ភ្នំពេញ ៖ បន្ទាប់ពីលួចម៉ូតូគេបានហើយព្យាយាមរត់គេចខ្លួនបានប្រហែល១០ថ្ងៃក្រោយ ក៏ជនសង្ស័យម្នាក់ ត្រូវបានកម្លាំងប៉ុស្តិ៍នគរបាលរដ្ឋបាលផ្សារថ្មីទី៣ នៃអធិការដ្ឋាននគរបាលខណ្ឌដូនពេញឃាត់ខ្លួនបាន កាលពីវេលាម៉ោង១១ព្រឹកថ្ងៃព្រហស្បតិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៧ ខែធ្នូ ឆ្នាំ២០១៨ នៅចំណុចមុខផ្ទះលេខ១៧អឺ០ ផ្លូវលេខ៥១ ភូមិ១៣ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ក្រោយធ្វើសកម្មភាពកាលពីថ្ងៃទី០៧ ខែធ្នូ ឆ្នាំ២០១៨ វេលាម៉ោង២និង១៧នាទីរសៀល។
សមត្ថកិច្ចបានឲ្យដឹងថា ជនសង្ស័យ ឈ្មោះ សុក ពិសិដ្ឋ ភេទប្រុស អាយុ៣២ឆ្នាំ ជនជាតិខ្មែរមុខរបរនិងទីលំនៅមិនពិតប្រាកដ។ ចំណែកជនរងគ្រោះជាម្ចាស់ម៉ូតូ ឈ្មោះ ប៊ូ ច័ន្ទសឿន ភេទប្រុស អាយុ៤៩ឆ្នាំ ជនជាតិខ្មែរមុខរបរនិស្សិតស្នាក់នៅផ្ទះលេខ១៧អឺ០ ផ្លូវលេខ៥១ ភូមិទី១៣សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។ រីឯវត្ថុតាងចាប់យកម៉ូតូមួយគ្រឿងម៉ាក HONDA DREAM125 ពណ៌ខ្មៅ ស៊េរី2014 ពាក់ស្លាកលេខ ភ្នំពេញ 1CM-9108 លេខតួ និងលេខម៉ាស៊ីន9165351(ប្រគល់ឲ្យជនរងគ្រោះយកទៅប្រើប្រាស់ជាបណ្ដោះអាសន្ន) កាបូបស្ពាយ(សាកាដូ) ពណ៌ខ្មៅមួយ ទូរស័ព្ទដៃម៉ាកIPHONE5 ពណ៌ទឹកប្រាក់មួយ និងខោអាវមួយចំនួន។
សមត្ថកិច្ចបានឲ្យដឹងទៀតថា នៅថ្ងៃកើតហេតុវេលាម៉ោង១រសៀល ជនរងគ្រោះ បានជិះម៉ូតូម៉ាក HONDA DREAM125 ពណ៌ខ្មៅ ស៊េរី២០១៤ ពាក់ស្លាក លេខ ភ្នំពេញ 1CM-9108 មកចតទុកមុខផ្ទះ រួចក៏ឡើងទៅធ្វើការងារផ្ទះដូចធម្មតា រហូតដល់វេលាម៉ោង២និង៥០នាទីរសៀលថ្ងៃដដែល ជនរងគ្រោះបានចុះមកយកម៉ូតូ ស្រាប់តែបាត់ម៉ូតូរកមិនឃើញក្រោយមកជនរងគ្រោះបានបើកកាមេរ៉ាសុវត្ថិភាពមើល ក៏ឃើញជនសង្ស័យ បានធ្វើសកម្មភាពលួចយកម៉ូតូជិះគេចខ្លួនបាត់ ទើបជនរងគ្រោះបានមករាយការណ៍ និងដាក់ពាក្យបណ្ដឹងនៅទីស្នាក់ការប៉ុស្តិ៍នគរបាលរដ្ឋបាលផ្សារថ្មីទី៣។
ក្រោយ ទទួលបានពាក្យបណ្ដឹង កម្លាំងនគរបាលប៉ុស្តិ៍ផ្សារថ្មីទី៣ នៃអធិការដ្ឋាននគរបាលខណ្ឌដូនពេញ សហការជាមួយជនរងគ្រោះធ្វើការស្រាវជ្រាវ លុះរហូតដល់ថ្ងៃទី២៧ ខែធ្នូ ឆ្នាំ២០១៨ វេលាម៉ោង១១ព្រឹក ក៏បានឃើញជនសង្ស័យកំពុងជិះម៉ូតូ ដែលលួចបាននៅចំណុចភ្លើងស្តុបផ្សារដើមគ សង្កាត់ផ្សារដើមគ ខណ្ឌទួលគោក ទើបធ្វើការឃាត់ខ្លួនជនសង្ស័យ រួមនឹងវត្ថុតាងម៉ូតូ នាំមកប៉ុស្តិ៍នគរបាលរដ្ឋបាលផ្សារថ្មីទី៣ ដើម្បីធ្វើការសាកសួរ៕
Source: Kampuchea Thmey Daily
0 Comments