វគ្គបណ្ដុះបណ្ដាលពិសេស ផែនការអភិវឌ្ឍន៍កីឡាកម្រិតខ្ពស់ ដែលចាប់ផ្ដើមពីថ្ងៃទី១២មកនោះ បានបញ្ចប់កាលពីល្ងាចថ្ងៃទី២៩ធ្នូ ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា។
វគ្គនេះ ឧបត្ថម្ភឡើងក្រោមថវិការបស់ក្រសួងអប់រំយុវជន និង កីឡាដែលមានសិក្ខាកាមចូលរួម១៥០នាក់មកពីបណ្ដាសហព័ន្ធជាតិ ទាំងកីឡាអូឡាំពិក ទាំងប្រភេទកីឡាមិនអូឡាំពិកជាង៤០សហព័ន្ធចូលរួម។ ក្រៅពីនេះ ក៏មានសិក្ខាកាមដែលមកពីផ្នែកជំនាញកីឡារបស់ក្រសួងអប់រំយុវជន និង កីឡា និងបណ្ដាស្ថាប័នពាក់ព័ន្ធជាមួយកីឡាជាច្រើនរូបទៀតចូលរួម។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ដែលអញ្ជើញចូលរួមក្នុងពិធីបិទវគ្គនេះ បានមានប្រសាសន៍ថា គ្រូត្រូវតែប្ដូរទម្លាប់ដែលមិនវិទ្យាសាស្ត្រចេញ។ កីឡាត្រូវតែធ្វើទំនើបកម្មឲ្យទាន់ប្រទេសនានានៅក្នុងតំបន់ ។ កីឡាកម្រិតខ្ពស់ត្រូវការជំនាញ និងបច្ចេកទេសពីពេលនេះទៅក្រសួងអប់រំយុវជន និង កីងកីឡានិងគណៈកម្មាធិការជាតិអូឡាំពិកកម្ពុជានឹងរួមគ្នាធ្វើឲ្យគុណផលកីឡាខ្ពស់ជាងមុន។
កីឡារវាងសិស្ស និង គ្រូគឺជាដៃគូដុសខាត់ជំនាញតែបច្ចេកទេស និងស្មារតី ។ឥរិយាបថរបស់គ្រូសំខាន់ខ្លាំងណាស់ តែស្មារតីរបស់សិស្សក៏ជារឿងចាំបាច់ដែរ ។
លោក Gunter Lange ដែលជាអ្នកឯកទេសខាងកីឡាមកពីគណៈកម្មាធិការជាតិអូឡាំពិកសហព័ន្ធអាល្លឺម៉ង់ដែលជាអ្នកឯកទេសនិងរៀបចំការប្រកួតជាច្រើននៅអឺរុប អាស៊ី និងបណ្ដាទ្វីបនានា ក្នុងពិភពលោកគឺជាគ្រូឧទ្ទេសនៅក្នុងវគ្គនេះ ។
លោកបាននិយាយនៅក្នុងពីធីបិទវគ្គនេះថា លោកមកនេះមិនមែនមកដណ្ដើមមេដាយឲ្យកម្ពុជានៅពេលដែលកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមលើកទី៣២ឆ្នាំ២០២៣នោះទេ ។ លោកបន្តថាលោកមកនេះដើម្បីប្រាប់ពីវិធីនៃការដណ្ដើមមេដាយ ។
លោកផ្ដល់យោបល់ថា គ្រូដែលចង់អភិវឌ្ឍន៍កីឡាជាគ្រូដែលមានគុណភាព ព្រោះគ្រូជាប្រភពនៃធនធានបច្ចេកទេសហេតុនេះគ្រូត្រូវតែមានជំនាញ និងមានស្មារតីជាគ្រូបង្វឹក ប្រកបដោយចិត្តសាស្ត្រ កាតយោគយល់ និងការអនុគ្រោះ ព្រមទាំងភាពម៉ឺងម៉ាត់ ។
ជាមួយនឹងការបិទវគ្គនេះលោក Gunter Langeបានផ្ដល់ជាអានុស្សាវរីយ៍ដល់គណៈកម្មាធិការជាតិអូឡាំពិកកម្ពុជានូវឧបករណ៍វាស់កម្លាំងសាច់ដុំទៀតផង ។
វគ្គបណ្តុះបណ្តាលនេះ ត្រូវបានផ្តល់ជូនថ្នាក់ដឹកនាំកីឡា និងគ្រូបង្វឹក មកសហព័ន្ធកីឡាជាតិចំនួន ៣៩ និងមកពីស្ថាប័នកីឡាជាតិជាច្រើនទៀត មានវិទ្យាស្ថានកីឡា មន្ត្រីត្រៀមព្រឹត្តិការណ៍ស៊ីហ្គេមឆ្នាំ ២០២៣ និងគរុសិស្សកីឡាផងដែរ៕
Source: Kampuchea Thmey Daily
0 Comments