ភ្នំពេញ ៖ សៀវភៅពីរក្បាលរបស់ប្រទេសចិន គឺសៀវភៅនិយាយពីអភិបាលកិច្ចសកល និងការស្តារវប្បធម៌ឡើងវិញរបស់ចិន ដែលត្រូវបានបោះពុម្ពជាភាសាខ្មែរ និងចែកចាយផ្សព្វផ្សាយនៅក្នុងប្រទេសកម្ពុជា បានបង្ហាញអំពីអត្ថន័យជ្រាលជ្រៅ នៃកិច្ចសហប្រតិបត្តិការ «ផ្លូវមួយ ខ្សែក្រវាត់មួយ»។
សៀវភៅ «ជម្រើសប្រវត្តិសាស្ត្ររបស់ប្រទេសចិនក្នុងអភិបាលកិច្ចសាកល» មាន ២៨១ទំព័រនិពន្ធដោយ លោក ហ៊ើ យ៉ាហ្វី អតីតអនុរដ្ឋមន្ត្រីក្រសួងការបរទេស និងជាអនុប្រធានការិយាល័យកិច្ចការចិនក្រៅប្រទេសរបស់ក្រុមប្រឹក្សារដ្ឋ។
លោក ជា អ្នកស្រាវជ្រាវជាន់ខ្ពស់ នៃវិទ្យាស្ថានស្រាវជ្រាវសេដ្ឋកិច្ច ហិរញ្ញវត្ថុ នៃសាកលវិទ្យាល័យរ៉េនីន ប្រទេសចិន។ ចំណែក មជ្ឈមណ្ឌលកម្ពុជាសម្រាប់ស្រាវជ្រាវផ្លូវសូត្រសមុទ្រសតវត្សទី២១ ទទួលបន្ទុកបកប្រែ ជាភាសាខ្មែរ ខណៈក្រុមហ៊ុនពិគ្រោះយោបល់ RDCYThinkTank និងសារព័ត៌មានជានហ្វា (JianHuaDaily) ជាអ្នកបោះពុម្ពផ្សាយ។
រីឯសៀវភៅ «ការស្តារវប្បធម៌ឡើងវិញ» និពន្ធដោយ លោក ជីង យានកូជា អ្នកនិពន្ធចិន មាន ២៦០ទំព័រ បានត្រូវបោះពុម្ពផ្សាយដោយសារព័ត៌មាន ជាន ហ្វា និងទទួលបន្ទុកបកប្រែដោយមជ្ឈមណ្ឌលកម្ពុជាសម្រាប់ស្រាវជ្រាវ ផ្លូវសូត្រសមុទ្រសតវត្សទី២១។
អ្នកនិពន្ធសៀវភៅ «ជម្រើសប្រវត្តិសាស្ត្ររបស់ប្រទេសចិន ក្នុងអភិបាលកិច្ចសាកល» បានលើកឡើងថា អភិបាលកិច្ចថ្នាក់ជាតិ និងប្រព័ន្ធអភិបាលកិច្ចល្អមានសារៈសំខាន់ណាស់ សម្រាប់ប្រទេសជាតិ។ អភិបាលកិច្ចល្អនៅថ្នាក់សាកល ក៏ទាមទារឲ្យមានអភិបាលកិច្ចល្អដែរ។ អភិបាលកិច្ចសាកលនិយាយពីរបៀបគ្រប់គ្រង និងបង្កើតវិធានច្បាប់សម្រាប់ពិភពលោក ដែលយើងរស់នៅ។
អភិបាលកិច្ចសកលរួមមាន អង្គការអន្តរជាតិគ្រប់ប្រភេទ សន្ធិសញ្ញា កិច្ចព្រមព្រៀងទ្វេភាគី និងពហុភាគី បទដ្ឋាន និងច្បាប់អន្តរជាតិ សម្រាប់ការអនុវត្តន៍ជាអន្តរជាតិ ដែលត្រូវបានទទួលស្គាល់ជាសាកល ដែលធាតុទាំងអស់នេះបង្កើតបានជាប្រព័ន្ធអភិបាលកិច្ចសកល។
