន​ពហុ​កីឡដ្ឋាន​ជាតិ ក្នុង​រាជធានី​ភ្នំពេញ​។ គ្រាប់​បាល់​ទាំង​៤​គ្រាប់​របស់​ក្រុម Muangthong United រកបាន​ដោយ​កីឡាករ​ជនជាតិ​ប្រេ​ស៊ី​ល Leandro Assumpcao រក​គ្រាប់​បាល់​៣​គ្រាប់​ឲ្យ​ក្រុម​ភ្ញៀវ​ក្នុង​នាទី​ទី​៨, ១៤, ៨១ ខណៈ​មិត្ត​រួម​ក្រុម​ជនជាតិ​ថៃ Ratchapol Nawanno ជា​អ្នករក​គ្រាប់​បាល់​១​គ្រាប់​ទៀត​ក្នុង​នាទី​២៥​។



គោលដៅ​នៃ​ការប្រកួត​រវាង​ក្រុម Muangthong United និង​ក្រុម Cambodia All Stars កាលពី​លើក​ទី​១​គឺ​ដើម្បី​ដកស្រង់​បទពិសោធន៍ រវាង​ក្រុម​ទាំង​២​ក៏ដូចជា​រឹត​ចំណងមិត្តភាព​រវាង​ប្រទេស​ទាំង ជាពិសេស​គឺ​ដើម្បី​ប្រមូល​ថវិកា​សម្រាប់​សកម្មភាព​ពង្រឹងសមត្ថភាព​កីឡាករ​បាល់ទាត់​វ័យក្មេង​កម្ពុជា​នៅ​ទូទាំង ២៥​រាជធានី​-​ខេត្ត​នានា​ក្នុង​ព្រះរាជាណាចក្រ​កម្ពុជា ក្នុង​ការ​ត្រៀមខ្លួន​ឆ្ពោះ​ទៅ​កាន់​ការប្រកួត​ស៊ី​ហ្គេម​ឆ្នាំ​២០២៣ ដែល​កម្ពុជា​គ្រោង​ធ្វើ​ម្ចាស់ផ្ទះ​។



​ក្រុម Cambodia All Stars គឺជា​ការ​ប្រមូលផ្ដុំ​កីឡាករ​ល្អៗ​នៅក្នុង​លី​គ​កំពូល​កម្ពុជា ទាំង​កីឡាករ​ខ្មែរ​និង​បរទេស ខណៈ​ក្រុម​នេះ​ធ្លាប់​បាន​ប្រកួត​មិត្តភាព​៥​លើក​រួច​មក​ហើយ​។ លោក ប្រាក់ សុវណ្ណារ៉ា និង លោក ទេព ឡុង​រចនា ក៏​ធ្លាប់​មាន​បទពិសោធន៍​ដឹកនាំ​ក្រុម​មួយ​នេះដែរ​ខណៈ​ចុងក្រោយ​លោក Leonardo Vitorino គឺជា​គ្រូបង្វឹក​ម្តង​។ ក្រុម Cambodia All Stars ត្រូវបាន​សហព័ន្ធ​កីឡាបាល់ទាត់កម្ពុជា បង្កើត​ឡើង​នៅ​ចុង​ឆ្នាំ​២០១៥ មក​ម្ល៉េះ៕

Source: Kampuchea Thmey Daily