បន្ទាយមានជ័យ ៖ បុរសជាគ្រូចាប់ពស់ម្នាក់ ចាប់បានពស់វែកដំបូក១ក្បាល ភ្លាត់ស្នៀតត្រូវពស់ចឹកស្លាប់ ដោយមិនទៅពេទ្យព្យាបាល សុខចិត្តឲ្យគ្រូខ្មែរស្ដោះមិនបានមួយដង្ហើមចង្រិតផងស្លាប់ នៅល្ងាចថ្ងៃទី៣០ ខែធ្នូ ឆ្នាំ២០១៨ ក្នុងភូមិស្រះឈូក ឃុំសំបួរ ស្រុកមង្គលបូរី ខេត្តបន្ទាយមានជ័យ។
សមត្ថកិច្ចស្រុកមង្គលបូរី បានប្រាប់អ្នកយកព័ត៌មានឲ្យដឹងថា ជនរងគ្រោះមានឈ្មោះ មួក ហៀប ភេទប្រុស អាយុ៥៦ឆ្នាំ រស់នៅភូមិស្រះឈូក ឃុំសំបួរ ស្រុកមង្គលបូរី ខេត្តបន្ទាយមានជ័យ។
សមត្ថកិច្ចបានឲ្យដឹងទៀតថា នៅមុនពេលកើតហេតុនោះជនរងគ្រោះមានមុខរបរជាអ្នកចាប់ពស់ ជារៀងរាល់តែងតែដើររកចាប់ពស់យកមកលក់ នៅថ្ងៃកើតហេតុនោះ ឃើញពស់វែកដំបូកមួយក្បាល ជនរងគ្រោះក៏បានស្ទុះទៅចាប់ តែអកុសលពស់បានចឹកចំម្រាមដៃកណ្ដាលខាងឆ្វេង។ ពេលនោះ ដោយសារយល់ថា ខ្លួនជាគ្រូចាប់ពស់ ពេលពស់ចឹកមិនបានទៅពេទ្យទេ គឺគ្រាន់តែរកគ្រូខ្មែរស្ដោះ លុះនៅថ្ងៃដដែល ស្រាប់តែគ្រូល្បីប្រចាំភូមិ ក៏បានស្លាប់បាត់បង់ជីវិតបាត់ទៅ។
ក្រោយពីកើតហេតុ សព ត្រូវបានក្រុមគ្រួសារកំពុងធ្វើបុណ្យទៅតាមប្រពៃណី៕
Source: Kampuchea Thmey Daily
0 Comments