ភ្នំពេញ ៖ តាមរយៈមេធាវីការពារក្តី លោក កឹម សុខា អតីតប្រធានអតីតគណបក្សសង្គ្រោះជាតិបានស្នើសុំឲ្យតុលាការទម្លាក់ចោលបទចោទមកលើរូបលោកសិន មុនឈានដល់ការទទួលយកសិទ្ធិនយោបាយមកវិញ ហើយថ្នាក់ដឹកនាំផ្សេងៗទៀត ដែលជាប់បម្រាម ក៏រង់ចាំការទម្លាក់ចោលរបស់តុលាការនេះដែរ។
ការលើកឡើងរបស់មេធាវីការពារក្តីលោក កឹម សុខា នេះ បានធ្វើឡើងខណៈការធ្វើវិសោធនកម្មច្បាប់ គណបក្សនយោបាយ ជិតចូលជាធរមានក្នុងពេលឆាប់ៗខាងមុខនេះ ដើម្បីបើកសិទ្ធិឲ្យអតីតគណបក្សសង្គ្រោះជាតិ (CNRP)ទាំង១១៨រូប ធ្វើនយោបាយឡើងវិញ ហើយកាលពីព្រឹកថ្ងៃទី២៨ ខែធ្នូ ឆ្នាំ២០១៨ ក្រុមប្រឹក្សាធម្មនុញ្ញកម្ពុជា បានយល់ស្របជាឯកច្ឆន្ទ ចំពោះច្បាប់ស្តីពីវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយនេះហើយ ដើម្បីបើកផ្លូវឲ្យអតីតមន្ត្រីគណបក្ស ប្រឆាំងទាំង១១៨រូប អាចមានសិទ្ធិធ្វើនយោបាយឡើងវិញ។
លោក ចាន់ ចេន ជាមេធាវីការពារក្តីមួយរូបរបស់លោក កឹម សុខា បានបញ្ជាក់នៅក្នុងបណ្តាញសង្គមហ្វេសប៊ុកផ្លូវការរបស់ខ្លួនថា “ចំពោះជំហរលោក កឹម សុខា គឺជាដំបូងសុំឲ្យតុលាការទម្លាក់ចោលបទចោទមកលើរូបគាត់សិន។ ហើយក៏ដូចគ្នាដែរ ចំពោះការទទួលយកសិទ្ធិនយោបាយមកវិញនោះ អ្នកផ្សេងៗទៀតជាច្រើនក្នុងចំណោម១១៧នាក់នោះ ក៏គេរង់ចាំការទម្លាក់បទចោទលោកប្រធាន កឹម សុខា ដើម្បីឲ្យមានសេរីភាពសិនដែរ”។
សូមបញ្ជាក់ថា លោក កឹម សុខា ត្រូវបានឃុំខ្លួនដាក់ពន្ធនាគារ កាលពីថ្ងៃទី៣ ខែកញ្ញា ឆ្នាំ២០១៧ ដោយចោទប្រកាន់ពីបទធ្វើសន្ធិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ យោងតាមក្រមព្រហ្មទណ្ឌបទធ្វើសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ ឆ្នាំដល់៣០ឆ្នាំ។ តែត្រូវបានតុលាការសម្រេចដោះលែងឲ្យនៅក្រៅឃុំបណ្តោះអាសន្ន នៅវេលាទៀបភ្លឺឈានចូលថ្ងៃទី១០ ខែកញ្ញា ឆ្នាំ២០១៨ ដោយដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
ការដោះលែងលោក កឹម សុខា ឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យតាមផ្លូវតុលាការនេះ បានភ្ជាប់នូវលក្ខខណ្ឌចាំបាច់មួយចំនួនសម្រាប់អតីតមេបក្សប្រឆាំងនេះ ដែលរួមមានដូចជា មិនអនុញ្ញាតឲ្យចេញក្រៅពីព្រំប្រទល់នៃដែនដីដែលខណ្ឌដោយផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គលឬជនបរទេសដែលពាក់ព័ន្ធនឹងសំណុំរឿង និងមិនត្រូវជួបជុំធ្វើសកម្មភាពនយោបាយជាដើម៕
Source: Kampuchea Thmey Daily
0 Comments