លេចមុខ​គ្រូបង្វឹក​ចាស់​របស់​ក្លិប​ភ្នំពេញ​ក្រោ​ន ទៅ​បន្ត​អាជីព​នៅពាន​រង្វាន់​លី​គ​លំដាប់​ទី​៣​របស់​ថៃ

បន្ទាន់​ពី​បញ្ចប់​សកម្មភាព​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) ក្លិប​ភ្នំពេញ​ក្រោ​ន បាន​ប្រកាស​ចែកផ្លូវ​ជាមួយ​លោក Sean Sainbury ដែល​ជា​គ្រូបង្វឹក​ខណៈ​ក្លិប​ជើងឯក​៦​សម័យកាល​មួយ​នេះ​បាន​ឈរ​ត្រឹម​ចំណាត់ថ្នាក់​លេខ​៥​ប៉ុណ្ណោះ ក្នុងចំណោម​ក្លិប​ជា​សមាជិក​ចំនួន​១២​ក្រុម​ប្រចាំ​រដូវ​កាល​។



ក្រោយ​ចាក​ចេញពី​ក្លិប​បាល់ទាត់​ភ្នំពេញ​ក្រោ​ន មួយរយៈ​នៅពេលនេះ​លោក Sean Sainbury បាន​ទៅ​បន្ត​អាជីព​ជាមួយ​ក្លិប​សមាជិក​ពានរង្វាន់​លី​គ​លំដាប់​ទី​៣​ប្រទេស​ថៃ (2019 Thai League 3) គឺ​ក្រុម​Bangkok F.C សម្រាប់​រដូវ​កាល​ឆ្នាំ​២០១៩​ខាងមុខ​។ លោក Sean Sainbury ជា​ជនជាតិ​អង់គ្លេស ហើយ​លោក​ធ្លាប់ជា​គ្រូបង្វឹក​កីឡាបាល់ទាត់​ដែលមាន​បទពិសោធន៍​ប្រមាណ​ជា​១៨​ឆ្នាំ​មកហើយ ថែមទាំង​ធ្លាប់បាន​ដឹកនាំ​ក្រុមយុវជន​ជម្រើសជាតិ​ថៃ​អាយុ​ក្រោម ២១​ឆ្នាំ​, ក្រុម​ថ្នាល​យុវជន​នៅ​ក្លិប Muangthong United FC ព្រមទាំង​ជា​គ្រូ​បង្គោល​នៅ​ក្លឹប Nakhon Nayok FC ក្លិប Pattaya United នៅក្នុង​ប្រទេស​ថៃ។

​លោក បានធ្វើ​ដំណើរ​មកកាន់​ប្រទេស​កម្ពុជា កាលពី​ឆ្នាំ​២០១៧ កន្លង​ទៅដោយ​កាន់​តួនាទី​ជា​នាយក​បច្ចេកទេស​(Technical Director)​។ ក្រោយ​ការចាកចេញ​របស់លោក Oleg Starynskyi ជា​ជនជាតិ​អ៊ុយ​ក្រែង ដែល​ជា​គ្រូបង្វឹក​ចាស់ នៅ​ចុងឆ្នាំ​២០១៧ ទើប​លោក Sean Sainbury​ត្រូវ​ក្លិប​តែងតាំង​ឲ្យធ្វើជា​គ្រូបង្វឹក​ជំនួស​តែម្តង​។



​ចំពោះ​ក្រុម​ភ្នំពេញ​ក្រោ​ន ក្រោម​ការដឹកនាំ​របស់​លោក Sean Sainbury បាន​បញ្ចប់​រដូវ​កាល​ដោយ​ចំណាត់ថ្នាក់​លេខ​៥​ប្រចាំ​រដូវ​កាល​ក្នុង​លី​គ​កំពូល​កម្ពុជា ក្រោយ​ប្រកួត​បាន​២២​លើក ឈ្នះ​បាន​១១​លើក ស្មើគ្នា​៣​លើក​និង​ចាញ់​៨​លើក​មាន​៣៦​ពិន្ទុ ពោលគឺ​ចាញ់​ក្រុម​កំពូល​តារាង​ណាហ្គា​វើល រហូតដល់​២០​ពិន្ទុ​។ ភ្នំពេញ​ក្រោ​ន ទាត់​បញ្ចូល​ទី​គូប្រកួត​បាន​៤១​គ្រាប់ ហើយ​គេ​ទាត់​ចូល​វិញ​ចំនួន​៣៣​គ្រាប់​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup) វិញ​ក្រុម​ភ្នំពេញ​ក្រោ​ន បាន​ធ្លាក់​ចេញ​ត្រឹម​វគ្គ​៨​ក្រុម​ចុងក្រោយ បន្ទាប់ពី​ចាញ់​ក្រុម​អង្គ​រថា​យ​ហ្គឺ​រ ដែល​មកពី​ខេត្តសៀមរាប ដោយបាល់​ ប៉េណាំង​ទី​កាត់​សេចក្តី​៤ទល់​៣ ​ក្រោយ​ប្រកួត​ស្មើ​គ្នា​ទាំង​២​ជើង​៤​ទល់​៤៕

Source: Kampuchea Thmey Daily