នូវ ដា​រ៉ូ និង​សុខ សុវណ្ណ ជួប​ថៃ ខណៈ ​ទេស សំខាន់ ជួប ស៊ុយ​អ៊ែត​

នូវ ដា​រ៉ូ អ្នក​ប្រដាល់​ក្លិប​អាណាចក្រ​គុន​ខ្មែរ ត្រូវគេ​ផ្តល់​ឱកាស​ឲ្យ​ជួប​ប្រកួត​ជាមួយ​អ្នក​ប្រដាល់​ថៃ ហ្វា ម៉ៃ (Fa Mai ) ដោយ​ប្រកួត​ក្នុង​ទម្ងន់​៦៣,៥០០​គ​.​ក្រ នៅ​លើ​សង្វៀន​Boostrong Fighter On Fire នា​ព្រឹក​ថ្ងៃអាទិត្យ​ ទី​៣០ ខែ​ធ្នូ​ ឆ្នាំ​២០១៨​នេះ។
​
ដា​រ៉ូ ជា​អ្នក​ប្រដាល់​ខ្លាំង​ស្រករ​ក្រោយ​ម្នាក់។ គេ​បាន​ឆ្លងកាត់​ការប្រកួត​ជាមួយ​អ្នក​ប្រដាល់​ថៃ​ទើបតែ​បាន​៧​លើក​ប៉ុណ្ណោះ។ ដូច្នេះ លើក​នេះ​ជា​លើក​ទី​៨ ដែល​គេ​ជួប​ប្រកួត​ជាមួយ​ថៃ​នោះ។ ជួប​ប្រកួត​ជាមួយ​ថៃ​លើកចុងក្រោយ​នោះ គឺ​វាយ​ចាញ់​ថង​ប្រាន ​២៦ ដោយ​ពិន្ទុ កាលពី​ថ្ងៃទី​១៥ ខែ​ធ្នូ​ ឆ្នាំ​២០១៨។​
​
អ្នក​ប្រដាល់​ក្លិប​អាណាចក្រ​គុន​ខ្មែរ​រូបនេះ មាន​ប្រវត្តិ​ប្រកួត​ប្រមាណ​ជា​៥៥​លើក ក្នុងនោះ​វាយ​ឈ្នះ​៣៧​លើក ចាញ់​១៧​លើក និង​ស្មើ​០១​លើក។ គេ​ជា​អ្នក​ប្រដាល់​ជើង​ខ្លាំង​ស្រករ​ក្រោយ ដែល​មាន​ចិត្ត​ធំ កម្លាំង​ខ្លាំង វាយ​មិន​សំចៃ​ដៃ​ទេ។ ប៉ុន្តែ​យ៉ាងណា​ការប្រកួត​លើក​នេះ មិនដឹងថា ដា​រ៉ូ​ អាច​យកឈ្នះ ហ្វា ម៉ៃ បាន​ឬក៏​អត់​នោះទេ?។​
​ ​
ហ្វា ម៉ៃ ជា​ជើង​ខ្លាំង ដែល​មាន​ស្នៀត​ទាត់ និង​កណ្ដាប់ដៃ​ល្អ។ ដូច្នេះ នូវ ដា​រ៉ូ ប្រកួត​លើក​នេះ អាច​នឹង​ជួប​ការលំបាក​ច្រើន ព្រោះ​អ្នក​ប្រដាល់​ថៃ​រូបនេះ​មាន​ស្នៀត​ប្រដាល់​ល្អ ​និង​ខ្លាំង។ អ្នក​ប្រដាល់​ថៃ​រូបនេះ មាន​ប្រវត្តិ​ប្រកួត​ចំនួន​៦៤​លើក ឈ្នះ​៥៣​លើក និង​ចាញ់​១១​លើក មិនដែល​ស្មើ។ ចាំមើល រវាង​នូវ ដា​រ៉ូ និង ហ្វា ម៉ៃ តើន​រណា​ជា​អ្នកឈ្នះ​នៅក្នុង​ការជួបគ្នា​លើកដំបូង​នេះ?។​
