ភ្នំពេញ ៖ បន្ទាប់ពីជោគជ័យផ្ទួនៗ និង ទទួលបានការគាំទ្រយ៉ាងខ្លាំងសម្បើមពីទស្សនិកជននៅខេត្តកំពង់ស្ពឺ និងខេត្តព្រះសីហនុកាលពីចុងសប្ដាហ៍២ដងកន្លងទៅជាមួយការប្រគំតន្ត្រីបែប រ៉កឥឡូវនេះតន្ត្រីស្រាបៀរកម្ពុជា Rock the Nation នឹងមករ៉កនៅទឹកដីកោះពេជ្រជាមួយឈ្មោះដ៏ឡូយគឺ “Rock the New Year Countdown!”អោយសមជាមួយរាត្រីដ៏សប្បាយរីករាយដែលយុវវ័យជាច្រើនកំពុងទន្ទឹងរង់ចាំ ស្រែកហ៊ោកញ្ជ្រៀវអបអរសាទរឆ្លងឆ្នាំថ្មី ២០១៨ ចូល ២០១៩។
បើតាមការបញ្ជាក់ឲ្យដឹងពីលោកលាង ម៉េង អគ្គនាយកក្រុមហ៊ុន ខ្មែរ ប៊ែវើរីជិស បានអោយដឹងថា តារាចម្រៀង ដែលនឹងត្រូវមកលោតទន្ទ្រាំឆាកតន្ត្រីដ៏ស្រស់ស្អាតគ្មានពីរនេះ គឺរួមមានទាំងតារាចម្រៀង Original ក្មេងខ្មែរ ឡូរ៉ា ម៉ម ក្រុមតូចSmall World Small Band ក្រុម Mustache Band តារាចម្រៀងពីផលិតកម្មផ្សេងៗរួមមាន ៖ កញ្ញា ឱក សុគន្ធកញ្ញា, លោកខេមរៈ សេរីមន្ត ,ហ្សូណូ , ទេព បូព្រឹក្ស, កែវ សុបញ្ញា ,កញ្ញា រ៉ាប៊ី អ្នកលេងភ្លេងដ៏ល្បីកញ្ញាឌីជេ អាវីដា និង តារាកិត្តិយសមួយចំនួនទៀត”។
លោកលាង ម៉េង បន្តទៀតថា “ការប្រគំតន្ត្រីនេះ នឹងបើកអោយទស្សនិកជនចូលរួមទស្សនាដោយសេរីចាប់ពីថ្ងៃទី៣០ ខែធ្នូ ឆ្នាំ២០១៨តទៅ ហើយក៏មានការចាក់ផ្សាយបន្តផ្ទាល់ផងដែរ នៅលើកញ្ចក់ទូរទស្សន៍បាយ័នព័ត៌មានចាប់ពីម៉ោង៨ល្ងាចតទៅនៅរាត្រីឆ្លងឆ្នាំថ្ងៃទី៣១ ខែធ្នូ ឆ្នាំ២០១៨រហូតដល់ពាក់កណ្តាលអធ្រាត្រឯណោះ។”
លោកអគ្គនាយកក៏បានបង្ហើបពីគោលបំណងនៃការប្រគំតន្ត្រីនេះផងដែរថា “យើងរៀបចំកម្មវិធីនេះ គឺដើម្បីចូលរួមអបអរសាទរចូលឆ្នាំថ្មីឆ្នាំសកល ២០១៨ ចូល២០១៩ជាមួយយុវវ័យ ក៏ដូចជាប្រជាជនកម្ពុជាទាំងមូល នឹងផ្តល់ភាពសប្បាយរីករាយដល់ពួកគេទាំងអស់គ្នា ហើយក៏ឆ្លៀតឱកាសថ្លែងអំណរគុណដល់ប្រជាជនកម្ពុជាទាំងអស់គ្នា ដែលបានគាំទ្រផលិតផលភេសជ្ជៈក្រុមហ៊ុន ខ្មែរ ប៊ែវើរីជិស កន្លងមកផងដែរ។”
លោកលាង ម៉េង បញ្ចប់ការសម្ភាសន៍របស់លោកដោយ “សូមគោរពអញ្ជើញយុវជន យុវវ័យ និង បងប្អូនប្រជាជនកម្ពុជាទាំងនៅរាជធានីភ្នំពេញ និងទូទាំងប្រទេសចូលរួមទស្សនាផ្ទាល់ ឬ នៅលើកញ្ចក់ទូរទស្សន៍ ដើម្បីទទួលយកភាពសប្បាយរីករាយទាំងអស់គ្នា និង សូមជូនពរឆ្នាំថ្មី រកទទួលទានមានបានគ្រប់ក្រុមគ្រួសារ!។
ដោយឡែកលោក ម៉ៃឃើល សុវណ្ណ (Michael Sovann) ប្រធានផ្នែករៀបចំកម្មវិធី នៃក្រុមហ៊ុន ខ្មែរ ប៊ែវើរីជិស បានអោយដឹងលម្អិតថា “ចង្វាក់ភ្លេង និងបទចម្រៀង ដែលត្រូវយកមកសម្ដែងនៅក្នុងកម្មវិធីនេះ គឺនឹងមានលក្ខណៈចម្រុះបែបទាន់សម័យ ទាំងចង្វាក់រ៉ក ចង្វាក់ប្រជាប្រិយបែបមនោសញ្ចេតនា និង បទភ្លេងកន្ត្រាក់អារម្មណ៍បែបក្នុងក្លឹបកម្សាន្ត ហើយក៏នឹងមានការបាញ់កាំជ្រួចអបអរសាទរនៅពាក់កណ្ដាលអធ្រាត្រឆ្លងចូលឆ្នាំ ២០១៩ ផងដែរ។ លោកជឿជាក់ថា “ការប្រគំតន្ត្រីនេះ នឹងជារាត្រីដ៏សប្បាយរីករាយគ្មានពីរ ដូច្នេះសូមទស្សនិកជនកុំភ្លេចចូលរួមទស្សនាផ្ទាល់នៅមុខបរិវេណកោះពេជ្រ។”
សូមបញ្ជាក់ថា ខ្មែរ ប៊ែវើរីជីស (Khmer Beverages)ជាក្រុមហ៊ុនវិនិយោគដោយកូនខ្មែរ១០០ភាគរយ ហើយក៏ជាក្រុមហ៊ុនបុត្រសម្ព័ន្ធក្រុមហ៊ុន ជីប ម៉ុង ដោយផលិតស្រាបៀរកម្ពុជា ស្រាបៀរអ៊ិចស្ត្រាស្តោត Barrley Black ស្រាបៀរគូដូ (Kudo) ទឹកក្រូច អាយស៍ (IZE) ទឹកផ្លែឈើជូប (Joop) ភេសជ្ជៈប៉ូវកម្លាំងវើក (Wurkz) និងទឹកសុទ្ធកម្ពុជា (Cambodia Water)៕
Source: Kampuchea Thmey Daily
0 Comments