សម្តេចតេជោ ហ៊ុន សែន អញ្ជើញប្រគល់ពានរង្វាន់ដល់ជ័យលាភីកីឡាវាយកូនគោលអបអរពិធីសម្ពោធវិមានឈ្នះ ឈ្នះ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅល្ងាចថ្ងៃទី៣០ ខែធ្នូ ឆ្នាំ២០១៨ បានអញ្ជើញជាអធិបតីក្នុងពិធីប្រគល់ជ័យលាភីកីឡាវាយកូនគោលនិងជប់លៀងអបអរសាទរខួប២០ឆ្នាំនៃការបញ្ចប់សង្គ្រាមស៊ីវិលនៅកម្ពុជា ដែលពិធីនេះធ្វើឡើងនៅសណ្ឋាគារហ្គាឌិន ស៊ី ធី។

ការប្រកួតកីឡាវាយកូនគោលនិងពិធីជប់លៀងនេះ គឺដើម្បីអបអរសាទរពិធីសម្ពោធវិមានអនុស្សាវរីយ៍នយោបាយឈ្នះ ឈ្នះ ដែលបានសម្ពោធកាលពី២៩ ខែធ្នូ និងអបអរសាទរខួប២០ឆ្នាំនៃការបញ្ចប់ភ្លើងសង្គ្រាមនៅក្នុងប្រទេសកម្ពុជាដោយ នយោបាយ ឈ្នះ ឈ្នះ របស់សម្តេចតេជោ ហ៊ុន សែន។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានសហព័ន្ធកីឡាវាយកូនគោលកម្ពុជាបានបញ្ជាក់ថា ការប្រកួតកីឡាវាយកូនគោល អស់រយៈពេលពេញមួយថ្ងៃនេះ បានប្រព្រឹត្តទៅយ៉ាងរលូនប្រកបដោយមោទនភាព និងពោរពេញទៅដោយសេចក្ដីសប្បាយរីករាយ។ នេះជាព្រឹត្តិការណ៍ថ្មីមួយដែលសហព័ន្ធកីឡាវាយកូនគោលកម្ពុជាបានរៀបចំការប្រកួតជាលក្ខណៈទ្រង់ ទ្រាយធំក្នុងគោលបំណងបង្កើនស្មារតីមិត្តភាពសាមគ្គីភាពរវាងអ្នកលេងកីឡាវាយកូនគោលផង និងចូលរួមពិធីសម្ពោធវិមានឈ្នះឈ្នះ ដើម្បីអបអរសាទរខួបលើកទី២០ នៃការអនុវត្តប្រកបដោយជោគជ័យនយោបាយឈ្នះឈ្នះ ផងនិងចូលឆ្នាំថ្មីឆ្នាំសាកលឆ្នាំ២០១៩ ផងដែរ។

