សម្ដេច ស ខេង ៖ សារគំរាមប្ដឹងរបស់លោក សម រង្ស៊ី ដើម្បីឲ្យអន្តរជាតិដាក់សម្ពាធមកកម្ពុជានេះ មិនមែនជាលើកដំបូងនោះទេ

ភ្នំពេញ ៖ នៅក្នុងឱកាសចូលរួមបិទសិក្ខាសាលាជាតិស្ដីអំពីការរៀបចំផែនការសកម្មភាព និងថវិកាឆ្នាំ២០១៩ នៃគណៈកម្មាធិការជាតិ សម្រាប់ការអភិវឌ្ឍន៍ តាមបែបប្រជាធិបតេយ្យ នៅថ្នាក់ក្រោមជាតិ (គ.ជ.អ.ប) នៅរសៀលថ្ងៃទី២៧ ខែធ្នូ ឆ្នាំ២០១៨ សម្ដេច ស ខេង បានថ្លែងថា សារគំរាមប្តឹងរបស់អតីតមេបក្សប្រឆាំង លោក សម រង្ស៊ី ដើម្បីឲ្យអន្តរជាតិដាក់សម្ពាធមកកម្ពុជានេះ មិនមែនជាលើកដំបូងនោះទេ គឺមានច្រើនលើកមកហើយ។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែងបន្តថា សម្ដេចមិនចាប់អារម្មណ៍ចំពោះពាក្យបណ្ដឹងរបស់ លោក សម រង្សី ដែលប្ដឹងទៅសហភាពអឺរ៉ុប(EU) ឲ្យដាក់ទណ្ឌកម្មកាន់តែខ្លាំងឡើង មកលើរាជរដ្ឋាភិបាលកម្ពុជា ព្រោះ លោក សម រង្ស៊ី មិនដែលធ្វើអ្វីដើម្បីផលប្រយោជន៍ជាតិទេ គឺគិតតែពីការរកវិធីសាស្ត្រមកបំផ្លាញកម្ពុជាប៉ុណ្ណោះ។

សម្ដេចក្រឡាហោមបានគូសបញ្ជាក់បន្តថា បច្ចុប្បន្ននេះ ទាំងរាជរដ្ឋាភិបាល និងគ្រប់ភាគីពាក់ព័ន្ធបាននិងកំពុងគិតគូររកវិធានការណ៍ដើម្បីឲ្យជាតិមានសុខសន្តិភាព ការអភិវឌ្ឍន៍តែប៉ុណ្ណោះ ដើម្បីបម្រើពលរដ្ឋអំពីសេវាសាធារណៈ និងខិតខំពង្រឹងលទ្ធិប្រជាធិបតេយ្យ។ រដ្ឋមន្ត្រីក្រសួងមហាផ្ទៃបានបញ្ជាក់បន្ថែមថា សម្ដេចមិនចាប់អារម្មណ៍លើ លោក សម រង្ស៊ី ទេ។

គួររំលឹកថា កាលពីថ្ងៃទី២៦ធ្នូ លោក សម រង្ស៊ី បានបង្ហោះក្នុងហ្វេសប៊ុករបស់លោកថា “បានដាក់ពាក្យបណ្ដឹងទៅសហភាពអឺរ៉ុបឲ្យដាក់ទណ្ឌកម្មកាន់តែខ្លាំង និងកាន់តែឆាប់ មកលើរបប សម្ដេច ហ៊ុន សែន បើអាជ្ញាធរស្រុកខ្មែរនៅតែគំរាមកំហែង មន្ត្រីជាប់ឆ្នោត និងសកម្មជនគណបក្សសង្គ្រោះជាតិ មិនឲ្យបង្ហោះវីដេអូ ដែលក្នុងនោះ មន្ត្រីជាប់ឆ្នោត និងសកម្មជនទាំងនោះ គាំទ្រ លោក សម រង្ស៊ី ជាប្រធានស្តីទីគណបក្សសង្គ្រោះជាតិ និងគាំទ្រពាក្យស្លោក សម រង្ស៊ី និង កឹម សុខា ជាមនុស្សតែមួយ”៕