ប្រទេសចិន ដែលមានសេដ្ឋកិច្ចធំ និងបើកចំហ និងជាប្រទេសមហាអំណាច ពិភពលោកមួយ គឺជាអ្នកចូលរួម និងជាតួអង្គសំខាន់នៅក្នុងប្រព័ន្ធនេះ។ នៅពេលដែល ប្រទេសចិនបានធ្វើដំណើរទៅដល់ពាក់កណ្ដាលពិភពលោក ចិន ត្រូវផ្ដោតការយកចិត្តទុកដាក់ កាន់តែខ្លាំងថែមទៀតទៅលើអភិបាលកិច្ចសកល និងបញ្ហានានា ដែលជាប់ទាក់ទង។
គួរជម្រាបថា នៅក្នុងសៀវភៅ «ជម្រើសប្រវត្តិសាស្ត្ររបស់ប្រទេសចិនក្នុងអភិបាលកិច្ច សកល» មាន៨ជំពូក ដែលនិយាយពីប្រវត្តិ , ស្ថានភាព បច្ចុប្បន្ន , ឫសគល់ វប្បធម៌ , ឱកាស និងបញ្ហាប្រឈម និងប្រវត្តិ នៃការចូលរួមរបស់ប្រទេសចិន នៃអភិបាលកិច្ចសកល ព្រមទាំងការស្តារឡើងវិញ អភិបាលកិច្ចក្នុងតំបន់ ទំនាក់ទំនងចិន-អាមេរិក អភិបាលកិច្ចសកល និងសណ្ដាប់ធ្នាប់អន្តរជាតិថ្មី។
លោក ជីង យានកូ អ្នកនិពន្ធសៀវភៅ «ការស្តារវប្បធម៌ឡើងវិញ» បាននិយាយថា « ការស្តារវប្បធម៌ឡើងវិញ គឺជាសុបិនចិន»។ ទស្សនាទានសុបិនចិនឆ្លុះបញ្ចាំងពីបញ្ហាចម្បងៗ នៃនយោបាយ ទស្សនវិជ្ជា វប្បធម៌ និងសង្គមចិន។ សុបិនចិនជានិមិត្តរូប នៃការចងចាំរួម របស់ប្រជាជាតិ និងជាការពណ៌នាគ្រប់ជ្រុងជ្រោយអំពីប្រវត្តិសាស្ត្រចិន ជាពិសេសប្រវត្តិសាស្ត្រសម័យទំនើបស្តីពី ការរងគ្រោះ និងការរំដោះជាតិ។ សុបិនចិនបង្ហាញពីរបៀបរស់នៅ ជីវិត ពិតពិត ការអភិវឌ្ឍន៍ និងការផ្លាស់ប្ដូរសង្គម។
សៀវភៅនេះបានឲ្យដឹងថា ដោយសារសុបិនចិន ជាគោលដៅ នៃការអភិវឌ្ឍន៍របស់ប្រទេសចិន ឯកភាពជាតិ ឱកាស សម្រាប់ ពេលអនាគត និងជាផែនការមេថ្មីមួយ ស្ដីពីផ្លូវឆ្ពោះទៅមុខរបស់ប្រទេសចិន សុបិនចិន គឺជាការបង្ហាញនូវរូបភាពពេញលេញគ្រប់ជ្រុងជ្រោយ នៃ គំនិត ស្មារតី និងគតិបណ្ឌិតរបស់ចិន ដោយគ្របដណ្ដប់លើអារ្យធម៌ សេដ្ឋកិច្ចនយោបាយ វប្បធម៌ សង្គម និង បរិស្ថាន នាពេលបច្ចុប្បន្ន។
ចំណែកសៀវភៅ «ការស្តារវប្បធម៌ឡើងវិញ» មាន១២ជំពូក ដែលនិយាយពីគោលដៅ ដ៏មានសារៈសំខាន់របស់ចិន ក្នុងសតវត្សថ្មីនេះ គឺដំណើរកើតឡើងវិញ នៃវប្បធម៌ចិន វប្បធម៌ជាចំណុចស្នូល នៃគម្រោងជាតិ ដំណើរកើតឡើងវិញ នៃវប្បធម៌ និងរូបភាពអន្តរជាតិ នៃវប្បធម៌ចិន ស្មារតីវប្បធម៌ នៃលទ្ធិខុងជឺ វប្បធម៌ចិនបុរាណ និងការរីកចម្រើនឡើងវិញ នៃវប្បធម៌៕
Source: Kampuchea Thmey Daily
0 Comments