រតនគិរី ៖ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានឃាត់ខ្លួនយុវជន២នាក់ ជាមុខសញ្ញាប្រើប្រាស់ថ្នាំញៀន តាមការសំណូមពរពីអាណាព្យាបាលយុវជនទាំង២នាក់ ដើម្បីបញ្ជូនទៅមណ្ឌលកែប្រែខេត្តបន្ទាយមានជ័យ។
ការឃាត់ខ្លួនយុវជនខាងលើនេះ ធ្វើឡើងកាលពីវេលាម៉ោង១និង៣០នាទីរសៀលថ្ងៃសៅរ៍ ៧រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែធ្នូ ឆ្នាំ២០១៨កន្លងទៅ។
មន្ត្រីនគរបាលជំនាញបានឲ្យដឹងថា យុវជន២នាក់ ១-ឈ្មោះ ហួន សិលា ភេទប្រុស អាយុ១៨ឆ្នាំ ជនជាតិខ្មែរ។ ២-ឈ្មោះ ឃុត សម្បត្តិប៊ុនលី ភេទប្រុស អាយុ១៦ឆ្នាំ ជនជាតិខ្មែរ ទាំង២នាក់ មានទីលំនៅបច្ចុប្បន្នភូមិ៧មករាសង្កាត់ឡាបានសៀក ក្រុងបានលុង ខេត្តរតនគិរី។
ក្រោយពីសមត្ថកិច្ចបានឃាត់ខ្លួនមុខសញ្ញាបានសារភាពថា ខ្លួនបានប្រើប្រាស់ថ្នាំញៀនបាន៤ខែមកហើយ បន្ទាប់មកសមត្ថកិច្ចជំនាញ បានធ្វើតេស្តទឹកនោមលទ្ធផលវិជ្ជមាន(+)ទាំង២នាក់។
មន្ត្រីនគរបាលជំនាញបានបន្តថា តាមរយៈសាកសួរយកចម្លើយមុខសញ្ញាទាំង២នាក់នេះមានឆន្ទៈនិងស្ម័គ្រចិត្តទៅបន្សាបសារធាតុញៀនដោយខ្លួនឯងផងដែរ។
បច្ចុប្បន្ន សមត្ថកិច្ច បានឃាត់ខ្លួនបណ្ដោះអាសន្ននៅការិយាល័យជំនាញ ដើម្បីអនុវត្តនីតិវិធីបញ្ជូនទៅមណ្ឌលកែប្រែបន្សាបគ្រឿងញៀននៅខេត្តបន្ទាយមានជ័យ៕
Source: Kampuchea Thmey Daily
0 Comments