ភ្នំពេញ ៖ ការឯកភាពនេះ បានធ្វើឡើងនៅក្នុងកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី កម្ពុជា-ឥណ្ឌូនេស៊ី លើកទី៤ ទីក្រុងហ្សាការតា ក្នុងដំណើរទស្សនកិច្ចរបស់ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ទៅកាន់ប្រទេសឥណ្ឌូនេស៊ី ចាប់ពីថ្ងៃទី០៣ ដល់ទី០៤ ខែធ្នូ ឆ្នាំ២០១៨។
តាមព័ត៌មានពីក្រសួងការបរទេសបានឲ្យដឹងថា ឯកឧត្ដមឧបនាយករដ្ឋមន្ត្រី ប្រាក់ សុខុន បានដឹកនាំគណៈប្រតិភូអញ្ជើញទៅចូលរួម និងធ្វើជាសហប្រធានកិច្ចប្រជុំគណៈកម្មការចម្រុះ នៃកិច្ចសហប្រតិបត្តិការទ្វេភាគីកម្ពុជា-ឥណ្ឌូនេស៊ី លើកទី៤ ដែលបានប្រព្រឹត្តទៅនៅថ្ងៃទី០៤ ខែធ្នូ ឆ្នាំ២០១៨ នៅទីក្រុងហ្សាការតា ប្រទេសឥណ្ឌូនេស៊ី ហើយមុនពេលធ្វើជាសហប្រធានកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី៤នេះ ឯកឧត្ដមឧបនាយករដ្ឋមន្ត្រី ប្រាក់ សុខុន និងលោកជំទាវ រ៉េតណូ អិល ភី ម៉ារស៊ូឌី បានជួបប្រជុំទ្វេភាគី ដែលក្នុងនោះ រដ្ឋមន្ត្រីការបរទេសទាំងពីរ បានចែករំលែកគ្នាទៅវិញទៅមកនូវសភាពការណ៍ ស្ដីពីនយោបាយ និងសេដ្ឋកិច្ចសង្គមបច្ចុប្បន្ន នៃប្រទេសរបស់ខ្លួន និងទស្សនៈស្ដីពីបញ្ហាតំបន់។
ក្នុងអំឡុងកិច្ចប្រជុំនោះ ភាគីទាំងពីរបានបង្ហាញទស្សនៈរួមគ្នាថា ខួបអនុស្សាវរីយ៍លើកទី៦០ នៃការបង្កើតទំនាក់ទំនងការទូតរវាងកម្ពុជា និងឥណ្ឌូនេស៊ី នៅឆ្នាំ២០១៩ នឹងក្លាយទៅជាព្រឹត្តិការណ៍ដ៏មានសារៈសំខាន់ ក្នុងការបង្កើនកិច្ចសហប្រតិបត្តិការទ្វេភាគី រវាងប្រទេសទាំងពីរ។ ភាគីទាំងពីរបានស្វាគមន៍គម្រោងរៀបចំសកម្មភាពរួមគ្នាជាច្រើន ដើម្បីប្រារព្ធព្រឹត្តិការណ៍ដ៏ឧឡារិកនេះ។
ភាគីទាំងពីរបានពិភាក្សាយ៉ាងទូលំទូលាយ និងស៊ីជម្រៅ លើការអភិវឌ្ឍន៍ នៃទំនាក់ទំនងទ្វេភាគី និងវិធានការក្នុងការពង្រីក និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការជាច្រើន ដូចជា ការពារជាតិ និងសន្តិសុខ ពាណិជ្ជកម្ម និងវិនិយោគ កសិកម្ម ការតភ្ជាប់ផ្លូវអាកាស ឧស្សាហកម្ម ថាមពល វប្បធម៌ ទេសចរណ៍ អប់រំ ព័ត៌មាន ការដឹកជញ្ជូន និងសុខាភិបាល។
រដ្ឋមន្ត្រីទាំងពីរបានឯកភាពគ្នាលើកទឹកចិត្តឲ្យបញ្ចប់នីតិវិធីផ្ទៃក្នុង ដែលចាំបាច់សម្រាប់ការចូលជាធរមាន នៃកិច្ចព្រមព្រៀង ស្ដីពីកិច្ចសហប្រតិបត្តិការលើវិស័យការពារជាតិ ដែលបានចុះហត្ថលេខានៅថ្ងៃទី២៣ ខែតុលា ឆ្នាំ២០១៧ និងបានស្វាគមន៍គំនិតផ្ដួចផ្ដើមបង្កើនកិច្ចសហប្រតិបត្តិការឲ្យកាន់តែជិតស្និទ្ធរវាងស្ថាប័នការពារជាតិពាក់ព័ន្ធ នៃប្រទេសទាំងពីរ។ ខណៈកំពុងកត់សំគាល់ពីការរីកចម្រើន នៃទំហំពាណិជ្ជកម្មរវាងប្រទេសទាំងពីរ រដ្ឋមន្ត្រីទាំងពីរបានឯកភាពឲ្យមានការពិភាក្សាពីលទ្ធភាពក្នុងការធ្វើវិសោធនកម្ម នៃកិច្ចព្រមព្រៀងពាណិជ្ជកម្មរវាងកម្ពុជា និងឥណ្ឌូនេស៊ី ដែលបានចុះហត្ថលេខានៅឆ្នាំ១៩៩៧ ដើម្បីរួមបញ្ចូលការវិវត្តន៍ថ្មីៗ នៃពាណិជ្ជកម្មនៅក្នុងប្រទេសទាំងពីរ។