​
សុខ សុវណ្ណ អ្នក​ប្រដាល់ ​នៃ​ក្លិប​កងពលធំ​អន្តរាគមន៍​លេខ​២ ត្រូវ​គេ​ផ្គូ​ឲ្យ​ជួប​ប្រកួត​ជាមួយ​អ្នក​ប្រដាល់​ថៃ ដក់ ក ( Dork Kor ) ដោយ​ជួបគ្នា​ក្នុង​ទម្ងន់​៦០​គីឡូក្រាម។

ដក់ ក ដែល​មកជួប​សុខ សុវណ្ណ​នេះ គេ​មិន​ធ្លាប់​មក​ប្រកួត​នៅ​ស្រុក​ខ្មែរ​នោះទេ កន្លងមក។ អ្នក​ប្រដាល់​ថៃ​រូបនេះ មាន​ថ្វីដៃ​ល្អ និង​វាយ​ខ្លាំង​គួរសម​ដែរ ដោយសារ​គេ​ជា​ជើង​ខ្លាំង​នៅ​ស្រុកថៃ។ បើ​តាម ​លោក​ ញាណ សុធី ដក់ ក មាន​ប្រវត្តិ​ប្រកួត​ប្រមាណ​៥៥​លើក ហើយ​វាយ​ឈ្នះ​៤៤​លើក និង ចាញ់​១១​លើក មិនដែល​ស្មើ។ អ្នក​ប្រដាល់​ថៃ​រូបនេះ មាន​សមត្ថភាព​បច្ចេកទេស​ប្រដាល់​កម្រិត​ខ្ពស់ ដែល​សុខ ​សុវណ្ណ​ មិនអាច​មើលស្រាល​បានឡើយ​។
​
តាម​អ្នក​ផ្គូផ្គង​ឲ្យ​ដឹង​នោះ​ថា កាលដែល​នាំយក ដក់ ក ឲ្យ​មក​ប្រកួត​លើក​នេះ គឺ​ដើម្បី​ផ្តល់​ឱកាស​ឲ្យ​​សុខ សុវណ្ណ ស្តា​កេរ្តិ៍ឈ្មោះ​ឡើងវិញ បន្ទាប់ពី​ឡើង​ប្រកួត​ជាមួយ​ថៃ​ប៉ុន្មាន​ប្រកួត​ចុងក្រោយ​នេះ សុវណ្ណ ​វាយ​បាន​ត្រឹម​ស្មើ​ និង​ចាញ់​ប៉ុណ្ណោះ។
​
សុខ សុវណ្ណ ពីមុន​ជា​ជើង​ខ្លាំង​ម្នាក់​របស់​កម្ពុជា។ គេ​ធ្លាប់​ប្រកួត​ជាមួយ​ថៃ​ច្រើន​នាក់​ហើយ។ សុវណ្ណ គេ​មាន​បទពិសោធន៍​ច្រើន​ក្នុង​ការប្រកួត។ គេ​មាន​ស្នៀត​ទាត់​ល្អ ពិសេស​ទាត់​ផ្កាប់​ចាន ហើយ​កណ្ដាប់ដៃ​ក៏​ល្អ​ដែរ ដោយ​វាយ​ចេញចូល​រហ័ស ហើយ​ជង្គង់ កែង ក៏​ល្អ​ផងដែរ។ ប៉ុន្តែ​មួយរយៈ​ចុងក្រោយ​ដែល​ផ្គូ​ឲ្យ​ជួប​ជាមួយ​ថៃ​នោះ សុវណ្ណ​ វាយ​មិនដែល​ឈ្នះ​នោះទេ។ និយាយ​រួម សុខ សុវណ្ណ ចុងក្រោយ​នេះ ស្រុត​ធ្លាក់​ហៅ​លែង​ឮ គឺ​វាយ​អន់​មែនទែន។
​
