ក្លិបបាល់ទាត់វិសាខា សមាជិកក្នុងពានរង្វាន់លីគកំពូលកម្ពុជា (Metfone Cambodian League) បានប្រកាសនៅក្នុងសន្និសីទសារព័ត៌មានព្រឹកថ្ងៃសុក្រ សប្ដាហ៍នេះថាក្លិបត្រៀមរៀបចំក្រុមបាល់ទាត់ថ្នាលយុវជន១ក្រុមទៀត បូកពីលើក្រុមយុវជនក្រោមអាយុ១៧ឆ្នាំ (U17) ដែលមានស្រាប់ ព្រមទាំងបង្កើតក្រុមបាល់ទាត់នារី១ក្រុមផងដែរ។
លោក ហុក សុចិត្រា អ្នកចាត់ការទូទៅរបស់ក្រុមបានបញ្ជាក់ប្រាប់អ្នកសារព័ត៌មានថា «សម្រាប់ការជ្រើសរើសក្រុមយុវជនថ្នាល១ក្រុមទៀត គឺរើសក្រុម U14 ដោយ យើងមានគម្រោងទៅជ្រើសរើសនៅតាមបណ្ដាខេត្តជាជំហានដំបូង ដើម្បីសម្រួលដល់អ្នកនៅតាមខេត្តមិនពិបាកធ្វើដំណើរមករាជធានីភ្នំពេញ។ ពេលដែលយើងរើសបានបេក្ខជនតាមខេត្តគោលដៅហើយ យើងនឹងរ៉ាប់រងឲ្យពួកគាត់មកធ្វើតេស្ដមួយតង់ទៀតនៅភ្នំពេញតែម្ដង»។ សម្រាប់លក្ខន្តិកៈក្រុមនារី ក៏កំពុងស្ថិតក្នុងផែនការរបស់ក្រុម តែមិនទាន់លម្អិតបាននៅឡើយទេ ដោយរង់ចាំការជ្រើសរើសយុវជន U14 ជាមុនសិន។
សូមបញ្ជាក់ថា ថ្មីៗនេះ ថ្នាក់ដឹកនាំក្លឹបវិសាខា បានសម្រេចប្តូរសមាសភាពដឹកនាំថ្មីដោយចាប់ពីរដូវកាលឆ្នាំ២០១៩ តទៅដោយប្រគល់តួនាទីជាប្រធានក្លិបជូនលោកជំទាវ កែ សួនសុភី ស សុខា វិញ ស្របពេលប្រធានក្លិបចាស់ ឯកឧត្តម ស សុខា មិនមានពេលវេលាគ្រាប់គ្រាន់ដើម្បីដឹកនាំក្លិប ព្រោះលោកកំពុងមមាញឹកជាមួយតំណែងដែលទើបជារដ្ឋលេខាធិការក្រសួងអប់រំ យុវជន និងកីឡា។
ក្រុមវិសាខា បានបង្កើតឡើងពីថ្ងៃទី៥ ខែកុម្ភៈ ឆ្នាំ២០១៧ ក្រោមការឧបត្ថម្ភគាំទ្រពីសំណាក់ឯកឧត្ដម ស សុខា នៅកាលនោះ។ បច្ចុប្បន្នក្លឹបមានកីឡាករជាង៣០នាក់ ដែលមានលោក ហុក សុចិត្រា អតីតគ្រូបង្វឹកក្រុមជម្រើសជាតិកម្ពុជា ដើរតួរធ្វើជាអ្នកចាត់ការទូទៅរបស់ក្រុម ខណៈលោក ហុក សុជីវ័ន ជាប្អូនប្រុសបង្កើតធ្វើជាគ្រូបង្វឹក។ ក្រុមវិសាខា បានកសាងកីឡដ្ឋានថ្មីផ្ទាល់ខ្លួន មានទីតាំងនៅតាមផ្លូវលេខ៥៩៨ ខាងឆ្វេងដៃខ្លោងទ្វារ Grand Phnom Penh។ កីឡដ្ឋាននេះអាចផ្ទុកទស្សនិកជនប្រមាណជាង៥០០០នាក់ ដែលមានទីលានជាស្មៅធម្មជាតិ។
សូមរំលឹកថា ចំពោះក្រុមវិសាខា បានបញ្ចប់រដូវកាលចាស់របស់ខ្លួនដោយឈរចំណាត់ថ្នាក់លេខ៣ ក្នុងចំណោមក្លិបជាសមាជិកទាំង១២ ក្រោយប្រកួត២២លើក ឈ្នះបាន១៤លើក ហើយស្មើគ្នា៣លើក និងចាញ់៥លើក។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមវិសាខា បានធ្លាក់ចេញត្រឹមវគ្គ១៦ក្រុមចុងក្រោយ ចាញ់ក្រុមព្រះខ័នរាជស្វាយរៀង២ទល់១៕
Source: Kampuchea Thmey Daily
0 Comments