វិមានក្រឹមឡាំងបាននិយាយកាលពីថ្ងៃអាទិត្យថា ប្រធានាធិបតីរុស្ស៊ីលោក Vladimir Putin បានធានាជាថ្មីចំពោះសមភាគីអាមេរិកលោក Donald Trump ថា ទីក្រុងមូស្គូនៅតែបើកចំហដល់ការសន្ទនាថ្វីបើឆ្នាំចាស់បានបញ្ចប់ទៅដោយគ្មានក្តីសង្ឃឹមសម្រាប់ទំនាក់ទំនងក្តៅក៏ដោយ។
លោកប្រធានាធិបតីបាននិយាយនៅក្នុងសេចក្តីថ្លែងការណ៍ឆ្នាំថ្មីថា “ទំនាក់ទំនងរវាងរុស្ស៊ីនិងអាមេរិកនៅតែជាកត្តាសំខាន់ដើម្បីធានាស្ថិរភាពជាយុទ្ធសាស្ត្រនិងសន្តិសុខអន្តរជាតិ”។
សេចក្តីថ្លែងការណ៍បានបន្ថែមថា “លោក Putin បានបញ្ជាក់ថា ប្រទេសរុស្ស៊ីគឺបើកចំហសម្រាប់ការពិភាក្សាជាមួយសហរដ្ឋអាមេរិកលើចំនួនប្រធានបទអតិបរមា”។
កាលពីខែធ្នូឆ្នាំ២០១៧ លោក Putin បាននិយាយថា លោកសង្ឃឹមថានឹងធ្វើឲ្យទំនាក់ទំនងជាមួយលោក Donald Trump មានភាព “ធម្មតា” ប៉ុន្តែឱកាសនោះត្រូវបានបំផ្លាញដោយការស៊ើបអង្កេតជាច្រើនអំពីការជ្រៀតជ្រែករបស់ក្រុងមូស្គូក្នុងនយោបាយសហរដ្ឋអាមេរិក។
នៅឆ្នាំនេះ ក្រុងវ៉ាស៊ីនតោនបានប្រកាសអំពីចេតនារបស់ខ្លួនក្នុងការដកខ្លួនចេញពីកិច្ចព្រមព្រៀងអាវុធនុយក្លេអ៊ែរសម័យសង្គ្រាមត្រជាក់ដ៏សំខាន់ដែលជាសន្ធិសញ្ញាកងកម្លាំងនុយក្លេអ៊ែររយៈចម្ងាយមធ្យមដែលជាហេតុធ្វើឲ្យលោក Putin ឆ្លើយតបថាក្រុងមូស្គូនឹងអភិវឌ្ឍមីស៊ីលថ្មី។
លោក Putin ក៏បានផ្ញើសារទៅប្រមុខរដ្ឋដទៃទៀតរួមទាំងលោកស្រី Theresa May របស់ចក្រភពអង់គ្លេសនិងប្រធានាធិបតីទួរគីលោក Recep Tayyip Erdogan ផងដែរ។
នៅក្នុងសាររបស់លោកទៅកាន់លោកស្រី May, លោក Putin បានជូនពរប្រជាជនអង់គ្លេសឲ្យមាន “សុខុមាលភាពនិងភាពរុងរឿង” នៅក្នុងឆ្នាំ២០១៩នេះ។
នៅឆ្នាំ២០១៨ ទំនាក់ទំនងរវាងក្រុងឡុងដ៍និងក្រុងមូស្គូត្រូវរងការខូចខាតយ៉ាងធ្ងន់ធ្ងរដោយសារការបំពុលអតីតចារកម្មលោក Sergei Skripal និងកូនស្រីរបស់គាត់ឈ្មោះ Yulia នៅលើទឹកដីរបស់ចក្រភពអង់គ្លេស។
ចក្រភពអង់គ្លេសបានចង្អុលដាក់រុស្ស៊ីប៉ុន្តែក្រុងមូស្គូបានបដិសេធការចូលរួមណាមួយ៕ AFP
Source: Kampuchea Thmey Daily
0 Comments