ភ្នំពេញ ៖ បុរស២នាក់ដែលងប់ងុលនឹងថ្នាំញៀន ត្រូវបានសមត្ថកិច្ចឃាត់ចាប់ខ្លួននៅតាមផ្លូវ ខណៈពួកគេកំពុងធ្វើដំណើរត្រឡប់មកពីទិញថ្នាំញៀនយកទៅប្រើប្រាស់ ក្នុងសង្កាត់ភ្នំពេញថ្មី ខណ្ឌសែនសុខ កាលពីយប់ថ្ងៃទី០៥ ខែធ្នូ ឆ្នាំ២០១៨។
ប៉ូលិសបានឲ្យដឹងថា ជនសង្ស័យខាងលើ ១.ឈ្មោះខា ខុម ហៅចយ អាយុ២៧ឆ្នាំ គ្មានមុខរបរ ស្នាក់នៅផ្ទះជួលភូមិត្រពាំងស្វាយ សង្កាត់គោកឃ្លាង។ ២.ឈ្មោះ គី សំណាង ហៅណាង អាយុ២៣ឆ្នាំ មានទីលំនៅផ្ទះជួលនៅភូមិក្រាំងអង្ក្រង សង្កាត់ក្រាំងធ្នង់។
ប្រភពព័ត៌មានពីសមត្ថកិច្ចបានឲ្យដឹងថា កាលពីវេលាម៉ោង២២ ថ្ងៃទី០៥ធ្នូ កម្លាំងសមត្ថកិច្ចចម្រុះរបស់គណៈបញ្ជាការខណ្ឌសែនសុខ បានដាក់គោលដៅចល័តតាមផ្លូវសាធារណៈឆែកឆេរអាវុធជាតិផ្ទុះដើម្បីទប់ស្កាត់ និងរក្សានូវសន្តិសុខជូនប្រជាជនក្នុងមូលដ្ឋាន។ លុះបន្តិចក្រោយមក ក៏បានប្រទះឃើញបុរសទាំង២នាក់ ជិះម៉ូតូ១គ្រឿង ម៉ាកហុងដាសេ១២៥ ស៊េរីឆ្នាំ២០១២ ពាក់ស្លាកលេខ1L 9611 មកចំគោលដៅឆែកឆេរ ពួកគេព្យាយាមគេចខ្លួន ប៉ុន្តែគេចមិនរួច។
ក្នុងនោះដែរ សមត្ថកិច្ចឆែកឆេររកឃើញថ្នាំញៀនចំនួន២កញ្ចប់តូចៗ នៅក្នុងហោប៉ៅខោរបស់ជនឈ្មោះ ខា ខុម ហៅចយ ទើបសមត្ថកិច្ចឃាត់ខ្លួនពួកគេទាំង២នាក់យកទៅសួរនាំបន្ត។
សមត្ថកិច្ចបានបញ្ជាក់ថា នៅពេលឃាត់ខ្លួននោះ លោកបានត្រួតពិនិត្យទឹកនោមពួកគេរកឃើញមានផ្ទុកនូវសារធាតុញៀនទាំងអស់គ្នា ហើយពួកគេបានសារភាពថា ថ្នាំញៀនទាំងនេះពួកគេបានទិញយកមកសម្រាប់ប្រើប្រាស់ផ្ទាល់ខ្លួន មិនមែនយកទៅជួញដូរទេ។ ទោះបីយ៉ាងណាក៏ពួកគេនៅតែមានទោសពីបទសេព ឬប្រើប្រាស់ថ្នាំញៀនដោយខុសច្បាប់ដែរ៕
Source: Kampuchea Thmey Daily
0 Comments