ភ្នំពេញ ៖ អតីតមេដឹកនាំបក្សប្រឆាំង (CNRP) លោក កឹម សុខា ដែលកំពុងដាក់ឲ្យស្ថិតក្រោមការត្រួតពិនិត្យតាមផ្លូវតុលាការនោះ បានចេញសារមួយជូនពរប្រជាពលរដ្ឋទាំងអស់ ក្នុងពិភពលោក នាឱកាសឆ្លងឆ្នាំចាស់ (២០១៨) ឈានចូលឆ្នាំថ្មី (២០១៩) ជួបប្រទះតែសេចក្តីសុខ និងសុភមង្គលគ្រប់ៗគ្នា ជាមួយគ្នានោះ លោក កឹម សុខា ក៏បានរំលេចសារនយោបាយចំនួនពីរចំណុចផងដែរ ដែលលោកអះអាងថា ជាជម្ងឺពីរយ៉ាងដែលកំពុងរាតត្បាតក្នុងសង្គមខ្មែរ។
លោក កឹម សុខា អតីតប្រធានគណបក្សសង្គ្រោះជាតិ ត្រូវបានកម្លាំងសមត្ថកិច្ចចាប់ខ្លួននៅផ្ទះរបស់លោក ស្ថិតនៅផ្ទះលេខ៩៧ ផ្លូវ៣១៣ សង្កាត់បឹងកក់២ ខណ្ឌទួលគោក នាវេលាម៉ោង០០ និង៣៥នាទីយប់ ឈានចូលថ្ងៃទី៣ ខែកញ្ញា ឆ្នាំ២០១៧ ហើយការចាប់ខ្លួនលោក កឹម សុខា ធ្វើឡើងបន្ទាប់ពីវីដេអូមួយ ដែលលោក កឹម សុខា បាននិយាយសារភាពកាលពីថ្ងៃទី០៨ ខែធ្នូ ឆ្នាំ២០១៣ នៅប្រទេសអូស្ត្រាលីថា ខ្លួនបានធ្វើតាមបញ្ជារបស់មហាអំណាចអាមេរិក ក្នុងការរៀបចំផែនការផ្តួលរំលំរាជរដ្ឋាភិបាលកម្ពុជា ដោយយកគំរូទៅនឹងប្រទេសយូហ្គោស្លាវី និងសើប៊ីដែរ។
នៅក្នុងសារជូនពរឆ្នាំថ្មី ឆ្នាំសកល ២០១៩ លោក កឹម សុខា បានសរសេរថា “ក្នុងឱកាសឆ្លងឆ្នាំចាស់២០១៨ ឈានចូលឆ្នាំថ្មី ២០១៩នេះ ខ្ញុំសូមជូនពរដល់ប្រជាពលរដ្ឋជុំវិញពិភពលោកឲ្យជួបប្រទះនូវសេចក្តីសុខ និងសុភមង្គលគ្រប់ៗគ្នា។ ខ្ញុំសូមជូនពរជាពិសេសដល់ព្រះរាជាណាចក្រកម្ពុជា និងប្រជាពលរដ្ឋខ្មែរ ឲ្យទទួលបាននូវសុខសន្តិភាព និងវឌ្ឍនភាពតាមគោលការណ៍ប្រជាធិបតេយ្យ ដោយចាប់ផ្តើមពីការផ្សះផ្សាជាតិពិតប្រាកដ មិនយកខ្មែរណាជាសត្រូវ។ សូមឲ្យឆ្នាំថ្មីនេះ នឹងបើកនូវទំព័រប្រវត្តិសាស្ត្រថ្មីមួយ ដែលលប់បំបាត់ឲ្យអស់នូវជម្ងឺពីរយ៉ាងដែលកំពុងរាតត្បាតក្នុងសង្គមខ្មែរ៖ ទី១គឺ ការគាបសង្កត់ជិះជាន់ គម្រាមកំហែង ជាពិសេសដោយអំពើហិង្សា និងទី២ គឺការស្អប់ឈ្នានីស ជាពិសេសតាមរូបភាពលាបពណ៌ ជេរប្រមាថ និងបង្ខូចកេរ្តិ៍ឈ្មោះ”។
ជាមួយគ្នានោះ លោក កឹម សុខា សូមឲ្យទំព័រប្រវត្តិសាស្ត្រថ្មីនេះ ចាប់ផ្តើមពីមេដឹកនាំគ្រប់និន្នាការ ដើម្បីជាគំរូ ដោយបញ្ឈប់ការធ្វើនយោបាយតាមបែបអគុណធម៌ មិនថាតាមរយៈការគំរាមកំហែង ឬការមួលបង្កាច់ ហើយវិលទៅរកទសពិធរាជធម៌វិញ ដើម្បីត្រួសត្រាយផ្លូវជូនប្រជាពលរដ្ឋ ជាពិសេសកូនខ្មែរជំនាន់ក្រោយ។ ជាថ្មីម្តងទៀត លោកសូមជូនពរឲ្យឆ្នាំថ្មី២០១៩នេះ នាំមកនូវសុភមង្គល ភាពរុងរឿង យុត្តិធម៌ ភាពស្ងប់សុខ និងសេរីភាពពេញលេញបរិបូរណ៍ ដល់ខ្មែរគ្រប់រូប។
សូមបញ្ជាក់ថា លោក កឹម សុខា ត្រូវបានឃុំខ្លួនដាក់ពន្ធនាគារ កាលពីថ្ងៃទី៣ ខែកញ្ញា ឆ្នាំ២០១៧ ដោយចោទប្រកាន់ពីបទធ្វើសន្ធិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ យោងតាមក្រមព្រហ្មទណ្ឌបទធ្វើសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ ឆ្នាំដល់៣០ឆ្នាំ។ តែត្រូវបានតុលាការសម្រេចដោះលែងឲ្យនៅក្រៅឃុំបណ្តោះអាសន្ន នៅវេលាទៀបភ្លឺឈានចូលថ្ងៃទី១០ ខែកញ្ញា ឆ្នាំ២០១៨ ដោយដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
ការដោះលែងលោក កឹម សុខា ឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យតាមផ្លូវតុលាការនេះ បានភ្ជាប់នូវលក្ខខណ្ឌចាំបាច់មួយចំនួនសម្រាប់អតីតមេបក្សប្រឆាំងនេះ ដែលរួមមានដូចជា មិនអនុញ្ញាតឲ្យចេញក្រៅពីព្រំប្រទល់នៃដែនដីដែលខណ្ឌដោយផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គលឬជនបរទេសដែលពាក់ព័ន្ធនឹងសំណុំរឿង និងមិនត្រូវជួបជុំធ្វើសកម្មភាពនយោបាយជាដើម៕
Source: Kampuchea Thmey Daily
0 Comments