ភ្នំពេញ ៖ វិទ្យាស្ថានពាណិជ្ជសាស្ត្រអេស៊ីលីដា(AIB) ដែលជាក្រុមហ៊ុនបុត្រសម្ព័ន្ធមួយរបស់ធនាគារ អេស៊ីលីដា ភីអិលស៊ី ត្រូវបានបើកសម្ពោធដាក់ឲ្យដំណើរការជាផ្លូវការហើយកាលពីរសៀលថ្ងៃទី២៧ ខែធ្នូ ឆ្នាំ២០១៨ ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្នឧបនាយករដ្ឋមន្ត្រីនិងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រី នៃព្រះរាជាណាចក្រកម្ពុជា និងមានការចូលរួមពីលោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីទ្បា និងលោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី។
លោកបណ្ឌិត ផុន ណារិន នាយកវិទ្យាស្ថាន ពាណិជ្ជសាស្ត្រ អេស៊ីលីដាបានមានប្រសាសន៍ថាវិទ្យាស្ថានពាណិជ្ជសាស្ត្រ អេស៊ីលីដាដែលមានទីតាំងស្ថិតនៅអគារលេខ១៣៩៧ មហាវិថីមិត្តភាព ភ្នំពេញ-ហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញបានចំណាយពេលសាងសង់ជាង២ឆ្នាំជាមួយទុនវិនិយោគជាង៣៦លានដុល្លារអាមេរិកដោយសាងសង់លើផ្ទៃដីចំនួន៧,៥ហិកតាដែលអាចទទួលនិស្សិតបានជាង៧០០០នាក់ មានផ្តល់នូវសេវាកម្មអប់រំកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងការបណ្តុះបណ្តាលជំនាញហិរញ្ញវត្ថុ ធនាគារ និងមីក្រូហិរញ្ញវត្ថុ ដល់និស្សិត-សិក្ខាកាមជាតិ និងអន្តរជាតិ។
លោកបណ្ឌិតបានបន្តថាការសាងសង់វិទ្យាស្ថាននេះឡើងក្នុងគោលបំណងដើម្បីបំពេញទៅតាមតម្រូវការចាំបាច់នៃកំណើនសិស្សនិស្សិតនិងដើម្បីចូលរួមចំណែកនៅក្នុងវិស័យអប់រំ ចែករំលែកនូវបទពិសោធន៍ជោគជ័យ ចំណេះជំនាញ សីលធម៌ និងពង្រឹងគុណភាពអប់រំ ស្របតាមគោលនយោបាយរបស់រាជរដ្ឋាភិបាល និងក្រសួងអប់រំយុវជន និងកីឡា នៃព្រះរាជាណាចក្រកម្ពុជា។
លោកបណ្ឌិតបានបន្ថែមថា វិទ្យាស្ថាននេះសាងសង់ឡើងស្របតាមស្តង់ដារអន្តរជាតិ មានលក្ខណៈទំនើប ស្រស់ស្អាត ដែលមានបំពាក់ទៅដោយឧបករណ៍សម្ភារៈការិយាល័យ លិក្ខូបករណ៍តាមបន្ទប់រៀនទំនើប និងទាន់សម័យ ព្រមទាំងមានប្រព័ន្ធការពារសន្តិសុខ ការសន្សំសំចៃថាមពលប្រើប្រាស់ ការបង្ការអគ្គិភ័យ បណ្តាញត្រួតពិនិត្យ និងប្រព័ន្ធទូរគមនាគមន៍ ហើយនិងប្រព័ន្ធគាំទ្របច្ចេកវិជ្ជាព័ត៌មានគ្រប់អគារទាំងអស់។
លោកបណ្ឌិត ផុន ណារិន បានមានប្រសាសន៍បន្តទៀតថា គិតត្រឹមថ្ងៃទី៣១ ខែធ្នូ ឆ្នាំ២០០៩សិក្ខាកាមខាងក្នុងប្រទេសមានមានចំនួន៦.៤៧៥នាក់ មកពី ២៤៥ស្ថាប័ន ខណៈគិតត្រឹមថ្ងៃទី៣១ ខែធ្នូ ឆ្នាំ២០០៩កន្លងទៅមានចំនួន៣០៥នាក់ប៉ុណ្ណោះ។ចំណែក សិក្ខាកាមខាងក្រៅប្រទេសមានចំនួន ២៩៨នាក់ គិតត្រឹមថ្ងៃទី៣១ ខែធ្នូ ឆ្នាំ២០០៩ កើនដល់ចំនួន១.៨៧៧នាក់ មកពី១៤២ស្ថាប័ន ៣០ប្រទេស គិតត្រឹមថ្ងៃទី៣០ ខែវិច្ឆិកា ឆ្នាំ២០១៨។
រីឯការបណ្តុះបណ្តាលកម្រិតឧត្តមសិក្សាថ្នាក់បរិញ្ញាបត្រ និងថ្នាក់បរិញ្ញាបត្ររង វិទ្យាស្ថានបានបើកបវេសនកាលលើមុខជំនាញហិរញ្ញវត្ថុ និងធនាគារបានចំនួន៣ជំនាន់គឺបវេសនកាលឆ្នាំ២០១៦ ២០១៧និង២០១៨ ដែលមាននិស្សិតកំពុងសិក្សាសរុបចំនួន ៩០៨នាក់ ក្នុងនោះកម្រិតថ្នាក់បរិញ្ញាបត្រមានចំនួន ៦១៤នាក់បរិញ្ញាបត្ររងចំនួន១៩១នាក់ និងថ្នាក់ភាសាអង់គ្លេសទូទៅមានចំនួន ១០៣នាក់។
