បន្ទាយមានជ័យ ៖ ស្រូវប្រាំងជិត៥០០ហិកតារបស់ប្រជាកសិករនៅក្នុងឃុំចំនួន២របស់ស្រុកមង្គលបូរី ខេត្តបន្ទាយមានជ័យ ដែលជួបគ្រោះរាំងស្ងួត ដោយសារការខ្វះទឹកនោះ ឥឡូវនេះកំពុងត្រូវបានអាជ្ញាធរ ស្រុកមង្គលបូរី បូមទឹកជួយសង្គ្រោះជាបន្ទាន់ ក្រោមកិច្ចសហការរវាងមន្ទីរជំនាញអាជ្ញាធរដែនដី និងម្ចាស់ស្រែនៅព្រឹក ថ្ងៃទី៦ ខែធ្នូ ឆ្នាំ២០១៨នេះ។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់អ្នកយកព័ត៌មានឲ្យដឹងថា ដោយស្ថានភាពអាកាសធាតុមានការប្រែប្រួលខុសពីទម្លាប់ ធ្វើឲ្យប៉ុន្មានឆ្នាំកន្លងមកនេះស្ថានភាពភ្លៀងដើមឆ្នាំលឿន និងចុងឆ្នាំអូសបន្លាយជាហេតុបណ្តាលឲ្យមានការព្រួយបារម្ភ និងកង្វះខាតទឹកស្រោចស្រព និងប្រើប្រាស់ស្រែប្រាំងរាប់រយហិកតាឯណោះ។
បើតាមរបាយការណ៍មន្ទីរកសិកម្មខេត្តបន្ទាយមានជ័យបានឱ្យដឹងថា នៅរដូវបង្កបង្កើនផលស្រូវប្រាំង ឆ្នាំ២០១៨និង២០១៩ នេះ ខេត្តបន្ទាយមានជ័យ បានដាក់ចេញនូវផែនការផលិតស្រូវលើផ្ទៃដីចំនួន ២២.០០០ ហិកតា ប៉ុន្តែការដាំដុះជាក់ស្តែងរបស់កសិករ រហូតមកដល់ពេលនេះគឺសម្រេចបានលើផ្ទៃដីជាង ៤៥.០០០ ហិកតា ពោលគឺបានធ្វើលើសផែនការជាង ២៣.០០០ ហិកតា ឯផ្ទៃដីរាប់ពាន់ហិកតា បាននិងកំពុងជួបការខ្វះខាតទឹក។ លោកបានបញ្ជាក់ឲ្យដឹងទៀតថា ស្រូវដែលកំពុងខ្វះទឹករាប់ពាន់ហិកតានោះ មន្ត្រីជំនាញកំពុងរកវិធីជួយសង្គ្រោះហើយ៕
Source: Kampuchea Thmey Daily
0 Comments