សមាជិកព្រឹទ្ធសភាជាន់ខ្ពស់មួយរូបនៃគណបក្សសាធារណរដ្ឋបាននិយាយកាលពីថ្ងៃអាទិត្យថា លោកប្រធានាធិបតី Donald Trump បានសន្យាថានឹងបន្តនៅក្នុងប្រទេសស៊ីរីដើម្បីបញ្ចប់ការងារនៃការបំផ្លាញក្រុមរដ្ឋឥស្លាមដែលនេះជាការលើកឡើងមួយត្រឹមតែប៉ុន្មានថ្ងៃប៉ុណ្ណោះបន្ទាប់ពីការប្រកាសថា លោកនឹងដកកងទ័ពភ្លាមៗ។
សមាជិកព្រឹទ្ធសភា Lindsey Graham បានប្រាប់ក្រុមអ្នកយកព័ត៌មាននៅខាងក្រៅសេតវិមានបន្ទាប់ពីលោកបានរៀបរាប់អំពីកិច្ចប្រជុំអាហារថ្ងៃត្រង់រយៈពេលពីរម៉ោងថា “លោកប្រធានាធិបតីយល់អំពីតម្រូវការដើម្បីបញ្ចប់ការងារនេះ”។
សមាជិកសភារដ្ឋ South Carolina រូបនេះបាននិយាយថា “គាត់បានប្រាប់ខ្ញុំនូវរឿងមួយចំនួនដែលខ្ញុំមិនដឹងដែលធ្វើឲ្យខ្ញុំមានអារម្មណ៍ល្អប្រសើរជាងមុនអំពីកន្លែងដែលយើងកំពុងដឹកនាំនៅក្នុងប្រទេសស៊ីរី”។
នៅពេលលោក Trump បង្ហោះ Twitter កាលពីថ្ងៃទី១៩ខែធ្នូថា “យើងបានកម្ចាត់ក្រុម ISIS នៅក្នុងប្រទេសស៊ីរី” នោះ, អ្នកជំនាញផ្នែកយោធានិងសន្តិសុខជាច្រើននាក់បាននិយាយថា គាត់កំពុងនិយាយបំផ្លើសករណីនេះហើយបានព្រមានប្រឆាំងនឹងការដកទ័ពយ៉ាងឆាប់រហ័ស។
លោក Graham បាននិយាយថា លោក Trump បានគិតយ៉ាងយូរនិងម៉ត់ចត់អំពីប្រទេសស៊ីរីនិងរបៀបដកកងកម្លាំងបន្ទាប់ពីបានធានាថា ក្រុម ISIS ត្រូវបានបំផ្លាញហើយថា កងកម្លាំងឃឺដសម្ព័ន្ធអាមេរិកត្រូវបានការពារនិងថា “ប្រទេសអ៊ីរ៉ង់នឹងមិនក្លាយជាអ្នកឈ្នះដ៏ធំនៃការចាកចេញរបស់យើងទេ”។
លោក Graham ដែលជាសមាជិកនៃគណៈកម្មាធិសេវាប្រដាប់អាវុធដែលបានទៅមើលកងទ័ពអាមេរិកជាញឹកញាប់នៅក្នុងតំបន់ប្រយុទ្ធគឺតែងតែរិះគន់លោក Trump ប៉ុន្ដែផ្ទុយទៅវិញឥឡូវនេះបានការពារគាត់និងហាក់ដូចជាមានប្រសិទ្ធិភាពក្នុងការនិយាយទៅកាន់លោកប្រធានាធិបតី។
ការសម្រេចចិត្តយ៉ាងឆាប់រហ័សរបស់លោក Trump លើប្រទេសស៊ីរីបានបង្កការភ្ញាក់ផ្អើលដល់បុគ្គលក្នុងតំបន់ អ្នកនយោបាយជាន់ខ្ពស់របស់គណបក្សទាំងពីរនិងមេដឹកនាំយោធាដែលបានសម្តែងការភ្ញាក់ផ្អើលថា ការសម្រេចចិត្តដ៏សំខាន់បែបនេះគួរតែត្រូវប្រកាសបន្ទាប់ពីមានការពិគ្រោះយោបល់ជាមុន៕ AFP
Source: Kampuchea Thmey Daily
0 Comments