ក្រសួងការបរទេសបានបញ្ជាក់ថា កិច្ចប្រជុំបានឯកភាពលើកទឹកចិត្តការវិនិយោគលើឧស្សាហកម្មថ្នាំពេទ្យ ស៊ីម៉ង់ ជីគីមី កៅស៊ូ អាហារកែច្នៃ និងឧស្សាហកម្មរថយន្ត។ រដ្ឋមន្ត្រីទាំងពីរ ក៏បានស្វាគមន៍ការកើនឡើងការវិនិយោគរបស់ឥណ្ឌូនេស៊ី នៅកម្ពុជាផងដែរ។ ដោយកត់សំគាល់ឃើញភាពវិជ្ជមាននេះ ភាគីឥណ្ឌូនេស៊ីឯកភាពបន្តលើកទឹកចិត្តអ្នកវិនិយោគ មកវិនិយោគនៅកម្ពុជាបន្ថែមទៀត។
កិច្ចប្រជុំបានឯកភាពគ្នាសម្រួលការធ្វើពាណិជ្ជកម្មបន្ថែមទៀតលើផលិតផលកសិកម្ម និងពន្លឿន កិច្ចពិភាក្សាលើអនុស្សរណៈយោគយល់គ្នា ស្ដីពីកិច្ចសហប្រតិបត្តិការលើវិស័យកសិកម្ម។ កិច្ចប្រជុំបានជំរុញឲ្យមានការបង្កើនការតភ្ជាប់ផ្លូវអាកាស និងលើកទឹកចិត្តប្រតិបត្តិករអាកាសចរណ៍ឲ្យធ្វើប្រតិបត្តិការហោះហើរត្រង់រវាងប្រទេសទាំងពីរ។
ភាគីទាំងពីរ បានលើកទឹកចិត្តស្ថាប័នពាក់ព័ន្ធ ឲ្យពិនិត្យឡើងវិញលើអនុស្សរណៈយោគយល់គ្នា ស្ដីពីកិច្ចសហប្រតិបត្តិការលើវិស័យទេសចរណ៍ ដែលបានចុះហត្ថលេខានៅឆ្នាំ១៩៩៩ និងបានស្វាគមន៍គំនិតផ្ដួចផ្ដើមពង្រីកកិច្ចសហប្រតិបត្តិការរួមគ្នា ដើម្បីជំរុញទិដ្ឋភាពវប្បធម៌រួមរវាងកម្ពុជា និងឥណ្ឌូនេស៊ី។
លើសពីនេះ កិច្ចប្រជុំ ក៏បានលើកទឹកចិត្តឲ្យមានការបន្តសុពលភាពអនុស្សរណៈ ស្ដីពីកិច្ចសហប្រតិបត្តិការវប្បធម៌ ដែលនឹងត្រូវអស់សុពលភាពនៅថ្ងៃទី២៦ ខែកុម្ភៈ ឆ្នាំ២០១៩។ ភាគីកម្ពុជាបានថ្លែងអំណរគុណ ចំពោះការបន្តជួយរបស់ឥណ្ឌូនេស៊ីក្នុងការផ្ដល់អាហារូបករណ៍ដល់និស្សិតកម្ពុជាទៅសិក្សានៅប្រទេសឥណ្ឌូនេស៊ី ហើយភាគីទាំងពីរបានស្វាគមន៍គំនិតផ្ដួចផ្ដើមនៃកិច្ចសហការរវាងវិទ្យាស្ថានជាតិការទូត និងទំនាក់ទំនងអន្តរជាតិរបស់កម្ពុជា និងមជ្ឈមណ្ឌលអប់រំ និងបណ្ដុះបណ្ដាល នៃក្រសួងការបរទេសឥណ្ឌូនេស៊ី។
ក្រៅពីនេះ ភាគីទាំងពីរ ក៏បានផ្លាស់ប្ដូរទស្សនៈ ស្ដីពីបញ្ហាតំបន់ និងសកល ដែលជាកង្វល់រួម ក្នុងនោះក៏មានគំនិតផ្ដួចផ្ដើមឥណ្ឌូ-ប៉ាស៊ីហ្វិកផងដែរ។
ភាគីទាំងពីរ បានឯកភាពរៀបចំកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីកម្ពុជា-ឥណ្ឌូនេស៊ី លើកទី៥ នៅឆ្នាំ២០២០ នៅកម្ពុជា ហើយនៅពេលបញ្ចប់កិច្ចប្រជុំគណៈកម្មការចម្រុះ សម្រាប់កិច្ចសហប្រតិបត្តិការទ្វេភាគីលើកទី៤ ឯកឧត្ដមឧបនាយករដ្ឋមន្ត្រី ប្រាក់ សុខុន និងលោកជំទាវ រ៉េតណូ អិល.ភី ម៉ារស៊ូឌី បានចុះហត្ថលេខារួមគ្នាលើកំណត់ហេតុស្ដីពីលទ្ធផល នៃកិច្ចប្រជុំផងដែរ៕
Source: Kampuchea Thmey Daily
0 Comments