បន្ទាយមានជ័យ ៖ បុរសម្នាក់ចិត្តខ្លាំងម៉ែនគ្រាន់គេថា កាំបិតកាន់និងដៃនេះមុត ឬអត់ ខឹងទៅចាក់ជនរងគ្រោះឲ្យរបួសធ្ងន់ ត្រូវបានកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានធ្វើការបង្ក្រាបបាននៅវេលាម៉ោង៥ល្ងាច ថ្ងៃទី២៨ ខែធ្នូ ឆ្នាំ២០១៨ នៅចំណុចបរិវេណកាស៊ីណូផ្កាយប្រាំ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
លោកវរសេនីយ៍ត្រី នួន នីណារ៉ូ បានប្រាប់អ្នកយកព័ត៌មានឲ្យដឹងថា នៅមុនពេលកើតហេតុជនសង្ស័យឈ្មោះ អេន តាំងហេង ភេទ ប្រុស អាយុ ១៨ឆ្នាំ ស្នាក់នៅបណ្តោះអាសន្ននៅអាគារហ្គ្រោនចុងស្រល់ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យនៅវេលាម៉ោង ៣ល្ងាច ខ្លួន និងមិត្តរួមការងារបានទៅអង្គុយផឹកស៊ីនៅលើវាលស្មៅ និងបរិវេណកាស៊ីណូផ្កាយប្រាំ លុះដល់វេលាម៉ោង ៥ល្ងាចជនសង្ស័យ ដើរលេងក្នុងបរិវេណកាស៊ីណូ និងមានកាន់កូនកាំបិតនៅនឹងដៃ ពេលនោះបានជួបជនរងគ្រោះឈ្មោះគៀនគា ប្រុស អាយុ១៨ឆ្នាំរស់ ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យបានដើរមកដល់បាននិយាយចំអតថា កាំបិតនេះកាប់មុត ឬអត់ ជនសង្ស័យក៏តបថា បើចង់ដឹងមុតឬមិនមុតទាល់តែសាកមើលទើបដឹង និយាយរួចជនសង្ស័យ បានដើរសំដៅមករកខ្លួនហើយយកកាំបិតចាក់លលេងឆ្វេងស្តាំបណ្តើរនិយាយឡកឡឺយគ្នាទៅវិញទៅមកដោយមានទំនាស់គ្នាកន្លងមកផងក៏ចាក់ទៅលើជនរងគ្រោះមួយទំហឹងតែម្តង បណ្តាលឲ្យរងរបួសយ៉ាងធ្ងន់ធ្ងរដោយឃើញមានឈាមហូរច្រើនពេក ខ្លួនក៏ងើបរត់ទៅរកពេទ្យតែម្តង ស្របពេលនោះកម្លាំងអាវុធហត្ថចុះល្បាតរក្សាសុវត្ថិភាព សន្តិសុខ សណ្តាប់ធ្នាប់ក្នុងភូមិសាស្ត្រក្រុង លុះដល់ចំណុចបរិវេណកាស៊ីណូផ្កាយប្រាំក៏បានឃាត់ខ្លួនតែម្តង បន្ទាប់មកជនសង្ស័យបានបញ្ជូនមកទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្ត។
ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ បានចាត់តាំងមន្ត្រីជំនាញ លោកបានឲ្យកម្លាំងជំនាញធ្វើការសាកសួរ ជនសង្ស័យបានសារភាពថា ខ្លួនពិតជាបានចាក់ទៅលើជនរងគ្រោះពិតប្រាកដព្រោះខ្លួនធ្លាប់មានទំនាស់ពាក្យសម្តីជាមួយជនរងគ្រោះច្រើនដងមកហើយ។ ផ្អែកលើចម្លើយសារភាពរបស់ជនសង្ស័យកម្លាំងជំនាញបានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់៕
Source: Kampuchea Thmey Daily
0 Comments