ព្រឹត្តិការណ៍ជិះកង់កំសាន្ដ ឆ្ពោះទៅកាន់វិមានឈ្នះ ឈ្នះ ដែលរៀបចំដោយគណៈកម្មាធិការជាតិអូឡាំពិកកម្ពុជា បានចាប់ផ្តើមនៅព្រលឹមថ្ងៃទី២៨ ខែធ្នូ ឆ្នាំ២០១៨នេះ ដោយចេញដំណើរពីក្នុងពហុកីឡដ្ឋានជាតិអូឡាំពិក។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចូលរួមក្នុងព្រឹត្តិការណ៍នេះដែរ។
ការជិះកងឆ្ពោះទៅកាន់វិមានឈ្នះ ! ឈ្នះ ដែលមានចម្ងាយប្រមាណ២០គីឡូម៉ែត្រនេះ គឺដើម្បីអបអរខួបលើកទី២០ នៃថ្ងៃបញ្ចប់សង្គ្រាមស៊ីវីលនៅកម្ពុជា និងដើម្បីចូលរួមអបអរសាទរពិធី សម្ពោធវិមានឈ្នះ ! ឈ្នះ និងអបអរថ្ងៃឆ្លងឆ្នាំសាកលផងដែរ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា យើងមានសិស្សានុសិស្ស និង ប្រជាជនចូលរួមក្នុងការជិះកង់កំសាន្តនេះ។
មន្ត្រីរាជរដ្ឋាភិបាល ដែលចូលរួមក្នុងទិវាជិះកង់កំសាន្ដនេះមាន លោក ស៊ុន ចាន់ថុល លោក ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក វ៉ាត់ ចំរើន រដ្ឋលេខាធិការក្រសួងទេសចរណ៍។
ចំពោះសមាសភាពដែលចូលរួមក្រៅពីមហាជន សិស្សានុសិស្ស អ្នកជិះកង់ដើម្បីសុខភាពនោះ ក៏មានកីឡាករ-កីឡាការិនី សហព័ន្ធកីឡាអត្តពលកម្មស្ម័គ្រចិត្តកម្ពុជា សហព័ន្ធខ្មែរកីឡាហែលទឹក មន្ត្រីក្រសួងសាធារណការនិងដឹកជញ្ជូន មន្ត្រីគណៈកម្មាធិការជាតិអូឡាំពិកកម្ពុជា សហភាពសហព័ន្ធយុវជនកម្ពុជាខេត្តកណ្ដាល……ជាដើម។
នេះជាការជិះកង់កំសាន្ដសុទ្ធសាធដោយមិនគិតពីចំណាត់ថ្នាក់អ្វីឡើយ។ ការជិះកង់លើចម្ងាយផ្លូវប្រមាណជាង២០គីឡូម៉ែត្រនេះ ចេញដំណើរពីពហុកីឡដ្ឋានជាតិអូឡាំពិក ឆ្ពោះទៅកាន់ពហុកីឡដ្ឋានមរតកតេជោ ដែលស្ថិតនៅសង្កាត់ជ្រោយចង្វា ខណ្ឌឫស្សីកែវ៕
Source: Kampuchea Thmey Daily
0 Comments