ភ្នំពេញ ៖ ក្រសួងសុខាភិបាល អះអាងថាក្រោមគោលនយោបាយឈ្នះ ឈ្នះ ដែលដឹកនាំដោយប្រមុខនៃរាជរដ្ឋាភិបាល រយៈពេលជាង២០ឆ្នាំមកនេះ បានធ្វើឱ្យវិស័យសុខាភិបាល កម្ពុជាបោះជំហានអភិវឌ្ឍន៍យ៉ាងខ្លាំង ទាំងហេដ្ឋារចនាសម្ព័ន្ធមូលដ្ឋានសុខាភិបាល ទាំងកំណើនមណ្ឌលសុខភាព ប៉ុស្តិ៍សុខភាព ព្រមទាំងមន្ទីរពេទ្យបង្អែកជាដើម។
យោងតាមរបាយការណ៍របស់ក្រសួងសុខាភិបាល ដែលបានចេញផ្សាយជាសាធារណៈនៅក្នុងគេហទំព័ររបស់ខ្លួនដើម្បីចូលរួមអបអរសាទរនៃការសម្ពោធវិមានឈ្នះឈ្នះ ពីថ្ងៃទី២៩រហូតដល់ថ្ងៃទី៣១ខែធ្នូ ឲ្យដឹងថា ក្នុងរយៈពេល២៣ឆ្នាំក្រោមការដឹកនាំ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាល តាមនយោបាយឈ្នះ ឈ្នះ គឺបានធ្វើឲ្យវិស័យសុខាភិបាល រីកចម្រើនរហូតមកដល់បច្ចុប្បន្ននេះ។
ចាប់តាំងពីឆ្នាំ១៩៩៥ មកកម្ពុជាមានមន្ទីរពេទ្យចំនួន៦៥ សម្រាប់ទទួលព្យាបាលនិងថែរក្សាសុខភាពប្រជាពលរដ្ឋ ប៉ុន្តែរហូតមកដល់ឆ្នាំ២០១៨ គឺកម្ពុជាមានមន្ទីរពេទ្យចំនួន១១៨ មានមណ្ឌលសុខភាពចំនួន១២០៧ ព្រមទាំងមានប៉ុស្ដិ៍សុខភាពចំនួន១១៧កន្លែង ដើម្បីផ្ដល់ភាពងាយស្រួលកាន់តែខ្លាំងឡើង ដល់ប្រជាពលរដ្ឋ ឱ្យចូលមកប្រើប្រាស់សេវាថែទាំសុខភាពបានទាន់ពេលវេលា នៅពេលដែលមានជំងឺ។
របាយការណ៍ក្រសួងសុខាភិបាល ឲ្យដឹងទៀតថា ដោយសារវិស័យសុខាភិបាល មានកិច្ចសហការពីអន្តរវិស័យដែលពាក់ព័ន្ធ បច្ចុប្បន្នបានធ្វើឲ្យសុខភាពប្រជាពលរដ្ឋ មានភាពល្អប្រសើរឡើងពីមួយថ្ងៃ ទៅមួយថ្ងៃ។ អាយុរស់នៅជាមធ្យមរបស់ប្រជាពលរដ្ឋកម្ពុជាបានកើនឡើងពី២៤ឆ្នាំនៅឆ្នាំ១៩៧៩ មកដល់ជិត៧២ឆ្នាំ នៅឆ្នាំ២០១៥។ កំណើននៃអាយុរស់នៅជាមធ្យមរបស់ពលរដ្ឋខ្មែរបច្ចុប្បន្ននេះ គឺសឹងតែប្រហាក់ប្រហែលគ្នានិងអាយុរស់នៅ របស់ប្រជាពលរដ្ឋថៃ និងវៀតណាម ប៉ុន្តែមានកំរិតអត្រារស់នៅខ្ពស់ជាងប្រជាពលរដ្ឋឡាវ។
ក្រសួងសុខាភិបាល បានទទួលស្គាល់ថា ការរីកចម្រើនវិស័យសុខាភិបាលមកដល់បច្ចុប្បន្ននេះ គឺបានមកពីការខិតខំរបស់យើងទាំងអស់គ្នា ស្ថិតក្រោមដំបូលនយោបាយឈ្នះ-ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានធ្វើឲ្យប្រទេសកម្ពុជាមានសុខសន្តិភាពពេញលេញនិងការអភិវឌ្ឍដូចសព្វថ្ងៃនេះ។ គុណូបការ:ដ៏ធំធេងដែលមិនអាចកាត់ថ្លៃបាននេះ យើងទាំងអស់គ្នាសូមចងចាំដោយមិនអាចបំភ្លេចបានឡើយ និងរឹតតែខិតខំចូលរួមដំណើរធ្វើការអភិវឌ្ឍន៍ វិស័យសុខាភិបាលបន្ថែមទៀត ដើម្បីសុខភាពល្អនិងអាយុយឺនយូរដល់ប្រជាពលរដ្ឋកម្ពុជា៕
Source: Kampuchea Thmey Daily
0 Comments