សម្តេចពិជ័យសេនា ទៀ បាញ់ បានបន្តថា សហព័ន្ធកីឡាវាយកូនគោលនៅកម្ពុជាបានរីកចម្រើនគួរឱ្យកត់សម្គាល់។ នៅពេលនេះយើងមានទីលានវាយកូនគោលចំនួន១០នៅតំបន់ទេសចរណ៍សំខាន់ៗ ដូចជា រាជធានីភ្នំពេញ ខេត្តសៀមរាប, ខេត្តកោះកុង និង ខេត្តកំពង់ស្ពឺហើយត្រៀមបង្កើតទីលានវាយកូនគោលថ្មីៗថែមទៀតនៅក្នុងពេលអនាគតដ៏ខ្លីខាងមុខនេះ។ ទន្ទឹមនឹងនេះដែរ សហព័ន្ធកីឡាវាយកូនគោលកម្ពុជាកំពុងតែពង្រឹងសមត្ថភាពវាយកូនគោលឲ្យកាន់តែមានឧត្តមភាពខ្ពស់និងសមិទ្ធផលដ៏រឹងមាំស្របតាមយុទ្ធសាស្ត្រ ៤ឆ្នាំរំកិលរបស់គណៈកម្មការជាតិអូឡាំពិកកម្ពុជាគឺកម្ពុជាឆ្ពោះទៅរកគុណផលកីឡាកម្រិតខ្ពស់។ សម្តេចពិជ័យសេនាបានបង្ហាញក្តីសង្ឃឹមថា នាថ្ងៃនេះនិងថ្ងៃអនាគតកីឡាវាយកូនគោលកម្ពុជានឹងមានការរីកចម្រើនឆ្ពោះទៅរកភាពជោគជ័យក្នុងការប្រកួតកីឡាស៊ីហ្គេមដែលកម្ពុជាធ្វើជាម្ចាស់ផ្ទះនៅឆ្នាំ២០២៣ ខាងមុខនេះ។សមិទ្ធផលទាំងនេះផ្ដើមចេញពីនយោបាយឈ្នះ ឈ្នះ របស់សម្ដេចតេជោ ហ៊ុន សែន ដែលបានធ្វើឲ្យកម្ពុជាទទួលបានសុខសន្តិភាពពេញលេញ និងមានការអភិវឌ្ឍរីកចម្រើនលើគ្រប់វិស័យរហូតដល់សព្វថ្ងៃនេះ។ តាមរយៈការទទួលបានសន្តិភាពនិងការអភិវឌ្ឍនេះហើយ ទើបធ្វើឲ្យកម្ពុជាបានប្រែមុខមាត់ថ្មីពីប្រទេសដែលធ្លាប់មាន សង្គ្រាមរ៉ាំរ៉ៃ មានសោកនាដកម្មដ៏ខ្លោចផ្សាលើប្រទេសជាតិត្រូវក្លាយទៅជាប្រទេសដែលកំពុងទទួលបានការអភិវឌ្ឍរីកចម្រើនព្រមទាំងសម្រេចបាននូវកំណើនសេដ្ឋកិច្ចគួរឲ្យកត់សម្គាល់ ប្រជាជនទទួលបានសុភមង្គលជីវភាពធូរធាររហូតមានមុខមាត់អាចឈរលើឆាកអន្តរជាតិនិងស្មើមុខស្មើមាត់ជាមួយបណ្ដាប្រទេសក្នុងតំបន់សព្វថ្ងៃនេះ។

តាមរបាយការណ៍របស់លោក ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធកីឡាវាយកូនគោលកម្ពុជាបានអោយដឹងថា ព្រឹត្តិការណ៍ប្រកួតកីឡាវាយកូនគោលអបអរសាទរពិធីសម្ពោធវិមានអនុស្សាវរីយ៍ ឈ្នះ ឈ្នះ និងខួបលើកទី២០នៃការបញ្ចប់សង្គ្រាមស៊ីវិលនៅកម្ពុជាគឺមានកីឡាករ-ការិនីជាតិនិងអន្តរជាតិចូលរួមជាង២០០ នាក់ក្នុងនោះមានទូតមន្ត្រីជាន់ខ្ពស់ក្នុងជួររាជរដ្ឋាភិបាល កីឡាករ-ការិនី កម្រិតអាជីពដែលរួមមានកីឡាករជាតិ និងអន្តរជាតិចូលរួមប្រកួតសរុបចំនួន ១៩៩នាក់ ក្នុងនោះមានកីឡាករបរទេសចំនួន ៦៧នាក់ ដែល ១១ នាក់ជា ឯកអគ្គរាជទូត រដ្ឋទូត ប្រចាំនៅកម្ពុជាដែលមកពី១០ ប្រទេសដូចជា អាល្លឺម៉ង់, ប៉ាគីស្ថាន, ឡាវ, ប្រ៊ុយណេ, ម៉ាឡេស៊ី, ឥណ្ឌូណេស៊ី, ថៃ, វៀតណាម, ចិន និងកូរ៉េ និង ៥៦នាក់ផ្សេងទៀត ជាធុរកិច្ចជនមកពីប្រទេស សិង្ហបុរី, អាល្លឺម៉ង់, ប៉ាគីស្ថាន, ឡាវ, ប្រ៊ុយណេ, ម៉ាឡេស៊ី, ឥណ្ឌូនេស៊ី, ថៃ វៀតណាម, ចិន និងកូរ៉េ។

