ភ្នំពេញ ៖ រថយន្តបែនដឹកដីមួយគ្រឿង ខណៈពេលកំពុងបើកបរទៅមុខសុខៗ បែរជាប់លេខរ៉ឺយ៉ែថយក្រោយ ដោយមិនដឹងមូលហេតុបណ្ដាលឲ្យបុកកិនរ៉ឺម៉កកង់បីនៅខាងក្រោយ រងការខូចខាតចំនួន៣គ្រឿង ពេលនោះតៃកុងបម្រុងចុះរត់ តែត្រូវបានប្រជាពលរដ្ឋឃាត់ឲ្យសមត្ថកិច្ច កាលពីវេលាម៉ោង៧និង២០យប់ ថ្ងៃទី២៧ ខែធ្នូ ឆ្នាំ០១៨ នៅតាមបណ្ដោយផ្លូវវេងស្រេង ទល់មុខមន្ទីរពេទ្យឯកជន ឯករាជ្យស្ថិតនៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ។
រថយន្ត បែនដឹកដី ម៉ាកហីយ៉ាន់ដាយ ពណ៌ស ពាក់ស្លាកលេខភ្នំពេញ 3D- 43 54 បើកបរដោយបុរសម្នាក់ បើកក្នុងទិសដៅពីលិចទៅកើត។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តបង្កខាងលើបើកបរក្នុងទិសដៅពីលិចទៅកើតដែលកំពុងកកស្ទះចរាចរណ៍ ដោយបើកសសៀរចិញ្ចើមផ្លូវ ដោយម៉ូតូ រ៉ឺម៉កកង់បីបើកពីក្រោយរថយន្ត បង្កបន្ទាប់មក ស្រាប់តែឃើញរថយន្តបង្កខាងលើ បែរជារ៉ឺយ៉ែថយក្រោយទៅវិញ ដោយមិនដឹងមូលហេតុ ហើយអ្នកបើកបរ ម៉ូតូរ៉ឺម៉កកង់បី ឃើញរថយន្តរ៉ឺយ៉ែថយក្រោយបែបនេះ បាននាំគ្នាស្ទុះលោតចេញពីរ៉ឺម៉កកង់បីបណ្ដាលឲ្យរថយន្តបង្កបានបុកកិនរ៉ឺម៉កកង់បី ខូចខាតអស់ចំនួន៣គ្រឿងជាបន្តបន្ទាប់ ចំណែកឯម៉ូតូ រ៉ឺម៉កកង់បី ដែលនៅខាងក្រោយគេបង្អស់ បណ្ដាលឲ្យដាច់កង់ម្ខាងផ្នែកខាងស្ដាំ ប៉ុន្តែ មិនមានអ្នករងរបួសឡើយ។
ប្រភពព័ត៌មានបានបន្តទៀតថា ខណៈពេលភ្លាមៗនោះ អ្នកបើកបររថយន្តបែនដឹកដី បានព្យាយាមបម្រុងចុះរត់ តែត្រូវបានប្រជាពលរដ្ឋ ឃាត់បានហើយ ប្រគល់ឲ្យសមត្ថកិច្ច នគរបាលប៉ុស្តិ៍ ភ្លាមៗផងដែរ។ ពេលនោះនគរបាលប៉ុស្តិ៍ចោមចៅទី១ បានទាក់ទងទៅជំនាញចរាចរណ៍ខណ្ឌពោធិ៍សែនជ័យ តែខណៈជំនាញចរាចរណ៍ខណ្ឌពោធិ៍សែនជ័យមកដល់ ភាគីខាងរ៉ឺម៉កកង់បី និងភាគីខាងរថយន្ត ដោយមិនពឹងជំនាញចរាចរណ៍ឡើង ដោយសុំដោះស្រាយខ្លួនឯង បន្ទាប់មក ជំនាញចរាចរណ៍ខណ្ឌពោធិ៍សែនជ័យ បានត្រឡប់វិញភ្លាមៗផងដែរ៕
Source: Kampuchea Thmey Daily
0 Comments