ភ្នំពេញ ៖ យោងតាមរបាយការណ៍ពីនាយកដ្ឋាន ចរាចរណ៍ និងសណ្ដាប់ធ្នាប់ សាធារណៈ នៃអគ្គស្នងការដ្ឋាននគរបាលជាតិប្រាប់ថា កាលពីថ្ងៃទី៥ ខែធ្នូ ឆ្នាំ២០១៨ មានហេតុការណ៍គ្រោះថ្នាក់ចរាចរណ៍ នៅទូទាំងប្រទេសកើតឡើង ចំនួន១០លើក ( យប់៤លើក ) ពុំមានមនុស្សស្លាប់នោះទេ ប៉ុន្តែរងរបួសធ្ងន់១៤នាក់ ( ស្រី២នាក់ ) និងរងរបួសស្រាល៦នាក់ ( ប្រុស ) ក្នុងនោះគ្រោះថ្នាក់ចរាចរណ៍ ដោយមិនបានពាក់មួកសុវត្ថិភាព៩នាក់ ( យប់១នាក់ )។
នៅក្នុងករណីគ្រោះថ្នាក់ចរាចរណ៍ទាំង១០លើកនេះ បានបណ្ដាលឲ្យមានការខូចខាតយានយន្តសរុប២១គ្រឿង ក្នុងនោះមាន ម៉ូតូចំនួន១៣គ្រឿង រថយន្តធុនតូច ចំនួន៣គ្រឿង និងរថយន្តធុនធំ ចំនួន៥គ្រឿង។
របាយការណ៍ខាងលើប្រាប់បន្តថា មូលហេតុដែលបណ្ដាលឲ្យកើតមានហេតុការណ៍គ្រោះថ្នាក់ចរាចរណ៍ គឺបណ្តាលមកពី មិនគោរពសិទ្ធិ៣លើក , មិនប្រកាន់ស្តាំ២លើក , បត់គ្រោះថ្នាក់៤លើក , និង ងងុយដេក១លើក។
គ្រោះថ្នាក់នៅលើដងផ្លូវ រួមមាន ផ្លូវជាតិ ចំនួន៦លើក និងផ្លូវខេត្ត ចំនួន៤លើក។ ដោយឡែកយានយន្តដែលបង្កហេតុ រួមមាន ម៉ូតូចំនួន៥លើក រថយន្តធុនតូច ចំនួន៣លើក និងរថយន្តធុនធំ ចំនួន២លើក។ រាជធានី ខេត្ត ដែលមានគ្រោះថ្នាក់ និងរងគ្រោះថ្នាក់ រួមមាន ភ្នំពេញ២លើក របួស៤នាក់ ខេត្តបាត់ដំបង២លើក របួស៣នាក់ ខេត្តកំពត១លើក របួស៣នាក់ និងខេត្តព្រះសីហនុ១លើក របួស ២នាក់។
យោងតាមរបាយការណ៍ពីនាយកដ្ឋាន ចរាចរណ៍ និងសណ្ដាប់ធ្នាប់ សាធារណៈ នៃអគ្គស្នងការដ្ឋាននគរបាលជាតិប្រាប់បញ្ជាក់ឲ្យដឹងថា គ្រោះថ្នាក់ចរាចរណ៍ រយៈពេល៥ថ្ងៃ គិតចាប់ពីថ្ងៃទី១ ដល់ថ្ងៃទី៥ ខែធ្នូ ឆ្នាំ២០១៨ កើតឡើង៥៨លើក បណ្ដាលឲ្យមនុស្សស្លាប់២៣នាក់ របួសសរុប៨០នាក់ ក្នុងនោះរបួសធ្ងន់៥៤នាក់ និងរងរបួសស្រាល២៦នាក់៕
Source: Kampuchea Thmey Daily
0 Comments