ដោយឡែកការប្រកួតជាក្រុមមានចំនួន ៦៩នាក់ និងឯកត្តជនចំនួន ១៣០ នាក់ ក្នុងនោះកីឡាការិនីចំនួន ២០នាក់។ លោក ជា បូរ៉ា បានឲ្យដឹងទៀតថា ព្រឹត្តិការណ៍វាយកូនគោលនេះ បានចែកចេញជា៤វិញ្ញាសា គឺ១. វិញ្ញាសាប្រកួតក្រុមសម្រាប់កីឡាមិនមែនអាជីពចាប់ពីអាយុ ៥០ ឆ្នាំឡើងទៅ,២.វិញ្ញាសាប្រកួតឯកត្តជនកីឡាករមានហានីកាប់, ៣.ប្រកួតឯកត្តជនកីឡាករគ្មានហានីកាប់ និង ៤.វិញ្ញាសាប្រកួតឯកត្តជននារី។

ចំពោះលទ្ធផលវិញ្ញាសាប្រកួតជាក្រុម ចំណាត់ថ្នាក់លេខ១ បានទៅក្រុមសម្តេចពិជ័យសេនា ទៀ បា ញ់ ដែលមានសម្ដេចពិជ័យសេនា ទៀ បាញ់ ,នាយឧត្តមសេនីយ៍ ឥត សារ៉ាត់និងឧត្តមសេនីយ៍ លី កុសល។ ក្រោយពីការប្រកួតពេញមួយថ្ងៃនេះ ជាលទ្ធផល ជ័យលាភីលេខ១ បានទៅលើក្រុមកីឡាវាយកូនគោលរបស់សម្តេចពិជ័យសេនា ទៀ បាញ់ ។ លេខ២បានទៅលើក្រុមកីឡាវាយកូនគោល របស់លោក ចម ប្រសិទ្ធ និងលេខ៣ បានទៅលើក្រុមកីឡាវាយកូនគោលរបស់ លោក នាង ផាត។ ចំពោះលទ្ធផល ជ័យលាភីដែលទទួលបានពានរង្វាន់ក្នុងការប្រកួតជាឯកត្តជនវិញ គឺកីឡាករ កីឡាការិនីដែលទទួលពានរង្វាន់មានចំនួន១៨នាក់។លទ្ធផលវិញ្ញាសាឯកត្តជនដែលមានហានីកាប់ចំណាត់ថ្នាក់លេខ១ បានទៅលើលោកហេង សុខម៉េង ។លទ្ធផលលើវិញ្ញាសាឯកត្តជនកីឡាករដែលគ្មានហានីកាប់ចំណាត់ថ្នាក់លេខ១ បានទៅលោក ចេង ហេង។ លទ្ទផលវិញ្ញាសាប្រកួតផ្នែកនារីគឺលេខ១ បានទៅកីឡាការិនី សាយ ស្រីនី, លេខ២ កីឡាការិនី មួង សិលានិងលេខ៣ កីឡាការិនី Cherry Ly។

សម្តេចតេជោ ហ៊ុន សែន នាយករដ្ឋមន្ត្រីបានអញ្ជើញផ្តល់កិត្តិយសប្រគល់ពានរង្វាន់ជូនដល់កីឡាករ និងកីឡាការិនី ដែលទទួលបានជោគជ័យនៅក្នុងការប្រកួតកីឡាវាយកូនគោលក្នុងថ្ងៃនេះ និងបានផ្តល់កិត្តិយសថតរូបអនុវស្សាវរីយ៍ជាមួយក្រុមកីឡាករប្រកបដោយបរិយាកាសសប្បាយរីករាយក្រៃលែង ។

នៅឱកាសនោះដែរ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិក៏បានប្រគល់ពានរង្វាន់កិត្តិយសជូនចំពោះ សម្តេចតេជោ ហ៊ុន សែន ដើម្បីជាការគោរពដឹងគុណយ៉ាងជ្រាលជ្រៅចំពោះសម្តេចក្នុងឱកាសនៃការសម្ពោធវិមានឈ្នះ ឈ្នះ និង ការរម្លឹកខួប២០ឆ្នាំនៃការពន្លត់ភ្លើងសង្គ្រាមស៊ីវិល នៅកម្ពុជាតាមនយោបាយ ឈ្នះ ឈ្នះ របស់សម្តច ហើយសម្តេចពិជ័យសេនា ទៀ បាញ់ ក៏បានប្រគល់ជូនពានរង្វាន់អនុស្សាវរីយ៍ដល់សម្តេចពញាចក្រី ហេង សំរិន ផងដែរ៕