ក្រសួង​ពាណិជ្ជកម្ម​ អញ្ជើញ​ផលិតករ អ្នក​នាំ​ចេញ ទៅ​ចុះឈ្មោះ​ក្នុង​ប្រព័ន្ធ​ចុះបញ្ជី ​នាំ​ចេញ​ទំនិញ​គ្រប់​ប្រភេទ​ពី​កម្ពុជា​ទៅកាន់​សហភាព​អឺរ៉ុប​(EU)

ភ្នំពេញ​ ៖ ​ក្រសួងពាណិជ្ជកម្ម បាន​ចេញ​សេចក្ដីជូនដំណឹង និង អំពាវនាវ​ដល់​ផលិតករ ឬ​អ្នក​នាំ​ចេញ​ទាំងអស់​ដែលមាន​បំណង​នាំចេញ​ទំនិញ​គ្រប់​ប្រភេទ​ពី​ព្រះរាជាណាចក្រ​កម្ពុជា ទៅកាន់​សហ​ភាព​អឺរ៉ុប (EU) ស្ថិត​ក្រោម​គម្រោង "​ការអនុគ្រោះ​ពន្ធ​លើ​គ្រប់​មុខទំនិញ​ទាំងអស់ លើកលែង​គ្រឿង​សព្វាវុធ (EBA) ទៅ បំពេញបែបបទ​សម្រាប់​នាំចេញ​ទំនិញ​ទៅ​ក្រៅប្រទេស​។​

យោង​តាម សេចក្ដីប្រកាស​របស់​ក្រសួងពាណិជ្ជកម្ម ចេញផ្សាយ​ថ្ងៃទី​៣១​ធ្នូ​នេះ​បាន​ឲ្យ​ដឹងថា យោង​តាម​បទប្បញ្ញត្តិ​របស់​សហភាព​អឺរ៉ុប ដែល​បានធ្វើ​វិសោធនកម្ម ចុងក្រោយ ដោយ​បញ្ញត្តិ លេខ​(EU) 2017/989 ចុះ​ថ្ងៃទី​០៨ ខែ​មិថុនា ឆ្នាំ​២០១៧ និង​ដោយ​ផ្អែក​តាម​ប្រកាស អន្តរក្រសួង​លេខ ១៦២៧ សហវ​-​ប្រក ចុះ​ថ្ងៃទី​២៨ ខែធ្នូ ឆ្នាំ​២០១៨ របស់​ក្រសួង​សេដ្ឋកិច្ច និង​ហិរញ្ញវត្ថុ និង​ក្រសួង ពាណិជ្ជកម្ម ស្ដីពី​ការ​កែសម្រួល​នីតិវិធី​ក្នុងការ​បំពេញបែបបទ​នាំចេញ​ទំនិញ​ទៅ​ក្រៅប្រទេស ក្នុង​គោលបំណង សម្រួល​ពាណិជ្ជកម្ម និង​កាត់បន្ថយ​បន្ទុក​ចំណាយ​របស់​អ្នក​នាំចេញ​ក្រសួង​ពាណិជ្ជកម្ម​ សូម​អំពាវនាវ​ដល់​ផលិតករ ឬ​អ្នក​នាំចេញ​ទាំងអស់ ​ដែលមាន​បំណង​នាំចេញ​ទំនិញ​គ្រប់​ប្រភេទ​ពី​ព្រះរាជាណាចក្រ​កម្ពុជា ទៅកាន់​សហភាព​អឺរ៉ុប (EU) ស្ថិត​ក្រោម​គម្រោង "​ការ​អនុគ្រោះ​ពន្ធ​លើ​គ្រប់​មុខទំនិញ​ទាំងអស់ លើកលែង​គ្រឿង​សព្វាវុធ (EBA)* រួមទាំង ប្រព័ន្ធ​អនុគ្រោះ​ពន្ធ​ទូទៅ (GSP) របស់​ប្រទេស​ណ័រវេស​, ប្រទេស​ស្វី​ស និង​ប្រទេស​ទួរគី សូម​អញ្ជើញ​មក​ដាក់ពាក្យ សុំ​ចុះឈ្មោះ​ក្នុង​ប្រព័ន្ធ​ចុះបញ្ជី​អ្នក​នាំចេញ (Registered Exporter System • REX) របស់​សហភាព​អឺរ៉ុប នៅ នាយកដ្ឋាន​នាំចេញ​-​នាំចូល នៃ​ក្រសួងពាណិជ្ជកម្ម ដើម្បី​មាន​នីតិសម្បទា​ក្នុង​ការ​ប្រកាស​ប្រភព​ដើម (Statement on Origin) ជំនួស​ឲ្យ​ការប្រើប្រាស់​វិញ្ញាបនបត្រ​បញ្ជាក់​ប្រភព​ដើម​ទំនិញ​ទម្រង់​គេ ចាប់​ពី​ថ្ងៃទី​០១ ខែ​មករា ឆ្នាំ​២០១៩ តទៅ។​

​ក្រសួង បន្តថា -​ពាក្យស្នើសុំ​ដូច​មាន​តាម​គំរូ​ភ្ជាប់​ក្នុង​សេចក្ដីជូនដំណឹង​នេះ​ ឬ អាច​ទាញ​យក​ពី​គេហទំព័រ​របស់​ក្រសួង ពាណិជ្ជកម្ម (www.moc.gov.kh)​។ -​ដើម្បី​ទទួល​បាន​ព័ត៌មាន​លម្អិត សូម​ទំនាក់​ទំនង ​៖ ១-​ឯកឧត្ដម ហូ ស៊ីវ​យ៉ុង ទីប្រឹក្សា​ក្រសួងពាណិជ្ជកម្ម និង​ជា​ប្រធាន​នាយកដ្ឋាន​នាំចេញ​-​នាំចូល ទូរស័ព្ទ​លេខ​ ៖ ០១២ ៨៣៨ ៩០៩, សារ​អេឡិចត្រូនិក ៖ hosivyorng@yahoo.corry, ២-​លោក ស៊ី បា​ទិ​ត្យ ប្រធាន​ការិយាល័យ ​នៃ​នាយកដ្ឋាន​នាំចេញ​-​នាំចូល ទូរស័ព្ទ ៖ ០១២ ៩៤៨ ៤៨៤ សារ​អេឡិកត្រូនិកៈ sy,batith@moc.gov.kh, baithsy@yahoo.com អាស្រ័យ​ដូច​បាន​ជម្រាប​ជូន​ខាងលើ សូម​អ្នក​ឧកញ៉ា លោក​ឧកញ៉ា លោក លោកស្រី អ្នកនាង​កញ្ញា ជា​ផលិតករ អ្នក​នាំចេញ​ទាំងអស់ មេត្តា​ជ្រាប​ជា​ព័ត៌មាន និង​ចូលរួម​អនុវត្ត​ឲ្យ​មាន​ប្រសិទ្ធភាព ​ចាប់ពី​ថ្ងៃ​ទី​០១ ខែ​មករា ឆ្នាំ ២០១៩ តទៅ៕​



Source: Kampuchea Thmey Daily