រតនគិរី ៖ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានចុះបង្ក្រាបករណីជួញដូរ និងប្រើប្រាស់ដោយខុសច្បាប់នូវសារធាតុញៀន(វិធីញុះញង់)ឈានទៅឃាត់ខ្លួនជនសង្ស័យម្នាក់។
ករណីឃាត់ខ្លួនជនសង្ស័យខាងលើនេះ ធ្វើឡើងកាលពីវេលាម៉ោង៤និង២០នាទីល្ងាច ថ្ងៃព្រហស្បតិ៍ ៥រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងនៅថ្ងៃទី២៧ ខែធ្នូ ឆ្នាំ២០១៨ ត្រង់ចំណុចតូបឥស្លាមលក់សាច់គោ ក្នុងផ្សារក្រុងបានលុង ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង។
បើតាមការឲ្យដឹងពីមន្ត្រីនគរបាលគ្រឿងញៀនបានឲ្យដឹងថា ក្នុងនោះដោយមានការបញ្ជាផ្ទាល់ពីលោកឧត្ដមសេនីយ៍ត្រី វ៉ាន់ សង្វាត់ ស្នងការរងផែនការងារប្រឆាំងបទល្មើសសេដ្ឋកិច្ចខេត្ត និងដោយមានការសម្របសម្រួលពី លោក រ៉ាបូ រ៉ាន់ឌី ព្រះរាជអាជ្ញារងអមសាលាដំបូងខេត្ត បានធ្វើការឆែកឆេរផ្ទះរបស់មុខសញ្ញា ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរីរកឃើញជញ្ជីងថ្លឹងចំនួន១ និងថង់សម្រាប់ច្រកថ្នាំញៀនមួយចំនួនទៀត រួចក៏បន្តទៅឆែកឆេរផ្ទះជួលរបស់ជនសង្ស័យមួយកន្លែងផ្សេងទៀត ស្ថិតក្នុងភូមិជ្រី សង្កាត់ឡាបានសៀក ក្រុងបានលុង ខេត្តរតនគិរី រកឃើញថង់សម្រាប់ច្រកថ្នាំញៀនមួយចំនួនធំ និងសម្ភារៈសេពថ្នាំញៀនមួយចំនួនទៀតផងដែរ។
មន្ត្រីនគរបាលបានបន្តថា ជនសង្ស័យឈ្មោះ យូ សុភ័ក្ត្រ ភេទប្រុស អាយុ៣១ឆ្នាំ ជនជាតិឥស្លាម ក្រោយពីបានឃាត់ខ្លួនបានធ្វើតេស្តទឹកនោមលទ្ធផល អវិជ្ជមាន(-)។
ក្នុងនោះដែរ សមត្ថកិច្ចបានដកហូតវត្ថុតាងរួមមាន ៖ ម្សៅក្រាមពណ៌សថ្លា សង្ស័យសារធាតុញៀនចំនួន១កញ្ចប់ ទម្ងន់០.៣៥ក្រាមទាំងសំបកថង់ ទូរស័ព្ទដៃ២គ្រឿង ដែកកេះ៧ដើម ម៉ូតូ១គ្រឿង
ថង់សម្រាប់ច្រកថ្នាំញៀនមួយចំនួនធំ និងលុយខ្មែរ៥០,០០០រៀល(លុយញុះញង់) សម្ភារៈសេពមួយចំនួនទៀត។
បច្ចុប្បន្ន ជនសង្ស័យ រួមទាំងវត្ថុតាង បានឃាត់ និងរក្សាទុកបណ្ដោះអាសន្ននៅការិយាល័យជំនាញបន្តកសាងសំណុំរឿងដើម្បីបញ្ជូនទៅអយ្យកាអមសាលាដំបូងខេត្តចាត់ការតាមនីតិវិធីច្បាប់៕
Source: Kampuchea Thmey Daily
0 Comments