ភ្នំពេញ ៖ ជនសង្ស័យ២នាក់ទៀត ត្រូវកម្លាំងនគរបាលខណ្ឌដូនពេញ ធ្វើការបង្ក្រាបជាបន្តបន្ទាប់ចំនួន២ទីតាំងផ្សេងគ្នា ព្រមទាំងដកហូតបានថ្នាំញៀនជាច្រើនកញ្ចប់ និងឧបករណ៍ប្រើប្រាស់មួយចំនួនផងដែរ។ ប្រតិបត្តិការចុះបង្ក្រាបនេះ គឺធ្វើឡើងកាលពីវេលាម៉ោង២និង៣០នាទីរសៀល ថ្ងៃទី១៣ ខែធ្នូ ឆ្នាំ២០១៨ នៅចំណុចសំណង់មិនរៀបរយ តាមផ្លូវរថភ្លើង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។
សមត្ថកិច្ចបានប្រាប់ឲ្យដឹងថា នៅក្នុងប្រតិបត្តិការខាងលើនេះ គឺដោយសារតែមានបទបញ្ជាពីលោក ស ថេត អគ្គស្នងការរង និងជាស្នងការនគរបាលរាជធានីភ្នំពេញបានដាក់បញ្ជាដល់កម្លាំងនគរបាលទាំង១២ខណ្ឌ បើកប្រតិបត្តិការស្រាវជ្រាវនូវមុខសញ្ញាជួញដូរគ្រឿងញៀនឲ្យខានតែបាន។
ហើយនៅក្នុងរង្វង់ប្រតិបត្តិការគោលដៅទី១ កម្លាំងសមត្ថកិច្ចបានធ្វើការឃាត់ខ្លួនជនសង្ស័យម្នាក់ឈ្មោះ សំ សុខជា ភេទប្រុស អាយុ១៦ឆ្នាំ មុខរបរ មិនពិតប្រាកដ (ជួញដូរគ្រឿងញៀន) ស្នាក់នៅផ្ទះគ្មានលេខ ផ្លូវរថភ្លើង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ ព្រមទាំងដកហូតនូវក្រាមពណ៌សថ្លាចំនួន១៤កញ្ចប់ ក្នុងនោះមាន១៣កញ្ចប់តូច និង ១កញ្ចប់ធំ ឧបករណ៍ប្រើប្រាស់គ្រឿងញៀនមួយចំនួន ថង់សម្រាប់ច្រកគ្រឿងញៀនមួយចំនួន ទូរស័ព្ទម៉ាក MI ពណ៌ស ផ្កាឈូក មួយគ្រឿង និងប្រាក់រៀលចំនួន៣ម៉ឺនរៀល។ គោលដៅទី២ កម្លាំងសមត្ថកិច្ចបានធ្វើការឃាត់ខ្លួនបានជនសង្ស័យម្នាក់ ឈ្មោះ សៅ សេង ភេទប្រុស អាយុ៣២ឆ្នាំ មុខរបរ មិនពិតប្រាកដ (ជួញដូរគ្រឿងញៀន) ស្នាក់នៅផ្ទះគ្មានលេខ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ព្រមទាំងដកហូតក្រាមពណ៌ស ថ្លាចំនួន១១កញ្ចប់ ឧបករណ៍សម្រាប់ប្រើប្រាស់គ្រឿងញៀនមួយចំនួន ថង់សម្រាប់ច្រកគ្រឿងញៀនមួយចំនួន និងប្រាក់រៀលចំនួន២ម៉ឺនរៀល។
ជាមួយនឹងការចាប់បង្ក្រាបនោះដែរ ប្រជាពលរដ្ឋដែលរស់នៅក្បែរទីតាំងខាងលើ បានធ្វើការរិះគន់ទៅលើសមត្ថកិច្ចខណ្ឌដូនពេញថា ឃើញតែចុះបង្ក្រាបគ្រឿងញៀនជារៀងរាល់ថ្ងៃ តែមិនដែលឃើញចាប់បានមេខ្លោងជួញដូរគ្រឿងញៀនធំនោះទេ បានតែអ្នកលក់កំប៉ិកកំប៉ុកតែប៉ុណ្ណោះ។
ប្រជាពលរដ្ឋ ក៏បានធ្វើការសំណូមពរទៅ លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញ មេត្តាជួយពិនិត្យមើលទីតាំងខាងលើផង ព្រោះថាបទល្មើសគ្រឿងញៀននៅទីតាំងនេះ សម្បូរទៅដោយអ្នកជួញដូរដូចផ្សារត្រីអញ្ចឹង ខ្លះទៀតនាំគ្នាឈរលក់ទាំងថ្ងៃទាំងយប់ ដោយមិនខ្លាចកម្លាំងសមត្ថកិច្ចនោះទេ។
បច្ចុប្បន្នជនសង្ស័យទាំង២នាក់ រួមជាមួយនឹងវត្ថុតាង ត្រូវសមត្ថកិច្ចបញ្ជូនខ្លួនទៅកាន់អធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនបន្តទៅកាន់សាលាដំបូងរាជធានីភ្នំពេញ៕
Source: Kampuchea Thmey Daily
0 Comments