កំពង់ឆ្នាំង ៖ នៅក្នុងរឿងទំនាស់ក្នុងឃុំក្រាំងស្គារ ស្រុកទឹកផុស នៅព្រឹកថ្ងៃទី២៩ ខែធ្នូ ឆ្នាំ២០១៨ មុននេះ លោកជំទាវ សម មុន្នីកា បានចុះដល់ទីតាំងដីទំនាស់ ដោយឆ្លើយបំភ្លឺប្រាប់ក្រុមអ្នកសារព័ត៌មានក្នុងខេត្តកំពង់ឆ្នាំងថា ៖ លោកជំទាវបានទិញដីពី លោក ជួន ធៀប ចំនួន១០២ហិកតា មិនមែនទិញ៨០ហិកតា ដូចលោក ជួន ធៀប បានប្រាប់អ្នកសារព័ត៌មាននោះឡើយ។ ចំណែកការលើកភ្លឺក្រវាត់ព្រំដីនេះ គឺធ្វើតាម លោក ជួន ធៀប ជាអ្នកចង្អុលបង្ហាញ ដើម្បីឲ្យមន្ត្រីសុរិយោដីវាស់វែងតែប៉ុណ្ណោះ មិនបានបំពានទៅលើដីដូចមានគេចោទប្រកាន់ឡើយ។ .
លោកជំទាវ សម មុន្នីកា បានបំភ្លឺចំពោះមុខក្រុមសារព័ត៌មានជាច្រើននាក់ថា លោកជំទាវបានស្គាល់លោក ជួន ធៀប និងបានក្លាយជាបងប្អូនធម៌នឹងគ្នាទៀតផង ដោយនៅឆ្នាំ២០០២ លោក ជួន ធៀប បានទៅដល់ផ្ទះគាត់ ហើយបានសុំឲ្យគាត់ជួយទិញដីចំនួន៧២ហិកតា គឺបានធ្វើលិខិតទិញលក់ដី និងលិខិតប្រគល់លុយ ទទួលលុយកាក់ត្រឹមត្រូវច្បាស់លាស់ផងដែរ។ នៅឆ្នាំ២០០៣ លោក ជួន ធៀប បានទៅម្ដងទៀតថា គាត់ទាល់លុយ សុំឲ្យគាត់ជួយទិញដីចំនួន៣០ហិកតាទៀត សរុប គឺ ១០២ហិកតា មិនមែនដី៨០ហិកតាដូច លោក ជួន ធៀប ប្រាប់ក្រុមអ្នកសារព័ត៌មាននោះឡើយ។
ចំណែកការទិញលក់ ទាំង២លើក គឺមានកំណត់ហេតុច្បាស់លាស់ ដោយមានលេខក្បាលដីច្រើនប្លង់ និងមានការសរសេរដៃដោយ លោក ជួន ធៀប ខ្លួនឯង និងមានស្នាមមេដៃ លោក ជួន ធៀប ត្រឹមត្រូវទៀតផង។
ក្រោយមក ដោយសារលោកជំទាវ ជាប់រវល់ពេកយូរៗ ឆ្លៀត មកជួប ជួន ធឿប សុំឲ្យវាស់វែងដី តែត្រូវ លោក ជួន ធៀប ថាជាប់រវល់ ហើយពីមួយឆ្នាំទៅមួយឆ្នាំ ចេះតែពន្យារពេលរហូតមក និងពេលខ្លះ លោក ជួន ធៀប ថាចាំលក់សរុបទាំងអស់គ្នាទៅ។ ដោយចុងក្រោយលោក ជួន ធៀប បានព្រមវាស់កំណត់ព្រំដី ដោយមានខាងមន្ត្រីសុរិយោដីស្រុកទឹកផុស ចុះមកវាស់វែងជាមួយ លោក ជួន ធៀប បានកំណត់ព្រំដី ត្រឹមចំណុច លោកជំទាវកំពុងឈរបង្ហាញនេះ ដោយលោកជំទាវបានបញ្ជាក់ថា លោកជំទាវ មិនបានរំលោភយកដីអ្នកណានោះឡើយ គឺទិញពី លោក ជួន ធៀប ១០២ ហិកតា ដោយមានគូរប្លង់ដោយមន្ត្រីសុរិយោដីទៀតផង។ ដូច្នេះលោកជំទាវ សុំបដិសេធថាមិនមែនទិញដីតែ៨០ហិកតាដូចការលើកឡើងរបស់ លោក ជួន ធៀប នោះទេ គឺចំនួន១០២ហិកតា ដោយមានក្បាលដីជាប់ផ្លូវប្រវែង១៥០ម៉ែត្រ។ . ដោយឡែក កន្លងមកថ្មីៗនេះ លោក ជួន ធៀប បានប្រាប់ក្រុមអ្នកសារព័ត៌មានថា លោកធ្លាប់បានលក់ដីចំនួន៨០ទៅឲ្យលោកជំទាវ សម មុន្នីកា គឺដីស្ថិតក្នុងភូមិទួលសំរោង ឃុំក្រាំងស្គា ស្រុកទឹកផុស។ ប៉ុន្តែក្រោយពីសារព័ត៌មាន បានផ្សាយទៅតាម លោក ជួន ធៀប អះអាងនោះ ត្រូវបានលោកជំទាវ ចេញមុខ បំភ្លឺដល់ក្រុមអ្នកសារព័ត៌មានវិញថា ដីដែលលោកជំទាវបានទិញ គឺ១០២ហិកតា មានឯកសារត្រឹមត្រូវ។ ដូច្នេះជុំវិញរឿងទំនាស់ដីធ្លីខាងលើនេះ ទុកជូនសមត្ថកិច្ចពាក់ព័ន្ធដោះស្រាយតាមច្បាប់ចុះ សម្រាប់អ្នកសារព័ត៌មាន គឺផ្សាយតាមការលើកឡើងរបស់ភាគីទាំង២តែប៉ុណ្ណោះ ដោយសុំមិនធ្វើបកស្រាយបន្ថែមអ្វីឡើយ៕
Source: Kampuchea Thmey Daily
0 Comments