ក្រៅពីកំណើនសិក្ខាកាម និងនិស្សិតខាងលើនេះ ចំនួនវគ្គហ្វឹកហ្វឺនផ្ទៃក្នុង ធនាគារ អេស៊ីលីដា មានចំនួន២.៦៦៤វគ្គ កម្មករនិយោជិតចូលរួមចំនួន ៣៧.៣៧៩នាក់ គិតត្រឹមថ្ងៃទី៣១ ខែធ្នូ ឆ្នាំ២០០៩កើនដល់ចំនួន ៥១.៧ ៩៦វគ្គ កម្មករនិយោជិតចូលរួមចំនួន ៥៦១.២៥៤នាក់ គិតត្រឹមថ្ងៃទី៣០ ខែវិច្ឆិកា ឆ្នាំ២០១៨និងកម្មករនិយោជិតមា ន ចំនួន៣៤នាក់គិតត្រឹមថ្ងៃទី៣១ខែធ្នូ ឆ្នាំ២០០៩កើនដល់ចំនួន ១២៧នាក់ គិតត្រឹមថ្ងៃទី៣០ខែវិច្ឆិកា ឆ្នាំ២០១៨។
លោកអគ្គបណ្ឌិត សភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រីនិងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានសំដែងនូវការអបអរសាទរ និងការកោតសរសើរចំពោះកិច្ចខិតខំប្រឹងប្រែងរបស់ក្រុមប្រឹក្សាភិបាល ថ្នាក់-ដឹកនាំ និងបុគ្គលិក នៃ វិទ្យាស្ថានពាណិជ្ជសាស្ត្រ អេស៊ីលីដា និងសូមលើកទឹកចិត្ត ដល់ក្រុមប្រឹក្សាភិបាល ថ្នាក់ដឹកនាំ និងបុគ្គលិកទាំងអស់ និងសូមបន្តនូវកិច្ចខិតខំប្រឹងប្រែងរបស់ខ្លួន ដើម្បីចូលរួមបណ្តុះបណ្តាលធនធានមនុស្ស ពោលគឺការបណ្តុះបណ្តាលជំនាញ វិជ្ជាជីវៈ ផ្នែកហិរញ្ញវត្ថុ និង ធនាគារ ប្រកបដោយគុណភាពខ្ពស់ ដើម្បីគាំទ្រការរីកចម្រើន នៃវិស័យហិរញ្ញវត្ថុ និងធនាគារនៅពេលបច្ចុប្បន្ន និងទៅអនាគត។
លោកឧបនាយករដ្ឋមន្ត្រីបានលើកឡើងទៀតថាវិទ្យាស្ថានពាណិជ្ជសាស្ត្រ អេស៊ីលីដា អាចត្រូវបានចាត់ទុកថា ជាមជ្ឈមណ្ឌល សម្រាប់អភិវឌ្ឍន៍ធនធានមនុស្សប្រកបដោយគុណភាពខ្ពស់ និងស្របតាមគោលនយោបាយរបស់រាជរដ្ឋាភិបាល និងក្រសួងអប់រំ យុវជន និង កីឡានិងជាជម្រើសដ៏ល្អមួយសម្រាប់សិស្ស និស្សិត និងសិក្ខាកាម ទំងក្នុង និងក្រៅប្រទេសសម្រាប់បន្តការសិក្សាដើម្បីទទួលបានចំណេះជំនាញនិងបទពិសោធការងារច្បាស់លាស់។
លោកឧបនាយករដ្ឋមន្ត្រីបានបន្តថាជាការពិតវឌ្ឍនភាពគួរឱ្យកត់សម្គាល់ដែលសម្រេចបានក្នុងវិស័យអប់រំ និង ការបណ្ដុះបណ្ដាលជំនាញវិជ្ជាជីវៈ ក្នុងរយៈពេលប៉ុន្មានឆ្នាំចុងក្រោយនេះ មិនមែនកើតឡើង ដោ យចៃដន្យនោះទេ ពោលគឺបានស្តែងចេញពីកិច្ចខិតខំប្រឹងប្រែងយ៉ាងសកម្មជាមួយនឹងកិច្ចសហការយ៉ាងជិតស្និទ្ធ រវាងក្រសួង-ស្ថាប័ន វិស័យឯកជន ដៃគូអភិវឌ្ឍន៍ និងសហគមន៍ ប្រកបដោយស្មារតីទទួលខុសត្រូវ តាមតួនាទី និងភារកិច្ចរៀងៗខ្លួន ក្នុងការអនុវត្តគោលនយោបាយ ដែលបានដាក់ចេញដោយរាជរដ្ឋាភិបាល ដើម្បីអភិវឌ្ឍន៍ និងកសាងធនធានមនុស្ស។
លោកឧបនាយករដ្ឋមន្ត្រីបានបន្ថែមថាដូច្នេះការសម្ពោធជាវិទ្យាស្ថានពាណិជ្ជសាស្ត្រអេស៊ីលីដានាពេលនេះគឺជាសក្ខីកម្មថ្មីមួយទៀតដែលឆ្លុះបញ្ចាំងពីការចូលរួមចំណែក របស់វិស័យឯកជនក្នុងការអភិវឌ្ឍវិស័យអប់ រំនៅកម្ពុជាប្រកបដោយគុណភាពខ្ពស់ ជាពិសេស នៅក្នុងវិស័យហិរញ្ញវត្ថុនិងធនាគារ៕
Source: Kampuchea Thmey Daily
0 Comments