ដូច្នេះ​ចាំមើល លើក​នេះ​គេ​ផ្គូ​ឲ្យ​ជួប​ប្រកួត​ជាមួយ ដក់ ក សុខ សុវណ្ណ អាច​យកឈ្នះ​បាន​ឬ​អត់? សុវណ្ណ​ ឥឡូវនេះ វាយ​ឆាប់​អស់​ស៊ុ​ហ្វ​ជាង​មុន ហើយ​ជួប​ជាមួយ​ថៃ​លើក​ចុង​ក្រោយ​នេះ គឺ​វាយ​ស្មើ​Yorth Phit។ សុវណ្ណ មាន​ប្រវត្តិ​ប្រកួត​ចំនួន​៧៩​លើក ឈ្នះ​៥៩​លើក ចាញ់​១៧​លើក និង​ស្មើ​០៣​លើក ។
​ទេស សំខាន់ អ្នក​ប្រដាល់​ក្លិប​កងពលតូច​លេខ​៧០ ដែល​បាត់​មុខ​ពី​ស​ង្វៀន​ជាង​មួយឆ្នាំ​កន្លងមក​ហើយ​នោះ គេ​នឹងត្រូវ​ជួប​ជាមួយ​អ្នក​ប្រដាល់​ស៊ុយ​អ៊ែត គឺ អា​ឡិច​សេន​ឌ័​រ កាស់​ស្ទេ​វ ដោយ​ប្រកួត​ក្នុង​ប្រភេទ​ទម្ងន់​៦៩ គ​.​ក្រ។
​ ​
សំខាន់​ដែល​កាលពីមុន​ប្រកួត​ក្នុង​ប្រភេទ​ទម្ងន់​៦០ ឬ ៦៣,៥០​គីឡូក្រាម​នោះ ពេលនេះ​ទម្ងន់​របស់​គេ​ឡើងដល់​៦៩​គីឡូក្រាម ដែល​កាលពី​មុនគេ​ប្រកួត​ត្រឹម​ទម្ងន់​៦៣,៥០០ និង​៦៥ គីឡូក្រាម​ប៉ុណ្ណោះ។​ សំខាន់​បាន​ឲ្យ​ដឹង​ថា គេ​បាន​ចូល​ក្លិប​ដើម្បី​ហាត់​បាន​ច្រើន​គួរសម​ដែរ តែ​គេ​ទទួល​ស្គាល់​ថា កម្លាំង​របស់គេ​នៅ​មិនទាន់​គ្រប់គ្រាន់​ទេ។ គេ​ត្រូវការ​ឈ្នះ​នៅក្នុង​ការប្រកួត​នេះ។
​
អ្នក​ប្រដាល់​ស៊ុយ​អ៊ែត វិញ ក៏​ពុំ​ធ្លាប់​មក​ប្រកួត​នៅ​ស្រុក​ខ្មែរ​ដែរ​កន្លងមក។ អា​ឡិច​សេន​ឌ័​រ កាស់​ស្ទេ​វ គេ​មាន​កំណត់ត្រា​ប្រកួត​ត្រឹមតែ​១៨​លើក​ប៉ុណ្ណោះ ក្នុងនោះ​វាយ​ឈ្នះ​១៥​លើក ចាញ់​០៣​លើក។ ចំណែក ទេស សំខាន់ គេ​មាន​ប្រវត្តិ​ប្រកួត​៨៥​លើក ឈ្នះ​៦៧​លើក ចាញ់​១៥​លើក និង​ស្មើ​០៣​លើក ។​
​
សំខាន់ ខាន​ឡើង​ប្រកួត​ជាង​មួយឆ្នាំ​មកហើយ ដូច្នេះ​មិនដឹងថា ទេស ខាន់ គេ​អាច​យកឈ្នះ អា​ឡិច​សេន​ឌ័​រ កាស់​ស្ទេ​វ បាន​ឬ​អត់​នោះទេ?៕


​

Source: Kampuchea Thmey Daily