ភ្នំពេញ ៖ បក្ខពួកចោរលួចម៉ូតូម្នាក់ ក្នុងចំណោម៣នាក់ ត្រូវបានសមត្ថកិច្ច នគរបាលចាប់ខ្លួន កាលពីវេលាម៉ោង៤ទៀបភ្លឺ ឈានចូលថ្ងៃទី១៤ ខែធ្នូ ឆ្នាំ២០១៨ នៅតាមផ្លូវក្នុងសង្កាត់អូរបែកក្អម ខណ្ឌសែនសុខ។ ជនសង្ស័យជាចោរលួចម៉ូតូខាងលើ ឈ្មោះ គិន ខាវ អាយុ១៨ឆ្នាំ គ្មានមុខរបរពិតប្រាកដ ស្នាក់នៅផ្ទះជួលគ្មានលេខផ្លូវ១៣២ សង្កាត់ទឹកល្អក់១ ខណ្ឌទួលគោក។
មន្ត្រីនគរបាលបាននិយាយថា ជនសង្ស័យខាងលើត្រូវបានចាប់ខ្លួនខណៈដែលគាត់កំពុងអូសបណ្ដើរម៉ូតូ១គ្រឿង ម៉ាកហុងដាឌ្រីម ពាក់ស្លាកលេខភ្នំពេញ 3248 ហើយបានសារភាពថា ម៉ូតូនេះបក្ខពួករបស់ខ្លួន២នាក់ផ្សេងទៀត ឈ្មោះ ខុង អាយុ២៧ឆ្នាំ ស្នាក់នៅផ្ទះជួលម្តុំមុខពេទ្យលោកសង្ឃ និងម្នាក់ទៀតមិនស្គាល់ឈ្មោះ អាយុ២៨ឆ្នាំ ស្នាក់នៅផ្ទះជួលភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ បានលួចពីគេនៅបន្ទប់ផ្ទះជួលមួយកន្លែង ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ហើយបានប្រើខ្លួន (ជនសង្ស័យ) ឲ្យអូសម៉ូតូនេះយកទៅលាក់ទុកសិន រួចនឹងយកទៅលក់ចែកលុយគ្នាចាយ ប៉ុន្តែខណៈដែលកំពុងតែអូសបណ្ដើរម៉ូតូនេះតាមផ្លូវក៏ត្រូវបានប៉ូលិសឃាត់សួរនាំ និងចាប់ខ្លួនតែម្ដង។
ប៉ូលិស កំពុងតាមចាប់ជនសង្ស័យចំនួន២នាក់ទៀត ដែលកំពុងរត់គេចខ្លួន ហើយក៏បានបោះដៃទៅប៉ូលិស ខណ្ឌពោធិ៍សែនជ័យ ស្វែងរកម្ចាស់ម៉ូតូមកទទួលយកម៉ូតូវិញ និងដាក់ពាក្យប្តឹងដាក់បន្ទុកលើជនសង្ស័យតាមច្បាប់៕
Source: Kampuchea Thmey Daily
0 Comments